អាដហុក៖ អំពើរំលោភសេពសន្ថវៈមានការកើនឡើង
អង្គការអាដហុកនៅថ្ងៃពុធទី០៥សីហាបានចេញផ្សាយរបាយការណ៍ របស់ខ្លួនពាក់ព័ន្ធបីករណីរួមមានហិង្សាលើស្រ្តី រំលោភសេពសន្ថវៈ និងការជួញដូរមនុស្ស។ ក្នុងនោះអំពើរំលោភសេពសន្ថវៈនៅក្នុងឆមាសទី១ឆ្នាំ២០១៥មានការកើនឡើងដល់ទៅ៥១ករណីបើធៀបនិងឆ្នាំ២០១៤។
ចុះផ្សាយនៅថ្ងៃ៖
ស្តាប់ - ០២:០៩
របាយការណ៍ស៊ើបអង្កេតរបស់សមាគមការពារសិទ្ធមនុស្សអាដហុកចេញផ្សាយនៅថ្ងៃពុធទី០៥សីហានេះ ដែលលម្អិតបន្ថែមដោយ លោក ធន សារ៉ាយ ប្រធានអង្គការអាដហុកបញ្ជាក់ថា ៦ខែ ដើមឆ្នាំ២០១៥ សមាគមបានធ្វើការអង្កេតនិងអន្តរាគមន៍អំពើរំលោភចំនួន១៣១ករណី។ ក្នុងនោះរំលោភសេពន្ថវៈលើ ក្មេងអាយុក្រោម៥ឆ្នាំ៥ករណី អាយុក្រោម ១០ឆ្នាំ៣២ករណី ក្រោមអាយុ១៨ឆ្នាំមាន៦៣ករណី អាយុ១៨ឆ្នាំមាន៣១ករណី។ ១៣១ករណីនេះទៀតរំលោភសម្លាប់ចំនួន៣ករណី រំលោភបូក៦ករណី និងជនពិការ១៥ករណី។
បើតាម លោក ធន សារ៉ាយ ការកើនឡើងអំពើរំលោភសេពសន្ថវៈដល់ទៅ៥១ករណីគឺកើតឡើងគ្រប់រូបភាពតាមរយៈ ឱពុករំលោភកូនបង្កើត ជីតារំលោភចៅបង្កើតជាដើម ដែលកត្តាទាំងនេះបង្ហាញឲ្យឃើញពីការធ្លាក់ចុះសីលធម៌សង្គមគួរឲ្យសង្វេគ។ មូលហេតុនៃការកើនឡើងត្រូវបានលោក ធន សារ៉ាយ បញ្ជាក់ថា ពាណិជ្ជកម្មស្រាភ្ជាប់ជាមួយរូបភាពស្រើប ស្រាល ការហូរចូលនូវវីដេអូអាសអាភាសតាមរយៈប្រព័ន្ធផ្សព្វផ្សាយ។ លោក ធន សារ៉ាយ ឲ្យដឹងថា ស្ត្រីដែលជាជនរងគ្រោះក្លាយជាឃាតករទៅវិញបន្ទាប់ពីមានការធ្វើបាបពីដៃគូរ។
អាដហុកបានឲ្យដឹងទៀតចំពោះករណីជនបរទេសរំលោភមកលើកុមារកម្ពុជាមាន១ករណីសម្រាប់ឆ្នាំ២០១៥នេះ។ គឺជនជាតិវៀតណាមអាយុ៣៦ឆ្នាំរំលោភសម្លាប់ទៅលើទារិកាអាយុ១ខួប៣ខែ។ អាដហុកក៏បានបញ្ជូនសំណុំរឿងរំលោភប្ដឹងដោយជនរងគ្រោះទៅកាន់តុលាការមាន៤៧ករណីសម្រាប់៦ខែក្នុងឆ្នាំ២០១៥នេះ។
ថ្លែងនៅក្នុងសន្និសីទកាសែតនៅព្រឹកនេះដែរ លោកស្រី ឆន សុគន្ធា ប្រធានកម្មវិធីស្ត្រី និងកុមារ របស់សមាគមសិទ្ធិមនុស្សអាដហុកបានស្នើទៅក្រសួងមហាផ្ទៃឲ្យដាក់ពិន័យទៅកាន់សមត្ថកិច្ច និងអ្នកអនុវត្តច្បាប់ដែលមាននិន្នាការើសអើងជាមួយជនរងគ្រោះ ប្រសិនបើជនរងគ្រោះមាននិន្នាកាទៅរកបក្សប្រឆាំង។
ដោយឡែកចំពោះករណីហិង្សាក្នុងគ្រួសារកើតឡើង៧៤ករណីបើធៀបនិងរយៈពេលដូចគ្នាកាលពី៦ខែឆ្នាំ២០១៤។ ការជួញដូរកម្លាំងពលកម្មមនុស្សនិងផ្លូវភេទគឺថយចុះពីចំនួន៩០ករណីបើប្រៀបធៀបឆ្នាំ២០១៤ តែចំនួននៃជនរងគ្រោះមានការកើនឡើងដល់ទៅ៤៣៨នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ