ផលវិបាកដ៏ធ្ងន់ធ្ងរលើអាកាសធាតុ ដោយសារភ្លើងឆេះព្រៃនៅឥណ្ឌូណេស៊ី
ផ្សែងខ្មៅខ្មួលខ្មាញ់ ដែលបណ្តាលពីភ្លើងឆេះព្រៃ នៅប្រទេសឥណ្ឌូណេស៊ី កាលពីដើមខែកញ្ញា នឹងអាចជះឥទ្ធិពលអាក្រក់ ទៅលើអាកាធាតុ។ នេះបើផ្អែកតាមរបាយការណ៍ របស់ភ្នាក់ងារស្រាវជា្រវអវកាស NASA ។ ផលប៉ះពាល់ដល់អាកាសធាតុនេះ នឹងជះឥទ្ធិពលដោយផ្ទាល់ ទៅដល់ការកើនឡើង នូវឧស្ម័នកាបូនិក នឹងកំដៅផែនដី ហើយវានឹងជំរុញឲ្យមានបាតុភូត អែលនីញ៉ូ (El Niño) កាន់តែញឹកញាប់ជាងមុន។
ចុះផ្សាយនៅថ្ងៃ៖
ស្តាប់ - ០២:០៦
ចំហាយកំដៅ លាយឡំនឹងផ្សែងឧស្ម័នកាបូនិក ទាំងអស់នេះហើយជាធាតុផ្សំនៃបាតុភូតអែលនីញ៉ូ។ បាតុភូតនេះ និងបង្ករជាបណ្តុំខ្យល់ ដែលភាគច្រើនមានកម្លាំងខ្លាំង ជាខ្យល់ព្យុះ និងខ្យល់គួច រសាត់បក់បោក នៅពីលើលំហសមុទ្រ។ មិនត្រឹមតែប៉ុណ្ណោះ បាតុភូតនេះ នឹងបង្ករជាសីតុណ្ហភាពក្តៅខ្លាំង ហើយនឹងគ្រោះរាំងស្ងួតធ្ងន់ធ្ងរ ដែលអាចប៉ះពាល់ដោយផ្ទាល់ ទៅលើការដាំដុះ របស់ប្រជាកសិករ។
យោងតាមរបាយការណ៍របស់ NASA ផ្សែងខ្មៅដ៏សន្ធឹកសន្ធាប់ ដោយសារភ្លើងឆេះព្រៃនៅកោះស៊ូមាត្រា និងកោះកាលីម៉ាន់តាន់ នៃប្រទេសឥណ្ឌូណេស៊ី នឹងជំរុញឲ្យមានបាតុភូត អែលនីញ៉ូ នេះ កាន់តែញឹកញាប់ និងខ្លាំងជាងមុន។ ថ្វីត្បិតតែពេលនេះ ខ្យល់ព្យុះរឺ គ្រោះរាំងស្ងួត នៅមិនទាន់កើតមាននៅឡើយ ក៏ប៉ុន្តែផលប៉ះពាល់ជាក់ស្តែង គឺយើងបានឃើញនឹងភ្នែករួចទៅហើយ ដោយសារការដុតរានដីព្រៃ នៅឥណ្ឌូណេស៊ី ក្នុងទំហំធំមហិមានេះ។ ផ្សែងខ្មៅ បានហោះទៅគ្របដណ្តប់ដល់ម៉ាឡេស៊ី និងសឹង្ហបុរី។ សាលារៀនជាច្រើន ត្រូវបានបិទ ដើម្បីការពារសុខភាពកុមារ។ ចរាចរណ៍ផ្លូវអាកាសក៏បានកាត់បន្ថយផងដែរ។ មនុស្សជាច្រើនពាន់នាក់ កំពុងតែមានជំងឺក្នុងប្រពន្ធ័ដកដង្ហើម។
ឥណ្ឌូណេស៊ី ដែលមានព្រៃឈើធំមហាសាល កំពុងតែរងការរិះគន់ដោយសារតែសកម្មភាពដុតរានដីព្រៃ ដើម្បីយកដីទៅដំាដុះ ដំណាំឧស្សាហកម្មផ្សេងៗ ដូចជាតំណាំដូងប្រេងជាដើម។ ក្រុមហ៊ុនវិនិយោគជាច្រើន ត្រូវរដ្ឋាភិបាលប្រគល់សិទ្ធិអភិវឌ្ឍន៍ ឲ្យកាប់បំផ្លាញព្រៃឈើ ហើយបន្ទាប់មកពួកគេ បានជួលប្រជាជនក្រីក្រ ឲ្យដុតរានព្រៃ ទៅតាមប្រពៃណីបូរាណ។ ភ្លើងបានឆាបឆេះ រហូតទប់លែងបាន កាលពីថ្ងៃទី ៨កញ្ញាកន្លងទៅ។ ក្រោយហេតុការណ៍នេះ រដ្ឋាភិបាលឥណ្ឌូណេស៊ី ត្រូវបង្ខំចិត្តចាប់ផ្តើមសើររើ កិច្ចសន្យាសម្បទាន ជាមួយក្រុមហ៊ុនមួយចំនួន តួយ៉ាងក្រុមហ៊ុនដ៏ធំមួយឈ្មោះ Asian Pulp and Paper។
គេនៅចាំមិនទាន់ភ្លេចទេថា កាលពីខែកញ្ញា ឆ្នាំ១៩៩៧ ហេតុការណ៍ភ្លើងឆេះព្រៃ របៀបនេះ បានកើតឡើង ម្តងរួចទៅហើយ នៅឥណ្ឌូណេស៊ី។ កាលនោះ ព្រៃប្រមាណជា ៨សែនហិចតា ត្រូវឆេះខ្លោច តំបន់អាស៊ីអាគ្នេយ៍ស្ទើតែទាំងមូល ត្រូវគ្របដណ្តប់ ដោយផ្សែងខ្មៅ។ បន្ទាប់មកនៅឆ្នាំ១៩៩៨ គ្រោះរាំងស្ងួត បានធ្វើឲ្យវិស័យកសិកម្ម ខាតបង់ធ្ងន់ធ្ងរ ហើយជាផ្នែកមួយ ជំរុញឲ្យមានវិបត្តិហិរញ្ញវត្ថុអាស៊ីអាគ្នេយ៍ នាពេលនោះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ