ចិនអះអាងថាសម្លាប់បណ្តាញភេរវកម្មអ៊ុយហ្គួរ ២៨នាក់
នគរបាលចិនបានប្រកាស ប្រាប់នៅថ្ងៃសុក្រទី ២០ វិច្ឆិកានេះថា អាជ្ញាធរទើបបានចេញប្រតិបត្តិការ បង្រ្កាបបណ្តាញភេរវកម្មនៅតំបន់ខេត្តស៊ីនជាំង ភាគខាងលិចប្រទេសចិន ដោយបានសម្លាប់ ភេរវជនចំនួន ២៨នាក់។ ក្រោយពីហេតុការណ៍ភេរវកម្មបង្កឡើងដោយក្រុមជីហាដអ៊ីស្លាម នៅប៉ារីស រដ្ឋាភិបាលចិន ក៏បានអះអាងផងដែរថា ខ្លួន ក៏កំពុងតែរងគ្រោះ ដោយសារក្រុមភេរវករអ៊ីស្លាមដែរ គឺក្រុមភេរវករ ជនជាតិអ៊ុយហ្គួរ នៅតំបន់ស៊ីនជាំងនេះឯង។
ចុះផ្សាយនៅថ្ងៃ៖
ស្តាប់ - ០១:៥០
ភេរវជន២៨ នាក់ ត្រូវបានសម្លាប់ ក្នុងប្រតិបត្តិការបោសសម្អាត បណ្តាញភេរវកម្ម នៅខេត្តស៊ីនជាំង នេះបើតាមការរាយការណ៍ របស់អាជ្ញាធរចិន។ ប្រតិបតិ្តការបង្រ្កាបឥតរើសមុខ របស់ការិយាល័យសន្តិសុខចិន នេះ ត្រូវបានដាក់ចុះ បន្ទប់ពីមានហេតុការណ៍ប៉ុនប៉ង ធ្វើភេរវកម្ម មួយបានកើតឡើង នៅក្នុងរោងចក្រធ្យូងថ្ម នៅភាគអាគ្នេយ៍ ខេត្តស៊ិនជាំង កាលពីថ្ងៃទី ១៨ កញ្ញាកន្លងទៅ។
ក្នុងហេតុការណ៍នោះ នគរបាលចិន បានចេញអន្តរាគមន៍ បាញ់តបតប ជាមួយនឹងក្រុមភេរវករ នៅកន្លែងកើតហេតុ ដោយបណ្តាលឲ្យស្លាប់មនុស្ស១៦នាក់។ ក៏ប៉ុន្តែខាងវិទ្យុអាស៊ីសេរី ដែលផ្សាយចេញពីសហរដ្ឋអាមេរិក បានផ្សព្វផ្សាយថា ហេតុការណ៍នេះ បានបណ្តាលឲ្យស្លាប់មនុស្សរហូតដល់ជាង៤០នាក់ ឯណោះ។ ភ្លាមៗក្រោយការប៉ុនប៉ង ធ្វើភេរវកម្មនេះ នគរបាលចិន បានចេញចុះតាមចាប់ ក្រុមជនដៃដល់ដែលពួកគេគិតថា ជាក្រុមជនជាតិអ៊ុយហ្គួរ នៅខេត្តស៊ិនជាំងនេះតែម្តង។
ខេត្តស៊ីនជាំង ជាខេត្តដ៏ធំ នៅភាគខាងលិចប្រទេសចិន។ ខេត្តនេះមានប្រជាជនរស់នៅភាគច្រើន ជាសហគមជនជាតិអ៊ុយហ្គួរ ដែលកាន់សាសនាអ៊ីស្លាម។ ក្រុមអ្នកតស៊ូជនជាតិអ៊ុយហ្គួរ បានតែងតែធ្វើការបរិហារពី ការជិះជាន់ ពីសំណាក់រដ្ឋាភិបាលកុម្មុយនីស្តចិន ទៅលើប្រជាជនអ៊ុយហ្គួរ។ ធនធានរ៉ែក្រោមដីដ៏មហាសាល នៅខេត្តនេះ ត្រូវបានក្រុមហ៊ុនចិន បូមកកាយយក ទុកឲ្យប្រជាជនម្ចាស់ស្រុក ក្រលំបាក ដោយគ្មានយកចិត្តទុកដាក់អ្វីទាំងអស់។
ហេតុការណ៍ភេរវកម្ម បានកើតឡើងជាញឹកញាប់នៅចិន ដែលអាជ្ញាធរក្រុងប៉េកាំង បានដាក់បន្ទុកថា ជាក្រុមអ៊ីស្លាមអ៊ុយហ្គួរ ដែលចង់ទាមទារបំបែកទឹកដីចេញពីចិន។ ជាក់ស្តែងហេតុការណ៍ដើរយកកាំបិតចាក់មនុស្ស នៅស្ថានីយ៍រថភ្លើង កាលពីខែ ៣ ឆ្នាំ២០១៤ បានធ្វើឲ្យប្រជាជនចិនទូទៅ មានការភ័យខ្លាច។ ក្រុមជនជាតិអ៊ុយហ្គួរ ក៏ធ្លាប់បានធ្វើភេរវកម្ម នៅកណ្តាលក្រុងប៉េកាំងផងដែរ ដោយបានដាក់គ្រាប់បែកបំផ្ទុះនៅខាងមុខ ទីលានធានអានមិនតែម្តង កាលពីខែ តុលា ឆ្នាំ២០១៣។ អាជ្ញាធរចិន បានប្រើធម៌ក្តៅ គ្រប់រូបភាព ដើម្បីបង្រាបបណ្តាញសកម្មជនតស៊ូជនជាតិអ៊ុយហ្គួរ ហើយថែមទាំងបានបន្ទោសថា ក្រុមជនជាតិអ៊ុយហ្គួរ ជាក្រុមអ៊ីស្លាមជ្រុលនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ