តើចិនមានបំណងសាងសង់មូលដ្ឋានយោធានៅក្នុងប្រទេសជីប៊ូទីឬ?
នៅក្នុងប្រទេសចិន មធ្យោបាយឃោសនាមហាជនរដ្ឋបានប្រាប់ឲ្យដឹងនៅថ្ងៃអង្គារ ទី១០ វិច្ឆិកាពីដំណើរទស្សនកិច្ចរបស់ថ្នាក់ដឹកនំាយោធាជាន់ខ្ពស់ចិននៅក្នុងប្រទេសជីប៊ូទីកាលពីចុងសប្តាហ៍កន្លងទៅ។ គេមិនដឹងពីគោលដៅនៃទស្សនកិច្ចរបស់ថ្នាក់ដឹកនំាយោធាជាន់ខ្ពស់ចិនរូបនោះទេ តែកាសែតផ្លូវការយោធាចិនមួយបែរជាបានព្យាយាមរំងាប់ពាក្យចចាមអារ៉ាមដែលថា ចិនអាចនឹងសាងសង់មូលដ្ឋានយោធាមួយរបស់ខ្លួននៅក្នុងប្រទេសជីប៊ូទីដែលជាទីតំាងយុទ្ធសាស្រ្តនៅក្នុងទ្វីបអាហ្រ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ថ្នាក់ដឹកនំាយោធាជាន់ខ្ពស់ចិនដែលបានទៅបំពេញទស្សនកិច្ចនៅក្នុងប្រទេសជីប៊ូទីនាចុងសប្តាហ៍កន្លងទៅ គឺលោកឧត្តមសេនីយហ្វាង ហ្វេងហ៊ី មេបញ្ជាការកងទ័ពរំដោះប្រជាមានិតចិន។ នៅក្នុងដំណើរទស្សនកិច្ចនោះ ឧត្តមសេនីយហ្វាង ហ្វេងហ៊ីបានជួបសន្ទនាជាមួយលោកប្រធានាធិបតីជីប៊ូទីអ៊ីស្មាអែល អូម៉ា ហ្កឺលេ នេះជាព័ត៌មានចុះផ្សាយដោយកាសែតផ្លូវការកងទ័ពចិនឈ្មោះ China Military Online។ China Military Online បានប្រាប់ឲ្យដឹងថា នៅក្នុងកិច្ចសន្ទនាជាមួយលោកប្រមុខរដ្ឋជីប៊ូទី ឧត្តមសេនីយចិនប្រហែលជាបានលើកឡើងពីឆន្ទៈរបស់ចិនក្នុងការពង្រឹងបន្ថែមនូវកិច្ចសហប្រតិបត្តិការរវាងទីក្រុងប៉េកំាង និងទីក្រុងជីប៊ូទី ពិសេសនៅក្នុងវិស័យយោធា។
នៅក្នុងបទសម្ភាសន៍ជាមួយទីភ្នាក់ងារសារព័ត៌មានបារំាង AFP ក្នុងខែឧសភាកន្លងទៅ លោកប្រធានាធិបតីជីប៊ូទីអ៊ីស្មាអែល អូម៉ា ហ្កឺលេធ្លាប់បានទម្លាយឲ្យដឹងថា ចិនកំពុងចរចាជាមួយជីប៊ូទីដើម្បីសាងសង់មូលដ្ឋានយោធារបស់ខ្លួនដូចដែលអាមេរិក បារំាង និងជប៉ុនកំពុងមាននៅក្នុងទឹកដីជីប៊ូទីសព្វថ្ងៃ។ គួរជម្រាបជូនថា ជីប៊ូទីជាដែនដីយុទ្ធសាស្រ្តមួយយ៉ាងសំខាន់នៅក្នុងទ្វីបអាហ្រ្វិក ពិសេសដៃសមុទ្រ Bab-el-Mandeb ដែលជាច្រកដឹកទំនិញផ្លូវសមុទ្រដ៏សកម្មជាងគេមួយនៅក្នុងលោក។
បច្ចុប្បន្ន ចិនកំពុងធ្វើការអភិវឌ្ឍន៍លើវិស័យជាច្រើននៅក្នុងប្រទេសជីប៊ូទី ដូចយ៉ាងគម្រោងសាងសង់កំពង់ផែ អាកាសយានដ្ឋាន និងផ្លូវអយស្ម័យយាន។ ឥឡូវនេះ ចិនបាន និងកំពុងព្យាយាមពង្រីកបន្ថែមនូវឥទ្ធិពលយោធារបស់ខ្លួននៅជីប៊ូទី តែនៅមិនមានមូលដ្ឋានយោធាប្រចំាការនៅទីនោះជាផ្លូវការឡើយ។ ក្តីបារម្ភកើតចេញពីគម្រោងសាងសង់មូលដ្ឋានយោធាចិននៅជីប៊ូទីត្រូវបានទម្លាយដោយសារព័ត៌មាន Global Times ដែលជាកាសែតប្រចំាថ្ងៃមានទំនោរកគណបក្សកុម្មុយនិស្តចិន។
Global Times បានស្រង់សម្តីអ្នកជំនាញយោធាចិនម្នាក់ដែលអះអាងថា វាមិនយុត្តិធម៌ទេដែលគេបារម្ភពីការគំរាមកំហែងរបស់ចិន និងថា មូលដ្ឋានយោធាចិននៅជីប៊ូទី គឺដើម្បីផ្គត់ផ្គង់ប្រេងឥន្ធនៈ និងជួយគំាទ្រដល់បេសកកម្មប្រឆំាងចោរសមុទ្រ និងប្រឆំាងពួកភេរវជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ