ជប៉ុនត្រៀមបញ្ជូនជាតិភ្លុយតូនីញ៉ូមទៅអាមេរិក ក្នុងក្របខ័ណ្ឌមិនរីកសាយភាយនុយក្លេអ៊ែរ
នៅខែមីនា ២០១៦ខាងមុខនេះ សារធាតុភ្លុយតូនីញ៉ូម ៣៣០គីឡូក្រាម ដែលអាចផលិតជាគ្រាប់បែកបរមាណូបានប្រមាណ៥០គ្រាប់ នឹងត្រូវដឹកបញ្ជូនទៅកាន់មជ្ឈមណ្ឌលស្រាវជ្រាវនុយក្លេអ៊ែរសហរដ្ឋអាមេរិក។ ជាការផ្ទេរដែលធ្វើឡើងក្នុងក្របខ័ណ្ឌកិច្ចព្រមព្រៀងទ្វេភាគីជប៉ុន-អាមេរិក មិនរីកសាយភាយនុយក្លេអ៊ែរ កាលពីឆ្នាំ២០១៤។ នេះបើតាមប្រភពសារព័ត៌មានជប៉ុន។
ចុះផ្សាយនៅថ្ងៃ៖
ស្តាប់ - ០២:០៥
មន្ត្រីផ្នែកបច្ចេកវិទ្យានុយក្លេអ៊ែរ នៃក្រសួងអប់រំនិងវិទ្យាសាស្ត្រ បានបញ្ជាក់ប្រាប់ភ្នាក់ងារសារព័ត៌មានបារាំងនៅថ្ងៃអង្គារនេះ ថា ជប៉ុនកំពុងរៀបចំត្រៀមបញ្ជូនសារធាតុភ្លុយតូនីញ៉ូម ទៅកាន់អាមេរិក តែមិនអាចផ្តល់ព័ត៌មានលម្អិតទាក់ទងនឹងថ្ងៃចេញ ព្រមទាំងផ្លូវធ្វើដំណើរ បានឡើយហេតុផលសន្តិសុខ។ សារព័ត៌មានក្យូដូ បានត្រឹមបង្ហើបថា នាវាដឹកជញ្ជូនត្រូវទៅដល់រដ្ឋការ៉ូលីនខាងត្បូង នៅចុងខែមីនា។ ខែដែលវ៉ាស៊ីនតោនត្រូវធ្វើជាម្ចាស់ផ្ទះរៀបចំជំនួបកំពួលស្តីពីសន្តិសុខនុយក្លេអ៊ែរ។
នេះគឺជាការដឹកជញ្ជូនផ្ទេរសារធាតុគីមី ងាយផ្ទុះ និងពុលខ្លាំង ទ្រង់ទ្រាយធំ ក្នុងបរិមាណច្រើនមិនធ្លាប់មានទេ គិតចាប់តាំងពីឆ្នាំ១៩៩៣មក (ឆ្នាំដែលបារាំងបានបញ្ជូនទៅជប៉ុននូវសារធាតុគីមីបែបនេះដល់ទៅ១តោន) ជាហេតុធ្វើឱ្យប្រទេសតាមដងផ្លូវបង្ហើរការខ្វល់ខ្វាយយ៉ាងខ្លាំងតាមប្រព័ន្ធអ៊ីនធ័រនែត។
ការផ្ទេរសារធាតុភ្លុយតូនីញ៉ូមនេះ ជាលទ្ធផលនៃការព្រមព្រៀង កាលពីឆ្នាំ២០១៤។ ជប៉ុន-អាមេរិក បានខិតខំរួមគ្នាខ្លាំងណាស់ ក្នុងនយោបាយមិនរីកសាយភាយនុយក្លេអ៊ែរ។ ម្យ៉ាងទៀត សារធាតុនេះ គឺជារបស់សហរដ្ឋអាមេរិក អង់គ្លេស និងបារាំង ដែលប៉ុន្មានទសវត្សមុនបាននាំយកទៅជប៉ុន ដើម្បីធ្វើការសិក្សាស្រាវជ្រាវវិទ្យាសាស្ត្រនុយក្លេអ៊ែរ។
អ្នកឯកទេសជាច្រើនយល់ថា ជប៉ុនមានសមត្ថភាពគ្រប់គ្រាន់សម្រាប់អភិវឌ្ឍអាវុធនុយក្លេអ៊ែរ។ ប្រទេសជិតខាងធ្លាប់បានជ្រួលច្របល់ម្តងហើយ នៅពេលនាយករដ្ឋមន្ត្រីជប៉ុនសម័យឆ្នាំ២០០៦ បានព្រលយពាក្យថាជប៉ុនមានគ្រាប់បែកបរមាណូ។
ជប៉ុនប្រទេសរងគ្រោះគ្រាប់បែកបរមាណូតែមួយគត់លើពិភពលោក (សីហា ១៩៤៥) តាំងពីឆ្នាំ១៩៦៧មក មានគោលការណ៍បី កំណត់ដោយនាយករដ្ឋមន្ត្រី Eisaku Sato ជ័យលាភីរង្វាន់ណូបែលសន្តិភាពឆ្នាំ១៩៧៤ ប្រឆាំងនឹងនុយក្លេអ៊ែរ គឺ គ្មានការផលិត គ្មានអាវុធ គ្មានការអនុញ្ញាតឱ្យអាវុធនុយក្លេអ៊ែរចូលក្នុងទឹកដីជប៉ុនទេ។ ប៉ុន្តែជប៉ុនបានទទួលស្គាល់ នៅឆ្នាំ២០១០ ថា មានកិច្ចព្រមព្រៀងដោយស្ងាត់ៗជាមួយអាមេរិក តាំងពីឆ្នាំ១៩៦៩ ឱ្យនាវានិងយន្តហោះមានផ្ទុកអាវុធនុយក្លេអ៊ែរចូលចតនៅជប៉ុន និងបានអនុញ្ញាតឱ្យអាមេរិកស្តុកអាវុធនុយក្លេអ៊ែរក្នុងមូលដ្ឋានទ័ពអាមេរិកនៅអូគីណាវ៉ា ដែលជាទីតាំងយុទ្ធសាស្ត្របំផុត ក្នុងករណីមានជម្លោះក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ