តើលោកអូបាម៉ាអាចស្តាររូបភាពអាមេរិកខ្លាំង ដើម្បីបញ្ចុះបញ្ចូលសម្ព័ន្ធមិត្តនៅអាស៊ីបានយ៉ាងដូចម្តេច?
ចុះផ្សាយនៅថ្ងៃ៖
ស្តាប់ - ០៧:២០
លោកប្រធានាធិបតីអាមេរិក បារ៉ាក់ អូបាម៉ាបានចាកចេញពីទីក្រុងវ៉ាស៊ីនតោន នៅថ្ងៃអង្គារ ទី ២២ មេសា ដើម្បីបំពេញទស្សនកិច្ចនៅក្នុងប្រទេសសម្ព័ន្ធមិត្តរបស់ខ្លួន នៅអាស៊ី ដោយចាប់ផ្តើម ដំបូង នៅជប៉ុន នៅថ្ងៃពុធ បន្ទាប់មក នៅកូរ៉េខាងត្បូង ហ្វីលីពីន និងម៉ាឡេស៊ី។ ទស្សនកិច្ចរបស់លោកអូបាម៉ា ធ្វើឡើងដើម្បីបញ្ជាក់ពីសារៈសំខាន់របស់អាស៊ីប៉ាស៊ីហ្វិក នៅក្នុងនយោបាយការបរទេស និងយុទ្ធសាស្រ្តយោធា សេដ្ឋកិច្ចរបស់អាមេរិក។ នៅថ្ងៃអង្គារនេះដែរ កូរ៉េខាងត្បូងបានអះអាងថា គេបានរកឃើញស្នាមសកម្មភាព ដែលអាចបញ្ជាក់ថា កូរ៉េខាងជើងអាចនឹងធ្វើការសាកល្បងនុយក្លេអ៊ែរលើកទីបួន។
កាលពីឆ្នាំមុន លោកបារ៉ាក់ អូបាម៉ាបានលុបចោលទស្សនកិច្ច នៅអាស៊ី ដោយសារតែវិបត្តិថវិកាក្នុងស្រុក។ មេដឹកនាំប្រទេសសម្ព័ន្ធមិត្ត ដូចជាជប៉ុន ហ្វីលីពីនជាដើម មានការខកចិត្តយ៉ាងខ្លាំង ដោយពួកគេធ្លាប់សង្ឃឹមរង់ចាំចង់ឲ្យលោកអូបាម៉ាទៅធ្វើទស្សនកិច្ចនៅក្នុងប្រទេសរបស់ខ្លួន ដើម្បី បង្ហាញដល់ប្រទេសចិន ថា ពួកគេមានអាមេរិកនៅចាំជួយការពារពួកគេ ទប់ទល់នឹងចិន។
ក្នុងកាលៈទេសៈ កំពុងប្រឈមមុខតានតឹងជាមួយ ចិន ដែលចេះតែពង្រីកឥទ្ធិពលអំណាច នៅអាស៊ី ជប៉ុន ហ្វីលីពីនដែលកំពុងមានជម្លោះដីកោះ ជាមួយចិន ត្រូវការជាចាំបាច់នយោបាយគាំទ្រពីលោកប្រធានាធិបតីអាមេរិក បារ៉ាក់ អូបាម៉ា។ លើកនេះ លោកអូបាម៉ា ទៅអាស៊ី ដោយមិនចូលជាន់ទឹកដីចិន ប៉ុន្តែ ទៅធ្វើទស្សនកិច្ចតែក្នុងប្រទេសសម្ព័ន្ធមិត្តរបស់ខ្លួន នៅអាស៊ី។
កាលពីឆ្នាំ ២០១១ លោកអូបាម៉ាធ្លាប់បានប្រកាសបែរយុទ្ធសាស្រ្តយោធា នយោបាយការបរទេស និងសេដ្ឋកិច្ច មកនៅអាស៊ីប៉ាស៊ីហ្វិក។ លោកធ្លាប់បានប្រកាសបង្កើនវត្តមានទ័ពអាមេរិក ឲ្យដល់៦០ភាគរយ នៅ អាស៊ីប៉ាស៊ីហ្វិក។ នៅក្នុងពេលអាមេរិកប្រកាសបង្កើនវត្តមានទ័ពនៅអាស៊ី រដ្ឋាភិបាលអាមេរិកក៏ទើបបានកាត់បន្ថយថវិកាយោធា អស់ជាង ៨៦ពាន់លានដុល្លារ។ ចំនួនទ័ពជើងគោកអាមេរិក ក៏នឹងត្រូវកាត់បន្ថយអស់មួយសែននាក់។ ទ័ពដែលអាមេរិកសន្យាបញ្ជូនឲ្យទៅប្រចាំការបន្ថែម នៅអូស្ត្រាលី ត្រូវបានបញ្ជូនយ៉ាងយឺតយ៉ាវ មិនទៅតាមកាលគ្រោងទុក
មួយវិញទៀត សម្ព័ន្ធមិត្ត របស់អាមេរិក ដូចជា ជប៉ុន ឬហ្វីលីពីនជាដើម ដែលកំពុងតាមដានមើលយ៉ាងកៀកបំផុត ជំហររបស់អាមេរិក នៅក្នុងដំណើការដោះស្រាយវិបត្តិអ៊ុយក្រែន បានបង្ហាញការខកចិត្ត និងអាក់អន់ចិត្តមិនតិចទេ នៅពេលឃើញប្រមុខដឹកនាំអាមេរិកបានទាត់ចោលការអន្តរាគមន៍យោធា អាមេរិក នៅក្នុងវិបត្តិអ៊ុយក្រែន ដែលពេលនេះ កំពុងគាបសង្កត់ពីរុស្ស៊ី។
នយោបាយការបរទេសទន់ជ្រាយ រារែក មិនប្រើកម្លាំងបាយ របស់អាមេរិកបានធ្វើឲ្យសម្ព័ន្ធមិត្ត នៅអាស៊ី របស់អាមេរិក ចោទសួរថា តើអាមេរិកនឹងនៅតែអាចធានាបានទេចំពោះសន្តិសុខរបស់ប្រទេសសម្ព័ន្ធមិត្ត នៅពេលណាដែលមានការរំលោភឈ្លានពាន? តើអាមេរិកនឹងហ៊ានអន្តរាគមទ័ពដែរឬទេ នៅពេលណាដែលចិនវាយប្រហារមកលើជប៉ុន ឬហ្វីលីពីន។ ដោយមើលទៅលើបទពិសោធន៍អ៊ុយក្រែន ដែលកំពុងរងការឈ្លានពានពីរុស្ស៊ី ប្រទេសដែលកំពុងឈ្លោះជាមួយចិន កំពុងបារម្ភខ្លាចថា អាមេរិកនឹងអាចនៅស្ងៀម ឈរឱបដៃ មិនអន្តរាគមទ័ព នៅអាស៊ី ព្រោះតែមិនចង់ឈ្លោះជាមួយមហាអំណាចចិន និងដើម្បីរក្សាប្រយោជន៍សេដ្ឋកិច្ចរបស់ខ្លួន។
មន្រ្តីអាមេរិកជំនាញកិច្ចការអាស៊ីប៉ាស៊ីហ្វិក ចង់ជម្រះមន្ទិលសង្ស័យ ដោយអះអាងថា ជំហររបស់អាមេរិកសម្រាប់សម្ព័ន្ធមិត្តនៅអាស៊ី គឺមិនផ្លាស់ប្តូរ។ កិច្ចព្រមព្រៀងសន្តិភាពជាមួយជប៉ុន ក្រោយសង្រ្គាមបានបញ្ជាក់យ៉ាងច្បាស់ថា អាមេរិកនឹងជួយរក្សាសន្តិសុខឲ្យជប៉ុន នៅពេលណាដែលជប៉ុន រងការវាយប្រហារពីប្រទេសខាងក្រៅ។
ជប៉ុនគាបឲ្យអាមេរិកប្រកាន់ជំហរច្បាស់លាស់
ដំណើរទស្សនកិច្ចរបស់លោកអូបាម៉ាទៅកាន់ប្រទេសសម្ព័ន្ធមិត្តនៅអាស៊ី គឺជាវិញ្ញាសារដ៏លំបាកមួយ។ ជប៉ុនដែលជាសម្ព័ន្ធសំខាន់ជាងគេរបស់អាមេរិក នៅអាស៊ី បានដាក់សម្ពាធលើប្រធានាធិបតីអាមេរិក។ នៅមួយថ្ងៃមុនទស្សនកិច្ចរបស់លោកប្រធានាធិបតីអាមេរិក ជប៉ុនមិនរារែកនឹងញុះញង់ឲ្យមានភាពតានតឹង និងកំហឹងក្រេវក្រោធពីសំណាក់ចិន និងកូរ៉េខាងត្បូង។ នៅថ្ងៃអង្គារ ទី ២២ មេសា នៅទីក្រុងតូក្យូ រដ្ឋមន្រ្តី និងសមាជិកសភាជប៉ុន១៥០នាក់បានទៅគោរពសព នៅវិហារយ៉ាស៊ូគូនី ដែលចិន និងកូរ៉េខាងត្បូង រិះគន់ ដោយសារតែក្នុងវិហារនោះមានកប់ផងដែរ មេទ័ពជប៉ុនដែលជាមេឧក្រិដ្ឋកម្មសង្រ្គាម លោកលើកទីពីរ។
បើទោះបីជាជប៉ុនមិនសូវចុះសម្រុង ដោយសារតែនិន្នាការនយោបាយជាតិនិយមរៀងៗខ្លួន នោះក៏ដោយ ក៏ជប៉ុននៅមិនបារម្ភពីគ្រោះថ្នាក់របស់កូរ៉េខាងត្បូង ព្រោះដោយសំអាងថា កូរ៉េខាងត្បូងក៏ជាសម្ព័ន្ធមិត្តរបស់អាមេរិក ដែលអាមេរិកនៅតែអាចជួយសម្របសម្រួល មិនឲ្យក្លាយជាសត្រូវរបស់ជប៉ុន។ ប៉ុន្តែ គឺចិន ដែលបង្កើនថវិកាយោធាជាបន្តបន្ទាប់ និងជាគ្រោះថ្នាក់គំរាមកំហែងដល់សន្តិសុខជប៉ុន ដែលជប៉ុនចង់ឲ្យទាញឲ្យអាមេរិក មកអារកាត់ និងមកនៅខាងភាគីខ្លួន។ ជប៉ុននៅតែទៅគោរពសពនៅវិហារដ៏ចម្រូងចម្រាស ដោយអាមេរិកមិនហ៊ានស្តីបន្ទោសឲ្យជប៉ុន។
មួយវិញទៀត ជប៉ុនបានឆ្លៀតយកកិច្ចព្រមព្រៀងពាណិជ្ជកម្មអន្តរប៉ាស៊ីហ្វិកមកធ្វើជាលេស ដើម្បីដាក់សម្ពាធ ឬទាមទារការយកចិត្តទុកដាក់បន្ថែមពីអាមេរិក។ លោកអូបាម៉ាទៅជប៉ុនដំបូងគេ ក៏ដោយសារតែកិច្ចព្រមព្រៀងពាណិជកម្មនេះ ដែលសំខាន់សម្រាប់សេដ្ឋកិច្ចអាមេរិក។ រហូតមកដល់ពេលនេះ ជប៉ុន និងអាមេរិកកំពុងចរចាគ្នា ដើម្បីធ្វើឲ្យចេញកិច្ចព្រមព្រៀងពាណិជ្ជកម្មនេះ មុននឹងអាចឲ្យប្រទេស១២ផ្សេងទៀត ចូលរួម។ រដ្ឋមន្រ្តីក្រសួងសេដ្ឋកិច្ចជប៉ុន បាននិយាយនៅថ្ងៃនេះហើយថា នៅមានការងារ និងពេលវេលាច្រើន ទៀត ដើម្បីគេអាចឈានទៅសម្រេចបង្កើតកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក ដែលនឹងតំណាងឲ្យ៤០ភាគរយ នៃផលិតផលក្នុងស្រុកសរុប ក្នុងពិភពលោកទាំងមូល។
កូរ៉េខាងត្បូង៖ កូរ៉េខាងជើង អាចសាកល្បងគ្រាប់បែកនុយក្លេអ៊ែរលើកទីបួន…
កូរ៉េខាងជើង ធ្លាប់បានរិះគន់ដំណើរទស្សនកិច្ចរបស់លោកអូបាម៉ានៅអាស៊ី ថា ជាសកម្មភាពនាំពពកខ្មៅមកបាំងនៅអាស៊ី និងជំរុញឲ្យមានការប្រណាំងប្រជែងខាងការផលិតគ្រាប់បែកនុយក្លេអ៊ែរ នៅឧបទ្វីបកូរ៉េ។ អាជ្ញាធរកូរ៉េខាងត្បូងកំពុងបារម្ភថា កូរ៉េខាងជើងនឹងអាចយកលេសពេលលោកអូបាម៉ាធ្វើទស្សនកិច្ចនៅកូរ៉េខាងត្បូង នៅថ្ងៃសុក្រ ដើម្បីធ្វើការសាកល្បងគ្រាប់បែកនុយក្លេអ៊ែរ។ កូរ៉េខាងជើង ចង់បង្ហាញសមត្ថភាពគំរាមកំហែងរបស់ខ្លួនផង និងដើម្បីទាក់ទាញឲ្យអាមេរិកត្រលប់ចូលមកតុចរចា ៥ភាគី ដែលកូរ៉េខាងជើងត្រូវការដើម្បីជាថ្នូរនឹងការផ្តល់ជំនួយសេដ្ឋកិច្ច។
កាលពីខែមករាដើមឆ្នាំ២០១៤ ប្រមុខការបរទេសអាមេរិកទើបបានប្រកាសបញ្ជូនសព្វាវុធ និងទ័ពអាមេរិក ចំនួន ៨០០នាក់ បន្ថែមទៀត ទៅកូរ៉េខាងត្បូង។ រហូតមកដល់ពេលនេះ អាមេរិកមានទ័ពជាង២ម៉ឺននាក់ នៅកូរ៉េខាងត្បូង។ ក្នុងករណីមានសង្គ្រាមជាមួយកូរ៉េខាងជើង អាមេរិក គឺជាអ្នកបញ្ជាការលើកងទ័ពកូរ៉េខាងត្បូងទាំងជាង៦សែននាក់។ តាមធម្មតា អាមេរិកត្រូវប្រគល់កិច្ចការបញ្ជាការទ័ពកូរ៉េនេះ អោយទៅកូរ៉េខាងត្បូងវិញ នៅឆ្នាំ២០១៥។ ប៉ុន្តែ ដោយសារតែមានការគំរាមកំហែងមិនឈប់ឈរ និងការបាញ់សាកល្បងនុយក្លេអ៊ែរ កាលពីកំឡុងដើមឆ្នាំ២០១៣ កូរ៉េខាងត្បូងបានសុំអោយអាមេរិកលើកពេលទៅថ្ងៃក្រោយ វិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ