នុយក្លេអ៊ែរកូរ៉េខាងជើង ៖ ១៣ឆ្នាំនៃកិច្ចចរចាបែបដំឡង់៧សណ្តាន
ចុះផ្សាយនៅថ្ងៃ៖
កិច្ចព្រមព្រៀងនុយក្លេអ៊ែរជាប្រវត្តិសាស្ត្រជាមួយអ៊ីរ៉ង់ ចុះហត្ថលេខានៅថ្ងៃទី ១៤កក្កដា ២០១៥ បានបញ្ចេះក្តីសង្ឃឹមមួយភ្លែត ថាពិភពលោកក៏នឹងអាចរកឃើញកិច្ចព្រមព្រៀងស្រដៀងគ្នានេះជាមួយកូរ៉េខាងជើង។ ប៉ុន្តែមិនប៉ុន្មានថ្ងៃផង សាធារណរដ្ឋប្រជាមានិតប្រជាធិបតេយ្យកូរ៉េខាងជើង បានប្រកាសក្តែងៗមិនចាប់អារម្មណ៍នឹងការចរចាណាៗទាំងអស់ ព្រោះព្យុងយ៉ាងមិនត្រូវការបោះបង់កម្មវិធីនុយក្លេអ៊ែររបស់ខ្លួនឡើយ។ មិនត្រឹមតែមិនបោះបង់ទេ តែព្យុងយ៉ាងបានទាំងផ្គើន បាញ់សាកល្បងនុយក្លេអ៊ែរជាលើកទីបួនទៀត កាលពីសប្តាហ៍មុន ជាមួយនឹងជោគជ័យផលិតបានគ្រាប់បែកអ៊ីដ្រូសែនទៀត។
ការចរចានុយក្លេអ៊ែរជាមួយកូរ៉េខាងជើង មិនមែនជារឿងថ្មីថ្មោងទេ ! ស្លាប់ហើយរស់វិញ ព្រមហើយលុបវិញ ក៏មិនជាប៉ុន្មានដងប៉ុន្មានសាដែរ មិនខុសអ្វីពីសំណុំរឿងនុយក្លេអ៊ែរអ៊ីរ៉ង់ ដែលទើបចុះបានកិច្ចព្រមព្រៀងកាលពីឆ្នាំ២០១៥នោះឡើយ។
ថ្វីបើសំណុំរឿងនុយក្លេអ៊ែរកូរ៉េខាងជើង និងអ៊ីរ៉ង់ មើលទៅមួយភ្លែតថាមានលក្ខណៈស្រដៀងគ្នាមែន ប៉ុន្តែភាពខុសគ្នាក៏មានធំ ទើបធ្វើឱ្យក្តីសង្ឃឹមស្វែងរកកិច្ចព្រមព្រៀងរំសាយអាវុធនុយក្លេអ៊ែរ ជាមួយកូរ៉េខាងជើង ដូចនិយាយជាមួយខ្យល់។
អ៊ីរ៉ង់ជាប្រទេសដែលមានធនធានធម្មជាតិប្រេងកាតក្រោមដី និងមានទីតាំងភូមិសាស្ត្រជាយុទ្ធសាស្ត្រ ក្នុងតំបន់ដើមបូព៌ា គួរឱ្យចាប់អារម្មណ៍បំផុតសម្រាប់អាមេរិក។ ឯចំណែកកូរ៉េខាងជើងជាប្រទេសក្រីក្របំផុត ទាំងទ្រព្យ ទាំងធនធាន និងមានមនោគមវិជ្ជាងប់ប្រឆាំងជាប់នឹងកូរ៉េខាងត្បូង។
ចំពោះសមត្ថិភាពនុយក្លេអ៊ែរវិញ ពិភពលោកថាយ៉ាងម៉េចក៏បាន ! តែចង់ឬមិនចង់ ធាតុពិត កូរ៉េខាងជើង គឺជាមហាអំណាចនុយក្លេអ៊ែរមួយទៅហើយ មានគ្រាប់បែកនុយក្លេអ៊ែរ យ៉ាងហោចណាស់១០គ្រាប់។ ឯអ៊ីរ៉ង់វិញមានត្រឹមមហិច្ឆតាចង់អភិវឌ្ឍនុយក្លេអ៊ែរប៉ុណ្ណោះ ហើយក្នុងពេលចរចា លក្ខខណ្ឌចម្បងរបស់អ៊ីរ៉ង់ គឺការលើកទណ្ឌកម្មសេដ្ឋកិច្ចចេញ។ តែចំពោះព្យុងយ៉ាងការទាមទារមានធំហួសប្រមាណ ដំបូងសុំចរចាត្រីភាគី បានហើយ ទាមចង់បាន៦ភាគី ៖ លើកទណ្ឌកម្មសេដ្ឋកិច្ច ដកទ័ពអាមេរិកទាំងអស់ចេញពីតំបន់ (កូរ៉េខាងត្បូង-ជប៉ុន) ព្រមទាំងការលក្ខខណ្ឌនយោបាយជាច្រើនទៀត។
ជាប្រទេសដ៏ឯកា មិនបិទជិតឈឹង ពិបាកធ្វើការផ្ទៀងផ្ទាត់សេចក្តីប្រកាសអ្វីមួយណាស់ បូកផ្សំនឹងកង្វះឆន្ទៈពិតប្រាកដក្នុងការចរចាទៀត អាមេរិកពិតជាធុញ លែងមើលឃើញភាពសំខាន់របស់កូរ៉េខាងជើងក្នុងក្រសែភ្នែក! ចរចាយូរៗទៅកាន់តែស្តាប់គ្នាលែងបានឡើង។
ក្រោមគំនិតផ្តួចផ្តើមរបស់ចិន ការចរចានុយក្លេអ៊ែរកូរ៉ខាងជើង ៦ ភាគី (កូរ៉េទាំងពីរ ចិន អាមេរិក ជប៉ុននិងរុស្ស៊ី) បានចាប់ផ្តើមឡើងវិញ នៅឆ្នាំ២០០៣មក បន្ទាប់ពីអាមេរិកបានដឹងពីការអភិវឌ្ឍកម្មវិធីនុយក្លេអ៊ែរដោយលួចលាក់ តាមរយៈបច្ចេកវិទ្យាប៉ាគីស្ថាន រំលោភលើកកិច្ចព្រមព្រៀងឆ្នាំ១៩៩៤ ជាមួយអាមេរិក និងចាត់ទុកព្យុងយ៉ាងជាសភាវៈអាក្រក់។ កិច្ចចរចាថ្មីនេះ បានសម្រេចលទ្ធផលនៅឆ្នាំ២០០៥ ជាកិច្ចព្រមព្រៀងដែលមានលក្ខណៈដូចឆ្នាំ១៩៩៤ដែរ បូកបន្ថែមនឹងការកំណត់ពេលវេលាទៀត ប៉ុន្តែអ្នកអភិរក្សអាមេរិកមិនព្រម។ ការចរច៦ភាគី ត្រូវជាប់គាំង ! កូរ៉េខាងជើង បានដៃ បានបាញ់សាកល្បងមីស៊ីលបាលីស្ទិក និងនុយក្លេអ៊ែរជាលើកទីមួយ នៅខែតុលា ២០០៦។
អាមេរិករបស់លោកប៊ូស ចាញ់ឆ្នោតនៅសភា ក៏ព្រមវិលមកចរចាជាមួយព្យុងយ៉ាងជាថ្មី ដោយប្រសូតបានកិច្ចព្រមព្រៀងរំសាយអាវុធនុយក្លេអ៊ែរកូរ៉េខាងជើង នៅឆ្នាំ២០០៧ ក្រោមការត្រួតពិនិត្យរបស់ភ្នាក់ងារថាមពលបរមាណូអន្តរជាតិ ដូចជាចុះទៅធ្វើអធិការកិច្ចមជ្ឈមណ្ឌលនុយក្លេអ៊ែរ យ៉ុងយុន ដើម្បីឈានឆ្ពោះទៅដល់ការបិទម៉ាស៊ីនប្រតិកម្ម។ ប៉ុន្តែគ្រាន់តែភ្នាក់ងារAIEA ធ្វើឱ្យឃ្នើសចិត្តបន្តិច ព្យុងយ៉ាងបណ្តេញចេញអស់ពីទឹកដី។ មួយឆ្នាំក្រោយ នៅឆ្នាំ២០០៩ កូរ៉េខាងជើងបានបាញ់សាកល្បងនុយក្លេអ៊ែរជាលើកទីពីរ។
ក្រោមរដ្ឋាបាលលោក អូបាម៉ា ដែលមានយុទ្ធសាស្ត្រស្រទន់ និងអំណត់ខ្លាំង ចំពោះរបបព្យុងយ៉ាង កិច្ចព្រមព្រៀងថ្មីមួយទៀត ត្រូវបានចុះហត្ថលេខានៅខែកុម្ភៈឆ្នាំ២០១២។ ប៉ុន្តែ២ខែបន្ទាប់ ព្យុងយ៉ាងបានបង្ហោះកាំជ្រួចពាំផ្កាយរណប ក្រោមក្រសែភ្នែកក្តៅក្រហាយរបស់អាមេរិកនិងសហគមន៍អន្តរជាតិ។ ហើយនៅខែកុម្ភៈឆ្នាំ២០១៣ កូរ៉េខាងជើងបានសាកល្បងនុយក្លេអ៊ែរជាលើកទីបី ដែលជាលទ្ធផលក្រុមប្រឹក្សាសន្តិសុខអង្គការសហប្រជាជាតិបានចេញសេចក្តីសម្រេចចិត្តដាក់ទណ្ឌកម្មបន្ថែមទៀត។ ឯការចរចាវិញ ត្រូវគាំងស្តូកស្តឹងតាំងពីនោះមកទល់ថ្ងៃនេះ ថ្ងៃដែលមានការសាកល្បងនុយក្លេអ៊ែរជាលើកទីបួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ