កូរ៉េខាងជើងនៅថ្ងៃសុក្រ១៨មីនានេះបានបាញ់មីស៊ីលអន្តរទ្វីបពីរគ្រាប់ដែលបាញ់បានចម្ងាយមធ្យម
កូរ៉េខាងជើង បានបាញ់មីស៊ីលអន្តរទ្វីបចំនួនពីរគ្រាប់ដែលបាញ់បានរយៈចម្ងាយមធ្បមនៅថ្ងៃសុក្រទី១៨មីនានេះ។ ការបាញ់គ្រាប់មីស៊ីលកូរ៉េខាងជើងនេះត្រូវបានប្រព្រឹត្តទៅក្នុងបរិបថមួយដែលភាពតានតឹងផ្នែកយោធាកាន់តែកើនមួយកម្រិតថែមទៀតនៅក្នុងឧបទ្វីបកូរ៉េចាប់តាំងពីកូរ៉េខាងជើងបានបាញ់សាកល្បងនុយក្លេអ៊ែរជាលើកទីបួនមក។
ចុះផ្សាយនៅថ្ងៃ៖
ស្តាប់ - ០២:១៨
ការបាញ់គ្រាប់មីស៊ីលអន្តរទ្វីបចម្ងាយមធ្បមនេះ ត្រូវបានធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីការជូនដំណឹងរបស់លោកគឺមជុងអ៊ុន អំពីការធ្វើតេស្តសាកល្បងក្នុងពេលឆាប់ៗនេះ លើក្បាលគ្រាប់នុយក្លេអ៊ែរ និង ការបាញ់មីស៊ីលអន្តរទ្វីបមួយចំនួនដែរ។
សូមបញ្ជាក់ថា ចាប់តាំងពីកូរ៉េខាងជើង បានបាញ់សាកល្បងគ្រាប់នុយក្លេអ៊ែរកាលពីថ្ងៃទី៦មករាមក ភាពតានតឹងផ្នែកយោធា កាន់តែធ្លាក់ចុះដុនដាបជាលំដាប់ និង ក្រោយពីការបាញ់កាំជ្រួចចម្ងាយឆ្ងាយមួយគ្រាប់ កាលពីថ្ងៃទី៧កុម្ភៈមុន ដែលសហគមន៍អន្តរជាតិ ចាត់ទុកថាជាការធ្វើតេស្តក្លែងបន្លំ អំពី ការបាញ់មីស៊ីលអន្តរទ្វីបរបស់កូរ៉េខាងជើង។
ម្យ៉ាងទៀត ក្រុមមន្ត្រីនៃក្រសួងការពារជាតិអាមេរិកវិញ បានធ្វើការពន្យល់ប្រាប់ថា “គ្រាប់មីស៊ីលទំាងពីរគ្រាប់ដែលកូរ៉េខាងជើងបានបាញ់នៅព្រឹកមិញនេះ ប្រហែលជាគ្រាប់មីស៊ីលបាញ់បានចម្ងាយមធ្យមឈ្មោះ« Rodong »ដែលត្រូវបានបាញ់បង្ហោះចេញពីយាន្តយន្តចល័ត។
« Rodong » គឺជាមីស៊ីលធុន Scud ដែលកូរ៉េខាងជើង បានខិតខំកែឆ្នៃឲ្យបានកាន់តែប្រសើរថែមទៀតនិងដែលអាចបាញ់បានចម្ងាយជាអតិបរិមាត្រឹមតែ ១៣០០ គីឡូម៉ែត្រប៉ុណ្ណោះ។ ចំណែកមន្ត្រីយោធាកូរ៉េខាងត្បូងវិញគូសបញ្ជាក់ថា គ្រាប់មីស៊ីលទីមួយត្រូវបានបាញ់ចេញពីតំបន់ Suchon នៅភាគនិរតីនៃប្រទេសកូរ៉េខាងជើង វេលាម៉ោង៥ ៥៥នាទីម៉ោងកូរ៉េខាងជើង។ ហើយក្រោយពីហោះបានចម្ងាយប្រមាណជា៨០០គមរួចមក គ្រាប់មីស៊ីលទី១នេះ បានធ្លាក់ចុះក្នុងសមុទ្រជប៉ុនដែលគេហៅឈ្មោះមួយទៀតថាសមុទ្រភាគខាងកើត។
ចំណែកមីស៊ីលទីពីរវិញ ត្រូវបានគេបាញ់ ២០នាទី ក្រោយពីការបាញ់មីស៊ីលទីមួយរួច។
គួររំលឹកថា ការបាញ់គ្រាប់មីស៊ីលកូរ៉េខាងជើងទាំងនេះ បានកើតឡើងនៅខណៈពេលដែលលោកប្រធានាធិបតីអាមេរិកបារ៉ាកអូបាម៉ា ទើបបានចុះហត្ថលេខាលើក្រឹត្យមួយដែលអនុញ្ញាតឲ្យមានការដាក់ទណ្ឌកម្មថ្មីៗលើកូរ៉េខាងជើង។ គម្រោងដាក់ទណ្ឌកម្មថ្មីរបស់អាមេរិកបានធ្វើឡើងចំពេលដែលក្រុងព្យុងយ៉ាងបន្តយកបញ្ហានុយក្លេអ៊ែរទៅគំរាមសហគមន៍អន្តរជាតិនិងការចាប់ឃុំឃាំងយុវនិស្សិតអាមេរិកម្នាក់នៅកូរ៉េខាងជើងកាលពីថ្ងៃពុធមុននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ