កូរ៉េខាងជើងបន្តបាញ់មីស៊ីលនិងប្រកាសរឹបអូសទ្រព្យសម្បត្តិកូរ៉េខាងត្បូង
ភាពតានតឹងនៅក្នុងឧបទ្វីបកូរ៉េនៅតែមិនថយចុះទេ គឺមានតែកើនឡើងថែមទៀត នៅថ្ងៃព្រហស្បតិ៍នេះ ដោយកូរ៉េខាងជើងបានបន្តបាញ់សាកល្បងមីស៊ីលបាលីស្ទិករយៈចម្ងាយខ្លីចំនួន២ដើមបន្ថែមទៀត ហើយថែមទាំងប្រកាសរឹបអូសទ្រព្យសម្បត្តិរបស់ក្រុមហ៊ុនកូរ៉េខាងត្បូង ដែលមានទៅតាំងនៅក្នុងទឹកដីកូរ៉េខាងជើង។ វិធានការទាំងអស់នេះ គឺជាការឆ្លើយតបទៅនឹងទណ្ឌកម្មឯកតោភាគី ដែលកូរ៉េខាងត្បូងប្រកាសដាក់លើកូរ៉េខាងជើង កាលពីថ្ងៃអង្គារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
យោងតាមប្រភពពីកងទ័ពកូរ៉េខាងត្បូង មីស៊ីលបាលីស្ទិកទាំង២ដើមត្រូវបានកូរ៉េខាងជើងបាញ់ចេញពីឆ្នេរសមុទ្រប៉ែកខាងកើត ហើយធ្លាក់ទៅក្នុងសមុទ្រ ក្នុងចម្ងាយប្រមាណជា ៥០០គីឡូម៉ែត្រ។
ភ្លាមៗក្រោយពីការបាញ់មីស៊ីលនេះ កូរ៉េខាងជើងក៏បានប្រកាសផងដែរថានឹងលុបចោលទាំងអស់នូវរាល់គម្រោងសហប្រតិបត្តិការផ្នែកសេដ្ឋកិច្ច និងពាណិជ្ជកម្ម ជាមួយកូរ៉េខាងត្បូង ហើយទ្រព្យសម្បត្តិទាំងអស់របស់ក្រុមហ៊ុនកូរ៉េខាងត្បូង ដែលស្ថិតនៅក្នុងទឹកដីកូរ៉េខាងជើងនឹងត្រូវរឹបអូស។
គួរបញ្ជាក់ថា ក្រុមហ៊ុនកូរ៉េខាងត្បូងភាគច្រើន ដែលបោះទីតាំងរកស៊ី នៅក្នុងទឹកដីកូរ៉េខាងជើង គឺស្ថិតនៅក្នុងតំបន់ឧស្សាហកម្មកែសុង ដែលត្រូវបានរដ្ឋាភិបាលកូរ៉េខាងត្បូងប្រកាសផ្អាកលែងដំណើរការ ចាប់តាំងពីក្រោយពេលដែលកូរ៉េខាងជើងធ្វើការសាកល្បងអាវុធនុយក្លេអ៊ែរ និងមីស៊ីលបាលីស្ទិកអន្តរទ្វីប កាលពីខែមុន។
សមាគមក្រុមហ៊ុនកូរ៉េខាងត្បូងបានធ្វើការប៉ាន់ស្មានថា ទ្រព្យសម្បត្តិរបស់ក្រុមហ៊ុនកូរ៉េខាងត្បូង ដែលស្ថិតនៅក្នុងតំបន់ឧស្សាហកម្មកែសុង មានតម្លៃគិតជាទឹកប្រាក់សរុបប្រមាណជា ៦៦៣លានដុល្លារអាមេរិក។ ប្រធានសមាគមនេះបានបញ្ចេញប្រតិកម្មតបទាំងកំហឹងចំពោះសេចក្តីសម្រេចរបស់របបដឹកនាំក្រុងព្យុងយ៉ាង ដោយបានលើកឡើងថា កូរ៉េខាងជើងមិនមានសិទ្ធិរឹបអូសទ្រព្យសម្បត្តិរបស់ក្រុមហ៊ុនឯកជនបែបនេះនោះទេ។
គួរបញ្ជាក់ផងដែរថា ការបាញ់មីស៊ីល និងការប្រកាសរឹបអូសទ្រព្យសម្បត្តិឯកជនរបស់ក្រុមហ៊ុនកូរ៉េខាងត្បូងនេះ ត្រូវបានកូរ៉េខាងជើងធ្វើឡើងតែមួយថ្ងៃប៉ុណ្ណោះ ក្រោយពីលោកគីម ជុងអ៊ុន ប្រកាសអះអាង ពីសមត្ថភាពផលិតក្បាលគ្រាប់នុយក្លេអ៊ែរ សម្រាប់បំពាក់លើមីស៊ីលបាលីស្ទិក។ ឆ្លើយតបទៅនឹងការប្រកាសនេះ អ្នកនាំពាក្យក្រសួងការបរទេសអាមេរិកបានថ្លែងថា “មេដឹកនាំផ្តាច់ការវ័យក្មេងរូបនេះ” គួរតែងាកទៅគិតគូរពីសុខមាលភាពប្រជាជនកូរ៉េខាងជើង ជាជាងគិតតែពីធ្វើរឿងឥតប្រយោជន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ