កាហ្សាក់ស្ថាន បានទទួល ជំនួបកំពូល សហភាពសេដ្ឋកិច្ចអឺរ៉ុប-អាស៊ី
កិច្ចប្រជុំកំពូលនៃ សហភាពសេដ្ឋកិច្ចអឺរ៉ុប-អាស៊ី បានបញ្ចប់ការងារខ្លួន ល្ងាចថ្ងៃ ៣១ឧសភាម្សិលមិញ នៅក្រុង Astana រដ្ឋធានីកាហ្សាក់ស្ថាន - ដែលឆ្នាំនេះ ជាប្រធានផ្លាស់វេន នៃអង្គការតំបន់នេះ មាន៥ប្រទេសជាសមាជិក គឺ រុស្ស៊ី បេឡារុស កាហ្សាក់ស្ថាន អារមេនី និង កៀហ្ស៊ីស៊ីស្ថាន។ ក្នុង “កញ្ចប់ឯកសារ” ដែលប្រមុខរដ្ឋទាំង៥ បានអនុម័ត ជាតុល្យាការជំនួប គឺ មានសេចក្តីសម្រេច ដាក់ឲ្យចូលជាធរមានតែម្តង ”កិច្ចព្រមព្រៀងចុះមួយឆ្នាំមុន គឺ ថ្ងៃ២៩ឧសភា ឆ្នាំ ២០១៥ ស្តីអំពី លំហពាណិជ្ជកម្មសេរី រវាងម្ខាង គឺ៥ប្រទេសសហភាពសេដ្ឋកិច្ចអឺរ៉ុប-អាស៊ី និង ម្ខាងទៀត គឺ សាធារណរដ្ឋសង្គមនិយមវៀតណាម“។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
មុនបើកជំនួបកំពូលនេះ លោកប្រធានាធិបតីកាហ្សាក់ស្ថាន Noursultan Nazarbayev ក្នុងឋានៈជាម្ចាស់ផ្ទះ បានបង្ហាញប្រកបដោយមោទនភាព ជូនភ្ញៀវ គឺសំណង់ដែល កំពុងសង់ ឡើងនៅកណ្តាលរដ្ឋធានី មាន៨៨ជាន់ កាលណាសង់រួច វានឹងមានកំពស់ដល់ ៣៨២ម៉ែត្រ ជាអគារខ្ពស់បំផុត នៅតំបន់អាស៊ីកណ្តាលទាំងមូល។
កិច្ចប្រជុំកំពូលផ្ទាល់ បានបូកសរុបតុល្យាការនៃការងារ ក្នុងរយៈពេល១ឆ្នាំកន្លះកន្លងទៅ តាំងពី សហភាពសេដ្ឋកិច្ចអឺរ៉ុប-អាស៊ី បានប្រសូតមក ថ្ងៃទី១មករាឆ្នាំ២០១៥ និងបានពិនិត្យមើលទស្សនវិស័យ នៃសមាហរ័ណកម្មតទៅទៀត។ គេបានពិភាក្សា អំពីការអភិវឌ្ឍន៍ទីផ្សាររួម នៃថាមពលប្រេងនិងឧស្ម័ន ថាមពលអគ្គិសនី ហិរញ្ញវត្ថុ។ ឯកសារដែលត្រូវបានត្រៀមទុកសម្រាប់ ចុះហត្ថលេខា គឺមានចំនួនដល់ទៅជាង៥០ច្បាប់ បូកទាំងច្បាប់គយថ្មី របស់សហភាពសេដ្ឋកិច្ច អឺរ៉ុប-អាស៊ី ។
មិនតែប៉ុណ្ណោះ សាច់រឿង បានប៉ះលើបញ្ហាពង្រីកសហប្រតិបត្តិការរបស់សហភាពនេះ ជាមួយប្រទេសឯទៀត។ តាមទិសដៅនេះ បើនិយាយពីប្រទេសអាស៊ីអគ្នេយ៍ នោះបន្ទាប់ពី វៀតណាម ដូចដែលលោកប្រធានាធិបតីពូទីន បានប្រកាសឲ្យដឹងពេលទទួលជួបទ្វេភាគី ក្នុងបរិវេណ ជំនួបកំពូល រុស្ស៊ី-អាស៊ាន នៅក្រុងរុស្ស៊ី Sochi ថ្ងៃ១៩និង២០ឧសភាកន្លងទៅ មានទាំង កម្ពុជា ថៃ សិង្ហបុរី ឥណ្ឌូណេស៊ី ក៏ត្រៀមភ្ជាប់ខ្លួនមកនិងលំហពាណិជ្ជកម្មសេរី របស់សហភាព សេដ្ឋកិច្ច អឺរ៉ុប-អាស៊ី។ សហភាពនេះ ដែលមានអ្នកប្រើប្រាស់ចំនួនដល់ ១៨០លាននាក់ ក៏ទាក់ទាញ ប្រទេសឯទៀត បែបយ៉ាង ឥណ្ឌា អ៊ីស្រាអែល អ៊ីរ៉ង់ អេហ្ស៊ីប ស៊ែរប៊ី ប៉េរូ និងជាពិសេស មហាប្រទេសចិន ដែលល្បីដោយទំនិញរបស់ខ្លួនក្នុងតម្លៃថោក។
អ្វីដែលគួរឲ្យកត់សម្គាល់ ពេលថ្លែងក្នុងជំនួបកំពូល នៅក្រុង Astana លោកប្រធានាធិបតីរុស្ស៊ី ពូទីន បានបំផុសមកសំណើ ទៅកាន់រដ្ឋ ៤ទៀត ក្នុង សហភាពសេដ្ឋកិច្ចអឺរ៉ុប-អាស៊ី ឲ្យផលិតរួមគ្នា ក្នុងវិស័យចំនួនដល់២៥វិស័យឯណោះ បែបយ៉ាង ផលិតផលគ្រឿងចក្រ និង ផលិតផលឧស្សាហកម្មធុនស្រាល ជាជំនួស ផលិតផលនាំចូលពីក្រៅ កាលដែលរុស្ស៊ី នៅបន្តជាប់ ក្នុងទណ្ឌកម្មបស្ចិមលោក អស់២ឆ្នាំមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ