ថៃ៖ ទារកបីនាក់មានជំងឺក្បាលតូច ទំនងដោយសារហ្ស៊ីកា
ថៃកំពុងក្លាយជាប្រទេសនៅអាស៊ីអាគ្នេយ៍ដំបូងគេបង្អស់ ដែលមានករណីឆ្លងមេរោគហ្ស៊ីកា ដល់ទារកក្នុងផ្ទៃ។ អង្គការសុខភាពពិភពលោកបានបង្ហាញក្តីព្រួយបារម្ភ និងភាពសង្ស័យខ្លាំង បន្ទាប់ពីឃើញទារកបីនាក់ កើតមកជំងឺក្បាលតូចជាប់នឹងខ្លួន ឯម្តាយមានផ្ទុកមេរោគហ្ស៊ីកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
អាជ្ញាធរថៃកំពុងតាមដានយ៉ាងកៀកកិតស្ត្រីមានផ្ទៃពោះឆ្លងមេរោគហ្ស៊ីកា ចំនួន ៣៦នាក់។ ក្នុងចំណោមស្ត្រី៨នាក់ដែលបានសម្រាលកូនរួច មានបីនាក់មានកូនកើតជំងឺក្បាលតូច។ នេះបើតាមសេចក្តីថ្លែងការណ៍របស់ក្រសួងសុខាភិបាលថៃ នៅយប់ថ្ងៃអង្គារម្សិលមិញ ដោយថែមទាំងបញ្ជាក់ថាទៀតថា ទារកទីបួន នៅក្នុងផ្ទៃម្តាយនៅឡើយ ក៏ទំនងជាមានផ្ទុកជំងឺក្បាលតូចដែរ បើយោងតាមរូបភាពអេកូសាស្ត្រ។
ប្រសិនករណីទារកមានជំងឺក្បាលតូចបណ្តាលមកពីមេរោគហ្ស៊ីកា ពិតជាត្រូវបានបញ្ជាក់មែន នោះថៃនឹងក្លាយជាប្រទេសទីមួយប្រចាំតំបន់ដែលរងផលប៉ះពាល់ពីមេរោគហ្ស៊ីកា ប៉ុន្តែតាមការពិតទៅ មេរោគនេះ មានវត្តមាន ក្នុងប្រទេសថៃ និងតំបន់អាស៊ីអាគ្នេយ៍ តាំងពីយូរហើយ។ ការផ្សព្វផ្សាយអំពីករណីទារកកើតមកមានជំងឺក្បាលតូច នៅអាមេរិកខាងត្បូង បានបំផុសបំផុលឱ្យអាជ្ញាធរសុខាភិបាលនៅតាមទ្វីបផ្សេងទៀត ប្រុងប្រយ័ត្ន និងតាមដានសុខភាពស្ត្រីមានផ្ទៃពោះខ្លាំង ព្រមទាំងផ្តល់ព័ត៌មានភ្លាមនៅពេលជួបករណីពាក់ព័ន្ធនឹងជំងឺហ្ស៊ីកា ដូចយ៉ាងករណីនៅថៃពេលនេះ។
ប៉ុន្តែក្រសួងសុខាភិបាលបានរំលឹក ជារៀងរាល់ឆ្នាំ មានទារកកើតជំងឺក្បាលតូចប្រមាណពី ២០០ទៅ៣០០នាក់ បានកើតនៅក្នុងប្រទេសថៃ ដែលជាទូទៅច្រើនបណ្តាលមកពីម្តាយមានជំងឺផ្សេងៗ ដូចជាជំងឺស្អូច ឬ អុតស្វាយ។ ដូច្នេះគេត្រូវរង់ចាំលទ្ធផលនៃការវិភាគសិន មុននឹងអាចអះអាងជាប្រាកដបានថាករណីទារកទើបនឹងកើតមានជំងឺក្បាលតូចទាំងបីបណ្តាលមកពីមេរោគហ្ស៊ីកា។ អាជ្ញាធរសន្យាផ្សព្វផ្សាយលទ្ធផលនៅថ្ងៃខាងមុខ។
ហ្ស៊ីកា ជាមេរោគចម្លងដោយមូសខ្លា និងតាមការរួមភេទ។ ស្ត្រីឆ្លងមេរោគនេះ នៅពេលមានផ្ទៃពោះអាចនឹងបង្កឱ្យទារកមានការលូតលាស់ខួរក្បាលមិនត្រឹមត្រូវ ហៅថាជំងឺក្បាលតូច។ ក្រុមអ្នកស្រាវជ្រាវអង់គ្លេស បានព្រមានអំពីការផ្ទុះរាតត្បាតនៃជំងឺក្បាលតូចជាទូទៅ ក្នុងប្រទេសរងហ្ស៊ីកា ព្រោះការសិក្សាចុងក្រោយបានបញ្ជាក់កាន់តែច្បាស់បន្ថែមទៀត អំពីទំនាក់ទំនងរវាងវីរ៉ុសហ្ស៊ីកានិងជំងឺក្បាលតូចរបស់ទារកក្នុងផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ