បក្សកុម្មុយនិស្តចិនបើកកិច្ចប្រជុំប្រចាំឆ្នាំ ដើម្បីពង្រឹងអំណាចលោកស៊ីជិនពីង
ចុះផ្សាយនៅថ្ងៃ៖
ស្តាប់ - ០៥:៥៨
គណបក្សកុម្មុយនិស្តចិន ដែលជាបក្សនយោបាយដ៏ធំជាងបង្អស់នៅលើពិភពលោក មានសមាជិកដល់ទៅជាង៨៨លាននាក់ បានបើកជំនួបប្រជុំពេញអង្គប្រចាំឆ្នាំរបស់ខ្លួន ចាប់ពីថ្ងៃចន្ទនេះទៅ សម្រាប់រយៈពេលបួនថ្ងៃ នៅទីក្រុងប៉េកាំង។ ជាកិច្ចប្រជុំដែលអ្នកវិភាគគ្រប់រូបសំលឹងឃើញថាជាឱកាសមួយសម្រាប់លោកស៊ីជិនពីង ពង្រឹងមហិច្ឆតា និងអំណាច ជាប្រមុខដឹកនាំប្រទេស។
គណបក្សកុម្មុយនិស្តចិន ដែលជាបក្សនយោបាយដ៏ធំជាងបង្អស់នៅលើពិភពលោក ដោយមានសមាជិកដល់ទៅជាង៨៨លាននាក់ បានបើកកិច្ចប្រជុំពេញអង្គប្រចាំឆ្នាំរបស់ខ្លួន ចាប់ពីថ្ងៃចន្ទនេះទៅ សម្រាប់រយៈពេលបួនថ្ងៃ នៅទីក្រុងប៉េកាំង។
ពីថ្ងៃចន្ទនេះដល់ថ្ងៃព្រហស្បតិ៍ គណបក្សកុម្មុយនីស្តចិន បានបើកសមាជពេញអង្គរបស់ខ្លួន ដោយប្រមូលមេដឹកនាំសំខាន់ៗជាក្បាលម៉ាស៊ីនបក្ស ជិតបួនរយនាក់មកជួបប្រជុំគ្នា ដើម្បីតម្រង់ទិសនយោបាយបក្ស។ ដូចជាទម្លាប់ជារៀងរាល់ឆ្នាំ តាំងពីឆ្នាំ១៩៤៩មក កិច្ចប្រជុំនេះ ត្រូវប្រព្រឹត្តទៅដោយបិទទ្វារ ក្រោមការការពារសន្តិសុខដ៏តឹងរ៉ឹងបំផុត។
កាលពីឆ្នាំទៅ សម័យប្រជុំពេញអង្គបក្សកុម្មុយនិស្តចិន ឆ្នាំ២០១៥ បានសម្រេចបិទបញ្ចប់នយោបាយកូនទោល និងអនុញ្ញាតឱ្យគ្រួសារមួយអាចមានកូនពីរនាក់ ឯនៅឆ្នាំ២០១៦នេះបើតាមការគូសបញ្ជាក់របស់ភ្នាក់ងារសារព័ត៌មានផ្លូវការចិន គណៈមជ្ឈិមបក្សកុម្មុយនិស្ត ទំនងជាត្រូវផ្តោតការជជែកពិភាក្សាគ្នាលើកំណែទម្រង់ បទដ្ឋានជីវិតនយោបាយ និងវិធានផ្ទៃក្នុងបក្ស គឺមានន័យថា នឹងជជែកអំពី "ការប្រយុទ្ធប្រឆាំងនឹងអំពើពុករលួយ”។
ជាផ្លូវការគេនឹងជជែកអំពីវិន័យបក្ស តែដោយជាក់ស្តែង និងដោយក្រៅផ្លូវការ កិច្ចប្រជុំពេញអង្គនេះ បានចាប់ផ្តើមចោទឡើងទៅហើយអំពីបញ្ហាបន្តតំណែង ជាអគ្គលេខាបក្សកុម្មុយនិស្ត។ លោកស៊ីជិនពីង ទំនងជាអាចតោងជាប់ដោយគ្មានបញ្ហាឡើយ។ តែលោកចង់ឱ្យក្រោយពីបញ្ចប់ពីរអាណត្តិទៅ លោកអាចមានឈរជើងជាប់ដោយគ្មានអ្នកសងសឹក។
បើតាមអ្នកវិភាគ កិច្ចប្រជុំពេញអង្គនេះជាឱកាសចំបងមួយសម្រាប់លោក ស៊ីជិនពីង ក្នុងការពង្រឹងអំណាចនិងមហិច្ឆតាជាមេដឹកនាំរបស់លោក និងត្រូវបានចាត់ទុកថាជំនួបដ៏សំខាន់ជាងគេបំផុត នៃអាណត្តិដំបូងរបស់លោក។ ប៉ុន្តែនៅពីក្រោយផ្លាកនៃកិច្ចប្រជុំប្រចាំឆ្នាំបក្សលើកនេះ មានលាក់ការប្រយុទ្ធដើម្បីឥទ្ធិពល -ដើម្បីត្រួតត្រាក្បាលម៉ាស៊ីនកាន់អំណាចប្រទេសជាមហាអំណាចសេដ្ឋកិច្ចទីពីរនៅលើពិភពលោកផង។
តាំងពីឡើងកាន់អំណាចនៅចុងឆ្នាំ២០១២មក លោកស៊ីជីនពីង អគ្គលេខាធិការបក្សកុម្មុយនិស្ត និងជាប្រធានាធិបតី បានពង្រីកអំណាច នៅក្នុងជួរបក្សផង និងក្តាប់អំណាចដឹកនាំប្រទេសបានខ្លាំងជាងប្រមុខដឹកនាំចិន ម៉ៅ សេងទុង បិតាបង្កើតរបបសាធារណរដ្ឋចិនប្រជាមានិតនៅឆ្នាំ១៩៤៩ទៅទៀត។
លោក ស៊ីជិនពីង មានមហិច្ឆតាក្តោបអំណាចខ្លាំងណាស់ ខ្លាំងរហូតដល់ចេញបម្រាមមិនឱ្យនរណាធ្វើការរិះគន់ដោយគ្មានមូលដ្ឋានច្បាស់លាស់ឡើយ គឺមានតែលោកម្នាក់ និងតែម្នាក់ ឯងគត់ ដែលសិទ្ធិកំណត់ច្បាប់នយោបាយបក្ស ព្រោះលោកតួនាទីជាប្រធាន។
នៅក្នុងអង្គប្រជុំពេញអង្គនេះ ពិតជានឹងមានចរន្តអ្នកគាំទ្រលោកស៊ីជិនពីង និងក្រុមអ្នករងការគំរាមកំហែង ដោយយុទ្ធនាការប្រយុទ្ធប្រឆាំងនឹងអំពើពុករលួយរបស់លោកស៊ីជីនពីង ជាក់ជាមិនខាន។ លោកស៊ីធ្លាប់បានចេញវិធានការមួយចំនួនធំ ដើម្បីធានាថាមន្ត្រីជាន់ខ្ពស់បក្សពិតដើរតាមបន្ទាត់នយោបាយរបស់លោកយ៉ាងពិតៗ។ ក្រោយការបិទបញ្ចប់ គេនឹងដឹងបានថាតើលោកស៊ីជីនពីងត្រួតត្រាសមាជិកបក្សបានប៉ុណ្ណា?!
ព្រោះសូមកុំភ្លេចថា យុទ្ធនាការប្រយុទ្ធប្រឆាំងនឹងអំពើពុករលួយរបស់លោកស៊ី ជីនពីង តាំងពីដើមឆ្នាំ២០១៣មក បានទទួលលទ្ធផលច្រើន និងបានទទួលការស្វាគមន៍ពីសំណាក់មតិសាធារណៈ ចំពោះដាក់ទោសសមាជិកបក្សកុម្មុយនិស្តជាង មួយលាននាក់ ក្នុងនោះមានទាំងសមាជិកនិងថ្នាក់ដឹកនាំជាន់ខ្ពស់ ដូចយ៉ាងអតីតមេភ្នាក់ងារសន្តិសុខជាតិ។ ប៉ុន្តែសម្រាប់អ្នកប្រឆាំង យុទ្ធនាការនេះគឺជាឈ្នាន់នយោបាយក្នុងការកម្ចាត់ក្រុមប្រកួតប្រជែងក្នុងបក្ស និងបានធ្វើឱ្យលោកស៊ីជិនពីង ធ្លាក់ក្នុងភាពឯកា។
ដាក់ទោសក៏បានច្រើន តែនេះជាសញ្ញាបញ្ជាក់ថាអំពើពុករលួយបានស៊ីរូង មានទំហំនិងភាពធ្ងន់ធ្ងរខ្លាំងក្នុងផ្ទៃបក្សកុម្មុយនិស្ត ដែលប៉ះពាល់យ៉ាងខ្លាំង និងធ្វើឱ្យរបបកុម្មុយនិស្ត និងសមត្ថភាពដឹកនាំរបស់រដ្ឋាភិបាលចុះខ្សោយ។ កំណែទម្រង់បីឆ្នាំកន្លងមកនេះ ហាក់ដូចជាខ្លះគ្មានលទ្ធផល ដូច្នេះហើយបានជាលោកស៊ីជិនពីង ត្រូវការពឹងពាក់លើបក្សកុម្មុយនីស្ត ព្រោះមានតែបក្សកុម្មុយនិស្តនេះទេ ដែលអាចជួយលោកឱ្យសម្រេចផែនការធ្វើកំណែទម្រង់បាន។ លោកគ្មានទំនុកចិត្តលើសង្គម និងលើរដ្ឋទេ។
ហេតុដូច្នេះហើយបានជាជំនួបប្រជុំពេញអង្គឆ្នាំនេះ ត្រូវឧទ្ទិសទាំងស្រុងដល់ការកសាងបក្ស ដោយសាកល្បងដោះស្រាយវិបត្តិពុករលួយស៊ីរូងផ្ទៃក្នុង និងជំរុញឱ្យមេដឹកនាំជាន់ខ្ពស់បក្សដើម្បីធ្វើជាគំរូល្អ។ គេសង្ឃឹមថា នឹងមានការចេញប្រកាសវិធានផ្ទៃក្នុង ដូចជាការតម្រូវឱ្យសមាជិកបក្សធ្វើការប្រកាសទ្រព្យសម្បត្តិ។ល។ និង។ល។ នៅក្រោយកិច្ចប្រជុំបក្សបិទបញ្ចប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ