ថៃ៖រាជទាយាទមហាវជ្ជរាឡុងកនយាងចូលស្រុកក្នុងបរិបទស្រពេចស្រពិលជុំវិញថ្ងៃខែឡើងសោយរាជ្យ
នៅក្នុងប្រទេសថៃ រាជទាយាទមហាវជ្ជរាឡុងកនបានយាងចូលស្រុកវិញហើយនាថ្ងៃសុក្រ ទី១១ វិច្ឆិកា។ តែទោះជាយ៉ាងនេះក្តី ភាពស្រពេចស្រពិលកំពុងបន្តមានទាក់ទងនឹងថ្ងៃខែដែលព្រះអង្គត្រូវឡើងសោយរាជ្យ។ សូមជម្រាបជូនថា ក្រោយមរណភាពព្រះចៅភូមិបុល និងក្នុងពេលដែលព្រះអង្គម្ចាស់មហាវជ្ជរាឡុងកនសុំពេលពិចារណា របបសឹកបានជ្រើសតាំងលោកព្រេមទីនស៊ូឡាណុនដែលជាប្រធានក្រុមប្រឹក្សាព្រះមហាក្សត្រឲ្យកាន់តំណែងជាប្រមុខរដ្ឋស្តីទី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
មានព្រះជន្ម ៦៤ព្រះវស្សា ព្រះអង្គម្ចាស់មហាវជ្ជរាឡុងកនបានគង្គនៅក្នុងប្រទេសអាល្លឺម៉ង់ច្រើនជាងប្រទេសកំណើត។ ព្រះអង្គបានយាងចាកចេញពីប្រទេសថៃជាថ្មីកាលពីដំណាច់ខែតុលាកន្លងទៅ ពោល ២សប្តាហ៍ក្រោយការចូលទិវង្គតរបស់ព្រះបិតាព្រះចៅភូមិបុល។ តែប្រភពព្រះបរមរាជវាំងបានប្រាប់ឲ្យដឹងថា ព្រះអង្គម្ចាស់មហាវិជ្ជរាឡុងកននឹងត្រូវយាងចូលរួមនៅក្នុងកម្មវិធីជាច្រើននាប៉ុន្មានថ្ងៃមុខ។ កម្មវិធីនៅយប់ថ្ងៃសុក្រ ទី១១ វិច្ឆិកា ព្រះអង្គបានយាងចូលរួមនៅក្នុងពិធីរៀបចំដោយថ្នាក់ដឹកនាំរបសសឹក ហើយនាចុងសប្តាហ៍នេះ ព្រះអង្គយាងចែកសញ្ញាប័ត្រនៅក្នុងមហាវិទ្យាដ៏ល្បីមួយក្នុងទីក្រុងបាងកក។ បន្ទាប់មកនៅថ្ងៃចន្ទ ទី១៤ វិច្ឆិកាដើមសប្តាហ៍ក្រោយ ព្រះអង្គនឹងយាងទៅកាន់ប៉ែកខាងត្បូងដែលជាតំបន់បះបោរដោយក្រុមឧទ្ទាមទាមទារផ្តាច់ទឹកដីដើម្បីចូលរួមនៅក្នុងពិធីបុណ្យវប្បធម៌មួយ។
ទោះជាយ៉ាងណាក្តី ពាក្យចចាមអារ៉ាមជុំវិញការឡើងសោយរាជ្យរបស់ព្រះអង្គនាដើមខែធ្នូខាងមុខកំពុងបន្តស្រពិចស្រពិលដោយព្រះបរមរាជរាំងបន្តបដិសេធមិនទម្លាយឲ្យដឹងអ្វីទាំងអស់។ ប្រភពច្បាស់ការណ៍មួយពីព្រះបរមរាជវាំងបានបង្ហើបឲ្យដឹងថា ព្រះបរមរាជវាំងកំពុងរង់ចាំឯកសារផ្លូវការ តែប្រភពមិនបានប្រាប់ឲ្យដឹងទេថា តើអ្នកណាជាអ្នកប្រគល់ឯកសារផ្លូវការនោះ។ គួររម្លឹកជូនឡើងវិញថា នៅក្រោយការចូលទិវង្គតរបស់ព្រះចៅភូមិបុល របបសឹកបានប្រកាសពីការឡើងសោយរាជ្យបន្តរបស់ព្រះអង្គម្ចាស់វជ្ជរាឡុងកន។ តែព្រះអង្គបានធ្វើឲ្យគ្រប់គ្នាភា្ញក់ផ្អើលដោយប្រកាសសុំពេលពិចារណារហូតមកដល់ពេលនេះ។
ជាលើកទី១ ក្នុងប្រទេសថៃដែលរាជបល្ល័ង្កបាននៅទំនេរយ៉ាងយូរបែបនេះ ព្រោះកន្លងមក ការឡើងគ្រងរាជ្យរបស់ស្តេចថ្មីបានធ្វើឡើងតែប៉ុន្មានម៉ោងប៉ុណ្ណោះនៅក្រោយការចូលទិវង្គតរបស់ព្រះមហាក្សត្រ។ តែក្នុងរយៈពេលរង់ចាំការសម្រេចចិត្តរបស់ព្រះអង្គម្ចាស់មហាវិជ្ជរាឡុងកន របបសឹកក៏បានសម្រេចជ្រើសតាំងលោកព្រេមទីនស៊ូឡាណុនដែលជាប្រធានក្រុមប្រឹក្សាព្រះមហាក្សត្រឲ្យកាន់តំណែងជាប្រមុខរដ្ឋស្តីទី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ