ប្រជាជនថៃរាប់ម៉ឺននាក់នាំគ្នាតម្រង់ជួរទៅគោរពរាជសពស្តេច
នៅថ្ងៃសៅរ៍នេះ ប្រជាជនថៃរាប់ម៉ឺននាក់ នៅក្នុងសម្លៀកបំពាក់ខ្មៅកាន់ទុក្ខ បាននាំគ្នាឈរតម្រង់ជួរ នៅមុខព្រះបរមរាជវាំង ក្នុងក្រុងបាងកក ដើម្បីបានចូលទៅគោរពរាជសពព្រះចៅភូមិផុន អាឌុនយ៉ាដេត នៅក្នុងថ្ងៃទី១ ដែលអាជ្ញាធរបានបើកឲ្យមានឱកាសនេះ ចាប់តាំងពីព្រះអង្គសោយទិវង្គត កាលពីថ្ងៃទី១៣តុលាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ចាប់តាំងពីក្រោយពេលដែលព្រះចៅភូមិផុន អាឌុនយ៉ាដេត សោយទិវង្គត ប្រជាជនថៃរាប់ម៉ឺននាក់ តែងតែបានមកប្រមូលផ្តុំគ្នា នៅមុខព្រះបរមរាជវាំង ដើម្បីបង្ហាញការគោរពដល់ស្តេច ដែលពួកគេគោរពបូជាស្ទើរតែដូចព្រះ។ ក៏ប៉ុន្តែ នៅក្នុងរយៈពេល២សប្តាហ៍កន្លងទៅនេះ ពួកគេអាចចូលមកធ្វើការគោរពតែចំពោះព្រះឆាយាលក្ខណ៍របស់ព្រះអង្គតែប៉ុណ្ណោះ។
ទើបតែនៅថ្ងៃសៅរ៍នេះ ដែលពួកគេត្រូវបានអាជ្ញាធរបើកឱកាសឲ្យចូលទៅក្នុងបរិវេណនៃព្រះបរមរាជវាំង ដើម្បីអាចគោរពរាជសពដោយផ្ទាល់ ដែលតម្កល់នៅក្នុងប្រាសាទអមរិន្ទវិនិច្ឆ័យ (ប្រាសាទទេវាវិនិច្ឆ័យ)។
គួរបញ្ជាក់ថា កាលពីដំបូង អាជ្ញាធរថៃគ្រោងបើកឲ្យសាធារណជនតែ ១ម៉ឺននាក់ប៉ុណ្ណោះ ក្នុងមួយថ្ងៃ ដែលអាចចូលគោរពរាជសពបាន។ ក៏ប៉ុន្តែ គម្រោងការណ៍នេះត្រូវបានលុបចោលទៅវិញ នៅព្រឹកថ្ងៃសៅរ៍នេះ ក្រោយពីគេបានឃើញមនុស្សដែលមកឈរចាំចូលក្នុងវាំងមានរហូតដល់ទៅប្រមាណជា ១០ម៉ឺននាក់។ ក្នុងចំណោមនោះ មានអ្នកខ្លះ ធ្វើដំណើរមកតាំងពីតាមបណ្តាខេត្តឆ្ងាយៗ ដើម្បីបានមកគោរពរាជសពស្តេចជាទីគោរពរបស់ពួកគេជាលើកចុងក្រោយ។
ដោយមើលឃើញចំនួនមនុស្សដ៏ច្រើនសន្ធឹកសន្ធាប់បែបនេះ លោក សានសឺន កែវកំណើត មន្រ្តីអ្នកនាំពាក្យរបបសឹកថៃ បានអំពាវនាវដល់សាធារណជនទាំងអស់ កុំឲ្យសម្រុកមកព្រះបរមរាជវាំងព្រមៗគ្នា នៅក្នុងរយៈពេលប៉ុន្មានថ្ងៃដំបូងនេះ ដោយបានរំឭកឡើងវិញថា ទ្វារព្រះបរមរាជវាំងនឹងបើកចំហទទួលសាធារណជន នៅក្នុងរយៈពេលយូរទៅខាងមុខទៀត។
គួរបញ្ជាក់ថា រដ្ឋាភិបាលថៃបានកំណត់រយៈពេលកាន់ទុក្ខព្រះចៅភូមិផុន អាឌុនយ៉ាដេត រហូតដល់ទៅមួយឆ្នាំ ហើយការបូជារាជសពនឹងត្រូវធ្វើនៅក្រោយផុតរយៈពេលកាន់ទុក្ខនេះ។ ព្រះអង្គម្ចាស់មហា វជិរ៉ាឡុងកន ដែលជារាជទាយាទត្រូវឡើងមកស្នងរាជ្យ ក៏បានប្រកាសឲ្យដឹងដែរថា ព្រះអង្គនឹងរង់ចាំរហូតដល់ក្រោយពេលដែលបូជាសពរាជបិតាហើយ ទើបព្រះអង្គឡើងមកគ្រងរាជ្យជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ