ហ្វីលីពីន៖ក្តីបារម្ភបានកើតមានឡើងទាក់ទងនឹងសុខភាពរបស់លោកឌុយទែរតេ
នៅក្នុងប្រទេសហ្វីលីពីន ក្រុមសមាជិកសភាបានស្នើឲ្យលោកប្រធានាធិបតីឌុយទែរតេទៅពិនិត្យសុខភាព។ សំណើរបស់ក្រុមអ្នកតំណាងរាស្រ្តនេះបានធ្វើឡើង បន្ទាប់ពីលោកឌុយទែរតេខ្លួនឯងបានទទួលសារភាពថា លោកធ្លាប់បានប្រើថ្នាំ fentanyl ដើម្បីបំបាត់ការចុកចាប់។ គឺការឆ្លើយសារភាពរបស់លោកឌុយទែរតេនេះហើយបានជាបំផុសឲ្យមានក្តីបារម្ភទាក់ទងនឹងបញ្ហាសុខភាពរបស់លោក។
ចុះផ្សាយនៅថ្ងៃ៖
ស្តាប់ - ០២:១៦
គឺនៅថ្ងៃចន្ទ ទី១២ ធ្នូកន្លងទៅដែលលោកប្រធានាធិបតីហ្វីលីពីនឌុយទែរតេបានទម្លាយឲ្យដឹងថា លោកធ្លាប់បានប្រើថ្នាំ fentanyl នៅក្នុងអតីតកាល។ គឺជាថ្នាំដ៏មានឥទ្ធិពលខ្លាំងសម្រាប់បំបាត់ការចុកចាប់ តែជាទូទៅ វេជ្ជបណ្ឌិតក៏បានចេញវេជ្ជបញ្ជាឲ្យប្រើថ្នាំ fenta nyl ក្នុងករណីជម្ងឺមហារីក និងជម្ងឺប្រចាំកាយផ្សេងទៀតដែរ។ លោកឌុយទែរតេបានអះអាងថា លោកបានប្រើថ្នាំ fentanyl ដើម្បីបំបាត់ឈឺខ្នងដោយសារជួបគ្រោះថ្នាក់ដួលម៉ូតូ។ តាមលោកឌុយទែរតេ គ្រូពេទ្យបានប្រាប់ឲ្យលោកឈប់ប្រើថ្នាំនេះដោយសារតែលោកបានប្រើវាច្រើនហួសកម្រិតដែលអនុញ្ញាត។
ការឆ្លើយសារភាពរបស់លោកឌុយទែរតេបានបំផុសឲ្យមានពាក្យចចាមអារ៉ាមមកដល់សព្វថ្ងៃទាក់ទងនឹងស្ថានភាពសុខភាពរបស់លោកឌុយទែរតេ។ នៅក្នុងសម័យយុទ្ធនាការឃោសនាបោះឆ្នោត ពាក្យចចាមអារ៉ាមមួយនេះធ្លាប់បានបែកធ្លាយម្តងហើយ តែលោកឌុយទែរតេបានចេញមុខបដិសេធជាច្រើនដង។ តែក្រុមអ្នកតំណាងរាស្រ្តបានយល់ឃើញថា ដើម្បីអាចជម្រះភាពមន្ទិលសង្ស័យទាំងនេះបាន លោកឌុយទែរតេគួរតែទៅពិនិត្យសុខភាព ហើយគ្រូពេទ្យរបស់លោកត្រូវចេញមុខបំភ្លឺថា តើលោកឌុយទែរតេបានប្រើថ្នាំអ្វីខ្លះដើម្បីបំបាត់ការចុកចាប់។
លោកស្រី ឡីឡា ដឺលីម៉ា សមាជិកព្រឹទ្ធសភាមកពីគណបក្សប្រឆាំងបានអះអាងថា អ្វីដែលគួរឲ្យបារម្ភនោះ មិនមែនត្រឹមតែជម្ងឺរបស់លោកឌុយទែរតេមួយទេ តែក៏មានប្រតិកម្មចេញពីថ្នាំដែលលោកឌុយទែរតេកំពុងប្រើ ព្រមទាំងផលវិបាករបស់ថ្នាំនោះផងដែរ។ គួរជម្រាបជូនថា មានអាយុ ៧១ឆ្នាំ លោកឌុយទែរតេជាប្រធានាធិបតីហ្វីលីពីនដែលមានអាយុច្រើនជាងប្រធានាធិបតីមុនៗ ហើយរូបលោកក៏ធ្លាប់បានប្រាប់ឲ្យដឹងពីវត្តមានជម្ងឺប្រចាំកាយផ្សេងៗ។ នៅពេលដែលលោកអាក់ខានមិនអាចទៅចូលរួមនៅក្នុងកិច្ចប្រជុំអន្តរជាតិណាមួយ លោកតែងតែលើកឡើងពីករណីសុខភាព។
តើលោកឌុយទែរតេអាចនឹងបញ្ចប់អាណត្តិជាផ្លូវការរយៈពេល ៦ឆ្នាំពេញលេញដែរ ឬទេ?។ លោកបានថ្លែងសារភាពនាឱកាសទស្សនកិច្ចក្នុងប្រទេសកម្ពុជានៅសប្តាហ៍កន្លងទៅថា លោកអាចនឹងគ្មានលទ្ធភាពដើម្បីកាន់តំណែងរហូតចប់អាណត្តិរយៈពេល ៦ឆ្នាំផងក៏មិនដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ