ប៉េកាំងត្រៀមផ្តល់អាវុធឲ្យទីក្រុងម៉ានីលដើម្បីប្រយុទ្ធប្រឆាំងនឹងការជួញដូរគ្រឿងញាន
ឯកអគ្គរដ្ឋទូតចិនប្រចាំទីក្រុងម៉ានីល ថ្លែងបញ្ជាក់កាលពីម្សិលមិញ ថាប្រទេសចិនបានត្រៀមខ្លួនផ្តល់អាវុធដល់ប្រទេសហ្វីលីពីនដើម្បីជួយលោក Duterte ប្រធានាធិបតីថ្មីហ្វីលីពីននៅក្នុងសង្គ្រាមប្រយុទ្ធប្រឆាំងទល់នឹងអំពើឧក្រឹដ្ឋកម្ម។
ចុះផ្សាយនៅថ្ងៃ៖
ស្តាប់ - ០២:១៧
នៅចំពោះមុខអ្នកសាព័ត៌មាន ឯកអគ្គរដ្ឋទូតចិនប្រចាំទីក្រុងម៉ានីល បានថ្លែងបញ្ជាក់កាលពីយប់ថ្ងៃចន្ទមុន លើសេចក្តីថ្លែងការណ៍របស់លោកប្រធានាធិតបតីហ្វីលីពីន Duterte ដែលថាទីក្រុងប៉េកាំង បានត្រៀមរួចហើយដើម្បីជួយផ្តល់អាវុធឲ្យដល់ប្រទេសហ្វីលីពីន។ រីឯប៉េកាំង ក៏បានគិតគូរួចរាល់ហើយអំពីលទ្ធភាពលើការផ្គត់ផ្គង់អាវុធដល់ទីក្រុងម៉ានីលដើម្បីធ្វើការប្រយុទ្ធប្រឆាំងទល់នឹងអំពើឧក្រឹដ្ឋកម្ម។
ម្យ៉ាងទៀត ទីក្រុងប៉េកាំង ក៏បានប្រកាសគាំទ្រលោក Duterteនៅក្នុងយុទ្ធនាការរបស់លោកដើម្បីប្រយុទ្ធប្រឆាំងការជួញដូរគ្រឿងញាន-យុទ្ធនាការដែលបានសម្លាប់មនុស្សអស់ជាង៥០០០នាក់និងជំរុញឲ្យមានការទិះតៀនរិះគន់យ៉ាងខ្លាំងក្លាពីសំណាក់អង្គការការពារសិទ្ធមនុស្សនិងអ.ស.ប.។
គួររំលឹកថា ចាប់តាំងពីលោក Duterte ចូលកាន់មុខតំណែងជាប្រធានាធិបតីហ្វីលីពីននៅថ្ងៃទី៣០មិថុនាមុនមក ជនជាង ២០០០នាក់ត្រូវបានប៉ូលីសបាញ់សម្លាប់ ហើយជនរងគ្រោះ៣០០០នាក់ផ្សេងទៀត ត្រូវបានក្រុមជនមិនស្គាល់មុខកាប់សម្លាប់។
ទោះបីជារងនូវការបរិហារពីសំណាក់អង្គការការពារសិទ្ធមនុស្សនិងអ.ស.ប.យ៉ាងណាក្តី លោក Duterte នៅចំពោះមុខក្រុមពាណិជ្ចករ បាននិយាយអួតអាងដោយមូតនភាព ថាខ្លួនលោកផ្ទាល់ក្នុងពេលធ្វើជាចៅហ្វាយក្រុងDavao ក៏ធ្លាប់បានសម្លាប់ជនសង្ស័យអស់ជាច្រើនរូបដែរដើម្បីបង្ហាញជាគំរូនិងលើកទឹកចិត្តដល់ក្រុមប៉ូលីសនៅក្នុងយុទ្ធនាការប្រយុទ្ធប្រឆាំងការជួញដូរគ្រឿងញាន។
ក្នុងជំនាន់នោះ ក្រុមអ្នកការពារសិទ្ធិមនុស្ស បានបរិហារថា លោក Duterte បានរៀបចំឲ្យមានក្រុមឃាតករនៅក្រុង Davao -ក្រុមឃាតករដែលបានធ្វើការកាប់សម្លាប់ជនជាង១០០០នាក់។
ឆ្លើយតបនឹងការទិះតៀនរិះគន់របស់សហគមន៍អន្តរជាតិ ប្រធានាធិបតីថ្មីរបស់ប្រទេសហ្វីលីពីន បានថ្លែងសារជាថ្មីម្តងទៀតថា”លោកពុំមានចេតនាចង់បិទបញ្ចប់នយោបាយរបស់លោកឡើយ ពីព្រោះវាពុំមែនជាការរំលោភច្បាប់ណាមួយឡើយ ដោយហេតុថា ប៉ូលីសហ្វីលីពីន បានធ្វើសកម្មភាពក៏ដើម្បីការពារជាតិឯងតែប៉ុណ្ណោះ។ រីឯចំនួនមនុស្សជាច្រើនដែលត្រូវបានគេសម្លាប់នោះ គឺគ្រាន់តែជាបញ្ហាសងសឹកគ្នារវាងក្រុមបនឧក្រឹដ្ឋជនតែប៉ុណ្ណោះ-នេះជាការគូសបញ្ជាក់របស់ប្រធានាធិបតីហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ