អង្គការសហប្រជាជាតិបរិហារភូមាថាប្រព្រឹត្តឧក្រិដ្ឋកម្មប្រឆាំងមនុស្សជាតិលើរ៉ូហ៊ីងយ៉ា
រំលោភ ធ្វើឃាតកុមារ ចាប់ជំរិត ... ទង្វើរបស់ទាហានភូមាប្រឆាំងនឹងជនជាតិរ៉ូហ៊ីងយ៉ា នៅភាគខាងជើងរដ្ឋអារ៉ាខាន មានទម្រង់ជាឧក្រិដ្ឋកម្មប្រឆាំងនឹងមនុស្សជាតិ។ នេះបើតាមសេចក្តីសន្និដ្ឋានរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ដែលទើបចេញផ្សាយរបាយការណ៍របស់ខ្លួននៅល្ងាចថ្ងៃ ទី៣កុម្ភៈ ២០១៧។
ចុះផ្សាយនៅថ្ងៃ៖
ស្តាប់ - ០១:៣០
សម្រាប់អង្គការសហប្រជាជាតិ យុទ្ធនាការរបស់ពួកយោធាភូមា ប្រឆាំងនឹងសហគមន៍ជនជាតិភាគតិចរ៉ូហ៊ីងយ៉ា កាន់សាសនាអ៊ីស្លាម កាលពីខែតុលាកន្លងទៅនៅតំបន់ព្រំដែនខាងជើងប្រទេស ទំនងជាបានធ្វើមានមនុស្សស្លាប់អស់ជាច្រើនរយនាក់ ក្នុងរយៈពេលតែប្រមាណបួនខែ។ ឧត្តមស្នងការការពារសិទ្ធិមនុស្សរបស់អង្គការសហប្រជាជាតិ បានអំពាវនាវឱ្យអាជ្ញាធរបញ្ជប់ជាបន្ទាន់ នយោបាយសាបព្រោះអំពើឃោរឃៅនេះ។
ពលរដ្ឋប្រមាណ ៦៦០០០នាក់ បានរត់គេចទៅបង់ក្លាដែសជិតខាង បន្ថែមពីលើជនជាតិរ៉ូហ៊ីងយ៉ាជាង២២០០០នាក់ ដែលត្រូវភៀសខ្លួនក្នុងផ្ទៃប្រទេសភូមា ដើម្បីគេចពីការធ្វើទុក្ខបុកម្នេញរបស់ទាហានភូមា។ អង្គការសហប្រជាជាតិ បានប្រមូលភស្តុតាង និងសក្ខីកម្ម របស់ជនរ៉ូហ៊ីងយ៉ានៅបង់ក្លាដែស ជាលក្ខណៈបុគ្គលបានជាង២០០នាក់ គិតចាប់តាំងពីខែតុលាមក។ នេះបើតាមមេដឹកនាំបេសកកម្មនៅភូមានៃឧត្តមស្នងការអង្គការសិទ្ធិមនុស្សអង្គការសហប្រជាជាតិ លោកស្រី Linnea Arvidsson។
បើតាមប្រសាសន៍លោកស្រីដដែល សក្ខីកម្មរបស់ពួកគេអាចផ្ទៀងផ្ទាត់ និងមើលឃើញតាមរយៈការវិភាគរូបភាពផ្កាយរណបរបស់អង្គការសហប្រជាជាតិ។ ចុះតើនរណាជាអ្នកប្រព្រឹត្តអំពើអមនុស្សធម៌នេះ ?! ចម្លើយរបស់លោកស្រី គឺទាហានភូមា ព្រមទាំងប៉ូលិសការពារព្រំដែន និងប៉ូលិសធម្មតា។ ដូច្នេះមានន័យថាមានកងកម្លាំងរក្សាសន្តិសុខភូមាបីប្រភេទ ដែលបានលូកលាន់ក្នុងប្រតិបត្តិការបោសសម្អាតជនជាតិរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ