មន្រ្តី អ.ស.បចុះស៊ើបអង្កេតករណីរំលោភសិទ្ធិជនជាតិរ៉ូហ៊ីងយ៉ានៅភូមា
អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំ នៅភូមា នៅថ្ងៃសុក្រ ទី ១៣មករា បានធ្វើដំណើរ ទៅដល់រដ្ឋរាគីន ជាទីដែលលោកស្រីផ្តើមស៊ើបអង្កេតករណីរំលោភសិទ្ធិជនជាតិរ៉ូហ៊ីងយ៉ា ប្រព្រឹត្តដោយក្រុមទាហានភូមា។ លោកស្រីលី យ៉ង់ហេ ត្រូវបំពេញទស្សនកិច្ចរយៈពេល ១២ថ្ងៃ នៅប្រទេសភូមា ដើម្បីស៊ើបអង្កេតទៅលើអំពើហិង្សាដែលបានផ្ទុះឡើង នៅប៉ុន្មានខែចុងក្រោយនេះ និងដែលមានជនជាតិភាគតិច រ៉ូហ៊ីងយ៉ាទទួលរងគ្រោះ ធ្ងន់ធ្ងរជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
អ្នករាយការណ៍ពិសេសរបស់អង្គការសហប្រជាជាតិបានធ្វើដំណើរទៅដល់រដ្ឋរ៉ាគីន ប៉ែកខាងលិចភូមា បន្ទាប់ពីមានបណ្តឹង និងព័ត៌មានស្តីពីការរំលោភសិទ្ធិមនុស្សដ៏ធ្ងន់ធ្ងរទៅលើជនជាតិភាគតិច នៅក្នុងរដ្ឋជាប់ព្រំដែនប្រទេសបង់ក្លាដែស។ តាំងពីខែតុលាឆ្នាំមុន យោធាភូមាបានចុះទៅបង្រ្កាប នៅតំបន់ភាគខាងជើងរដ្ឋរ៉ាគីន ដែលបើតាមអង្គការសហប្រជាជាតិ បានបណ្តាលឲ្យមនុស្សជាង ៦ម៉ឺននាក់ រត់ភៀសខ្លួន ទៅក្នុងប្រទេសបង់ក្លាដែស។ ជនភៀសខ្លួនបានរៀបរាប់ពីការធ្វើទុក្ខបុកម្នេញ របស់ទាហានភូមា ដែលបានដុតផ្ទះសម្បែង ចាប់រំលោភផ្លូវភេទ និងបាញ់សម្លាប់ក្រៅផ្លូវច្បាប់ ទៅលើជនជាតិភាគតិចរ៉ូហ៊ីងយ៉ា។
រដ្ឋាភិបាលភូមារបស់លោកស្រីអ៊ុងសាន ស៊ូជីបានបដិសេធការចោទប្រកាន់ និងអះអាងទៅវិញ ថា នៅរ៉ាគីន ក្រុមយោធាបានបើកប្រតិបត្តិការបោសសម្អាត ក្រុមជនបះបោរ ដែលបានវាយប្រហារទៅលើប៉ុស្តច្រកពិនិត្យរបស់ប៉ូលិសនៅព្រំដែន។
នៅថ្ងៃ សុក្រ នៅពេលទៅដល់រដ្ឋរ៉ាគីន លោកស្រី អ្នករាយការណ៍ពិសេសរបស់អង្គការសហប្រជាជាតិបានចូលជួប ពិភាក្សាជាមួយតំណាងគណបក្សកាន់អំណាច ប៉ុន្តែ ផ្ទុយទៅវិញ លោកស្រីត្រូវបានមន្រ្តីគណបក្សជាតិ អារ៉ាកាន ដែលមានសំឡេងគាំទ្រផ្តាច់មុខ នៅរ៉ាគីន បដិសេធមិនឲ្យចូលជួប។ គណបក្សជាតិអារ៉ាកាន ធ្លាប់បានប្រឆាំងដាច់ខាត មិនឲ្យគេផ្តល់សញ្ជាតិភូមាដល់ជនជាតិរ៉ូហ៊ីងយ៉ា នៅរដ្ឋរ៉ាគីន។ នៅឆ្នាំ ២០១២ រដ្ឋរ៉ាគីនធ្លាប់ជាកន្លែងដែលផ្ទុះកើតដំបូងនៃជម្លោះហិង្សារវាងសហគមន៍អ្នកកាន់ពុទ្ធសាសនា និងក្រុមជនជាតិភាគតិច រ៉ូហ៊ីងយ៉ា ដែលកាន់សាសនាអ៊ីស្លាម។
អ្នករាយការណ៍ពិសេសរបស់អង្គការសហប្រជាជាតិ លោកស្រីលី យ៉ង់ហេ ផ្ទាល់ធ្លាប់ត្រូវបានមេដឹកនាំសង្ឃភូមា គំរាមសម្លាប់ និង ជេរប្រមាថ ថា ជាស្រីលក់ខ្លួន បន្ទាប់ពីលោកស្រីបានរិះគន់រដ្ឋាភិបាលភូមា ថា បានបណ្តោយឲ្យជនជាតិ ភាគតិចរ៉ូហ៊ីងយ៉ារស់នៅក្នុងភាពក្រីក្រ និងរងការបង្រ្កាបហិង្សាពីសំណាក់អាជ្ញាធរ។
រឿងធ្វើទុក្ខបុកម្នេញលើជនជាតិរ៉ូហ៊ីងយ៉ា ដែលកាន់សាសនាអ៊ីស្លាមបានបណ្តាលឲ្យមានប្រតិកម្មរិះគន់ពីអង្គការការពារសិទ្ធមនុស្ស និងសហគមន៍អន្តរជាតិ។ រដ្ឋាភិបាលម៉ាឡេស៊ី ធ្លាប់បានអំពាវនាវឲ្យលោកស្រីអ៊ុងសាន ស៊ូជីអន្តរាគម បញ្ឈប់អំពើហិង្សាទៅលើជនជាតិរ៉ូហ៊ីងយ៉ា។ នៅសប្តាហ៍ក្រោយ ម៉ាឡេស៊ី ដែលកាន់សាសនាអ៊ីស្លាមនឹងធ្វើជាម្ចាស់ផ្ទះ បើកកិច្ចប្រជុំថ្នាក់រដ្ឋមន្រ្តីការបរទេស របស់បណ្តាប្រទេសអ៊ីស្លាម ដើម្បីនិយាយពីវិបត្តិជនភៀសខ្លួន រ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ