វត្តមានដ៏ចម្រូងចម្រាសរបស់ចិន ក្នុងសិក្ខាសាលាវេជ្ជសាស្ត្រនៅវ៉ាទីកង់
នៅថ្ងៃអង្គារនេះ បុរីវ៉ាទីកង់ បានបើកសិក្ខាសាលាអន្តរជាតិស្តីពីការជួញដូរសរីរាង្គ ដោយបានអញ្ជើញតំណាងភាគីចិន ចូលរួមផង។ ប៉ុន្តែវត្តមានរបស់ចិន បានបំផុសឱ្យមានការរិះគន់យ៉ាងខ្លាំងពីសំណាក់អ្នកឯកទេសវេជ្ជសាស្ត្រ ព្រោះពួកគេយល់ថាចិននៅតែបន្តប្រព្រឹត្តការជួញដូរសរីរាង្គ។
ចុះផ្សាយនៅថ្ងៃ៖
ស្តាប់ - ០២:១៧
អតីតអនុរដ្ឋមន្ត្រីក្រសួងសុខាភិបាលចិន និងជាប្រធានគណៈកម្មការផ្តល់អំណោយសរីរាង្គចិន ត្រូវបានអញ្ជើញឱ្យឡើងបញ្ចេញមតិនៅថ្ងៃអង្គារទី ៧ កុម្ភៈនេះ ទៅកាន់អង្គសិក្ខាសាលាអន្តរជាតិ ស្តីពីការជួញដូរសរីរាង្គ នៅបុរីវ៉ាទីកង់។ តំណាងភាគីចិន បានអះអាងថា ប្រទេសចិនធំ មានប្រជាជនច្រើន វាអាចមានការរំលោភច្បាប់ តែអាជ្ញាធរប៉េកាំង មិនអនុគ្រោះទាល់តែសោះ និងដាក់ទោសយ៉ាងធ្ងន់ធ្ងរបំផុត លើរាល់គ្រប់ទម្រង់នៃការជួញដូរសរីរាង្គ។
ប៉ុន្តែអំណះអំណាងចិន មិនបានធ្វើឱ្យពិភពលោកអ្នកវេជ្ជសាស្ត្រស្ងប់ចិត្តទេ។ អ្នកឯកទេសជាតិអូស្ត្រាលី និងជាប្រធានគណៈកម្មការប្រយុទ្ធប្រឆាំងនឹងការជួញដូរសរីរាង្គនៅចិន បានចាត់ទុកវត្តមានរបស់ចិនថ្ងៃនេះ ថារំខានបំផុត។ អ្នកឯកទេសផ្សេងទៀត ក្នុងនោះម្នាក់ជាគ្រូពេទ្យវះកាត់ចិនផង បានសរសេរលិខិតមួយ ប្រាប់អំពីភាពអាសន្នឃើញវត្តមានចិននៅក្នុងសិក្ខាសាលាទៅកាន់រាជបណ្ឌិតសភាវ៉ាទីកង់ថា ទោះបីអង្គការអន្តរជាតិអញ្ជើញដោយប្រយោលក្តី ក៏ចិនអាចប្រើជាប្រយោជន៍សម្រាប់បំប៉ោងឃោសនា លម្អប្រព័ន្ធកាត់ប្តូរសរីរាង្គរបស់ខ្លួនបានដែរ។
ជាចម្លើយតប វ៉ាទីកង់បានពន្យល់បំភ្លឺថាអញ្ជើញចិនក្នុងនាមជាសមាជិកអង្គការសុខភាពពិភពលោក មិនមែនក្នុងន័យនយោបាយនិងសាសនាទេ។
សូមបញ្ជាក់ថាចិននិងវ៉ាទីកង់ គ្មានទំនាក់ទំនងការទូតនឹងគ្នាតាំងពីឆ្នាំ១៩៥១មក ប៉ុន្តែបុរីវ៉ាទីកង់របស់សម្តេចប៉ាប ហ្វ្រង់ស័រ បានប្រឹងខិតទៅរករដ្ឋាភិបាលប៉េកាំង ដោយសង្ឃឹមថានឹងអាចភ្ជាប់ខ្លួនទៅនឹងពលរដ្ឋចិនកាន់សាសនាគ្រិស្តជាង១២លាននាក់។ សម្តេចប៉ាប ហ្វ្រង់ស័រ ក៏ធ្លាប់បរិហារឥតដាច់ ការជួញដូរសរីរាង្គ ដោយចាត់ទុកជំនួញមួយនេះ ថាទាសភាពបែបថ្មី។ នៅក្នុងរបាយការណ៍មួយ ចុះផ្សាយការពីកក្កដា២០១៦ បានប៉ាន់ស្មានថា មានការវះកាត់ប្តូរសរីរាង្គ ប្រមាណពី ៦ម៉ឺន ទៅ១០ម៉ឺនករណីក្នុងមួយឆ្នាំៗ ហើយភាគច្រើនដោយខុសច្បាប់។
នៅក្នុងប្រពៃណីចិន ទោះស្លាប់ទៅក៏ត្រូវមានគ្រប់សរីរាង្គទាំងអស់ ! ដូច្នេះកម្រមានអ្នកធ្វើអំណោយណាស់។ ការប្តូរសរីរាង្គ ច្រើនតែមកពីអ្នកទោសប្រហារជីវិត ដោយគ្មានការអនុញ្ញាតពីក្រុមគ្រួសារនិងសាមីជនទេ! ជាផ្លូវការ អាជ្ញាធរចិនលែងធ្វើបែបនេះតាំងពីខែមករា ២០១៥មក តែការសង្ស័យនៅតែមិនអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ