ឃាតកម្មលើបងប្រុសរបស់គីមជុងអ៊ុន ក្លាយជាសម្ពាធរវាងកូរ៉េខាងជើង និងម៉ាឡេស៊ី
ចុះផ្សាយនៅថ្ងៃ៖
ស្តាប់ - ០៥:៤៧
នៅថ្ងៃសៅរ៍នេះ ប៉ូលិសម៉ាឡេស៊ី បានប្រកាសចាប់បុរសជាតិកូរ៉េខាងជើងម្នាក់ក្នុងក្របខ័ណ្ឌអង្កេតលើឃាតកម្មសម្លាប់ លោក គីម ជុងណាម បងប្រុសបង្កើតម្តាយទីទៃរបស់ប្រមុខដឹកនាំកូរ៉េខាងជើងគីម ជុនអ៊ុន។ នេះជាការចាប់ខ្លួនជនទីបួនហើយ។ ហើយក៏ជាលើកទីមួយដែរ គិតចាប់តាំងពីមានហេតុការណ៍ឃាតកម្មនៅក្រុងកូឡាឡាំពួរមក ដែលប្រមុខការទូតកូរ៉េខាងជើងបានបញ្ចេញប្រតិកម្មផ្លូវការ។ សម្ពាធតានតឹងរវាងកូរ៉េខាងជើង និងម៉ាឡេស៊ី បានឡើងតានតឹងមិនធ្លាប់មានទេ។
ជនសង្ស័យទីបួន ត្រូវបានចាប់ខ្លួន កាលពីយប់ថ្ងៃសុក្រម្សិលមិញ ដោយមានជាប់នឹងខ្លួននូវឯកសារដែលម៉ាឡេស៊ីផ្តល់ឱ្យក្នុងនាមជាពលករបរទេស។ គឺតាមរយៈក្រដាសនោះហើយទើបគេអាចកំណត់សញ្ញាណបានថា ជាពលករកូរ៉េខាងជើង អាយុ ៤៦ឆ្នាំ មានឈ្មោះថា រី ចុង ចល។ ប៉ូលិសក៏បានផ្តើមចោទសួរជនសង្ស័យចាប់បានពីរនាក់ដំបូង ៖ ស្រ្តីម្នាក់ដំបូងកាន់លិខិតឆ្លងដែនវៀតណាម (២៨ឆ្នាំ) និងស្ត្រីម្នាក់ទៀត កាន់លិខិតឆ្លងដែនឥណ្ឌូណេស៊ី (២៥ឆ្នាំ) ព្រមទាំងមិត្តរបស់របស់នាង ជាជនជាតិម៉ាឡេស៊ី អាយុ២៦ឆ្នាំ។
បើតាមមេប៉ូលិសឥណ្ឌូណេស៊ី ថ្លែងទៅកាន់សារព័ត៌មានឥណ្ឌូណេស៊ី មានជនមិនស្គាល់មុខបានមកព្រលួងនាងឥណ្ឌូណេស៊ី ឱ្យជឿថាកំពុងលេងល្បែងកំប្លែងទូរទស្សន៍ បែបកាមេរ៉ាលួចថត ដោយត្រូវជះវត្ថុរាវទៅលើជនរងគ្រោះ។ នាងមិនបានដឹងសោះឡើយថាជាប៉ុនប៉ងធ្វើឃាតកម្ម។
ចំពោះច្បាប់និងប៉ូលិសនៅម៉ាឡេស៊ីវិញ ដែលមានកាតព្វកិច្ចវែករកពន្លឺដើមហេតុនៃឃាតកម្មដ៏អស្ចារ្យនេះវិញ បានផ្តើមធ្វើវិភាគកោសល្យវិច័យ លើរូបសាកសព លោក គីម ជុងណាម អាយុ៤៥ឆ្នាំនេះហើយ ដើម្បីកំណត់ថាតើសារធាតុពុលដែលគេយកមកជះលើមុខគាត់ ជាសារធាតុពុលអ្វី ?!
ម្យ៉ាងវិញទៀត ម៉ាឡេស៊ី ត្រូវការធ្វើវិភាគADN សាកសព ដើម្បីឱ្យប្រាកដថា តើអ្នកស្លាប់ពិតជា គីម ជុងណាមមែនឬយ៉ាងណា។ ប៉ុន្តែរហូតមកទល់នឹងម៉ោងនេះ ពេលនេះគ្មានសមាជិកក្រុមគ្រួសារណាម្នាក់ ឬមនុស្សស្និទ្ធណាម្នាក់ មកបញ្ជាក់អត្តសញ្ញាណ ឬទាមទារសាកសពទេ។ ដូច្នេះអាជ្ញាធរម៉ាឡេស៊ី ក៏គ្មានអេសង់ទីយ៉ុង អាដេអិន សម្រាប់មកផ្ទៀងផ្ទាត់អត្តសញ្ញាណពិតរបស់អ្នកស្លាប់ដែរ។
ឃាតកម្មបង្កើតសម្ពាធ រវាងកូរ៉េខាងជើង ម៉ាឡេស៊ី
កូរ៉េខាងជើង និងម៉ាឡេស៊ី មានទំនាក់ទំនងដ៏រលូន និងស្និទ្ធស្នាលនឹងគ្នា។ ពលរដ្ឋប្រទេសទាំងពីរនេះអាចធ្វើដំណើរទៅមកកូរ៉េខាងជើង- ម៉ាឡេស៊ី ដោយគ្មានចាំបាច់សុំទិដ្ឋាការឡើយ។ វាគឺជាករណីដ៏កម្របំផុតសម្រាប់ពលរដ្ឋកូរ៉េខាងជើង ដែលល្បីថាប្រទេសឯកា បំផុតមួយលើលោកនោះ។
ម៉ាឡេស៊ីធ្លាប់ធ្វើជាម្ចាស់ផ្ទះម្តងជាពីរដង ទទួលឱ្យមានជំនួបក្រៅផ្លូវការ រវាងកូរ៉េខាងជើង ជាមួយអាមេរិក ក្នុងសំណុំរឿងចរចានុយក្លេអ៊ែរ ជាក់ស្តែងគឺជាជំនួបកាលពីថ្មីៗ រវាងភាគីព្យុងយ៉ាងនិងវ៉ាស៊ីនតោន ដោយបិទទ្វារ នៅក្រុងកូឡាឡាំពួរ កាលពីខែតុលាឆ្នាំ២០១៦។
ក៏ប៉ុន្តែសម្ពាធហាក់ផ្តើមប៉ោងឡើង នៅល្ងាចមិញ។ ឯកអគ្គរដ្ឋទូតកូរ៉េខាងជើង ប្រចាំក្រុងកូឡាឡាំពួ លោក កង់ ចូល បានដំឡើងសំឡេង តាមសេចក្តីថ្លែងការណ៍មួយទៅកាន់អ្នកសារព័ត៌មាន ពីទីតម្កល់សពលោក គីម ជុងណាម ថា កូរ៉េខាងជើង ច្រានចោលទាំងស្រុង មិនទទួលស្គាល់លទ្ធផលនៃការធ្វើកោសល្យវិច័យលើសាកសព ដែលម៉ាឡេស៊ីសម្រេចធ្វើ ដោយគ្មានការព្រមព្រៀង និងគ្មានវត្តមានរបស់កូរ៉េខាងជើងឡើយ។ មិនតែប៉ុណ្ណោះ លោក កង់ ចូល បានបញ្ជាក់បន្ថែមទៀត ថាបានស្នើសុំហើយសុំទៀត យកសាកសពនោះទៅប្រទេសកូរ៉េខាងជើងវិញ តែប៉ូលិសម៉ាឡេស៊ីបដិសេធ។
នេះគឺជាលើកទីមួយហើយ គិតចាប់ពីហេតុការណ៍ឃាតកម្មបានកើតឡើង ដែលប្រមុខការទូតកូរ៉េខាងជើងបានចេញមុខបញ្ចេញប្រតិកម្មជាផ្លូវការ និងជាសាធារណៈបែបព្រមទាំង បានរាលដាល ដោយប្រើពាក្យបញ្ឆិតបញ្ឆៀងថា នេះគឺដោយសារតែមានមនុស្សអាក្រក់ចង់ធ្វើឱ្យប៉ះពាល់ដល់កូរ៉េខាងជើង។ មនុស្សអាក្រក់ប្រកបដោយភាពស្អប់ខ្ពើមនោះគឺសម្តៅទៅលើកូរ៉េខាងត្បូង។
ប៉ុន្តែខាងភាគី ម្ចាស់ដី ម៉ាឡេស៊ី ក៏ធ្លាប់បានព្រមានព្យុងយ៉ាងឱ្យបានដឹងតាំងពីដំបូងមកម្ល៉េះថា ដរាបណាដំណើរការច្បាប់មិនទាន់ចប់ ម៉ាឡេស៊ីមិនប្រគល់សពទៅឱ្យឡើយ បើទោះបីជាម៉ាឡេស៊ីបានទទួលពាក្យស្នើសុំក៏ដោយ។ ពោលគឺបើគ្មានការវិភាគបញ្ជាក់ តាមបែបវិទ្យាសាស្ត្រ អំពីអត្តសញ្ញាណអ្នកស្លាប់ទេ នោះម៉ាឡេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ