ប្រទេសផលិតស្រូវសាឡី ប្រើប្រាស់ប្រភពទឹកក្រោមដី ច្រើនលើសលុប គួរឲ្យបារម្ភ
ចុះផ្សាយនៅថ្ងៃ៖
ស្តាប់ - ០៦:៤៥
ពិភពលោកកំពុងបូម ប្រើប្រាស់ ទឹកក្រោមដីក្នុងល្បឿនមួយគួរឲ្យព្រួយបារម្ភ។ តាមការសិក្សាមួយ ដែលចុះផ្សាយ នៅក្នុងទស្សនាវដ្តី Nature នៅថ្ងៃព្រហស្បតិ៍ទី ៣០មីនា ការបូម ប្រើប្រាស់ប្រភពទឹកក្រោមដី មានកាន់តែច្រើន សម្រាប់ផលិតចំណីអាហារ ក្នុងពិភពលោក។ ការប្រើប្រាស់ច្រើនហួសហេតុ ប្រភពទឹកក្រោមដីនឹងអាចធ្វើឲ្យមនុស្សប្រឈមនឹងការខ្វះទឹកសម្រាប់បរិភោគ និងសម្រាប់វិស័យកសិកម្ម ដែលផលិតចំណីអាហារ ក្នុងពិភពលោក។
នៅក្នុងការសិក្សាដែលចេញផ្សាយនៅថ្ងៃនេះ ដោយក្នុងទស្សនាវដ្តីវិទ្យាសាស្រ្តដ៏ល្បីឈ្មោះ Nature អ្នកស្រាវជ្រាវលើកឡើងពីការប្រើប្រាស់ប្រភពទឹកក្រោមដី ដ៏ច្រើនហួសហេតុ ដែលនឹងអាចធ្វើឲ្យមានកើតមានវិបត្តិខ្វះទឹកក្នុងពិភពលោក។ តាមការសិក្សាដែលធ្វើឡើងដោយអ្នកវិទ្យាសាស្រ្តអន្តរជាតិ ចំនួន៤រូប ៩០ភាគរយនៃប្រភពទឹកក្រោមដី ដែលគេបានបូម ត្រូវបានយកទៅប្រើប្រាស់សម្រាប់វិស័យកសិកម្ម និងនៅតាមបណ្តាទីក្រុងដែលសំបូរមនុស្សរស់នៅច្រើន នៅតំបន់ស្ងួតហួតហែង ដូចជាអារ៉ាប៊ី សាអូឌីតជាដើម។ មាន ប៉ាគីស្ថាន ចិន អាមេរិក អារ៉ាប៊ី សាអូឌីត អ៊ីរ៉ង់ឥណ្ឌា និងម៉ិចស៊ិក ជាដើម ដែលសុទ្ធជាជង្រុកផលិតស្រូវសាឡី បានបូមប្រើប្រាស់ប្រភពទឹកក្រោមដីច្រើនជាងគេក្នុងពិភពលោក។ កសិកម្មផលិតស្រូវសាឡី ស្រូបទឹកក្រោមដី ច្រើនជាងគេ គឺប្រមាណ ២២ភាគរយ បន្ទាប់មក គឺស្រូវ ១៧ភាគរយ ចំណែកដំណាំ សម្រាប់យកស្ក ឬដំណាំកប្បាស និងពោតជាដើមស្រូបត្រូវការទឹកក្រោមដី ពី ៥ទៅ ៧ភាគរយ។
អ្នកស្រាវជ្រាវបានគូសវាសបង្ហាញឲ្យគេឃើញផងដែរ ពីទំនាក់ទំនងរវាងការបូមប្រើប្រាស់ប្រភពទឹកក្រោមដី ហើយនិងចរាចរណ៍ទំនិញ ក្នុងពិភពលោក។ នៅក្នុងការសិក្សាលើកនេះ គេរកឃើញថា បីភាគ៤នៃផលិតផលកសិកម្ម ដែលខ្ញុំរៀបរាប់ខាងលើ ត្រូវបានគេនាំចេញយកទៅលក់នៅកន្លែងផ្សេង ដោយប្រទេសធំៗចំនួន ៣ គឺ ប៉ាគីស្ថាន ដែលនាំចេញអង្ករ ទៅលក់ឲ្យអ៊ីរ៉ង់ អារ៉ាប៊ី សាអូឌីត ចំណែកអាមេរិកវិញនាំចេញស្រូវសាឡី កប្បាស ពោត សណ្តែក ទៅលក់ឲ្យចិន ជប៉ុន និងម៉ិចស៊ិក។ ប្រទេសនាំចេញធំមួយគឺឥណ្ឌា ដែលបានប្រើប្រាស់ប្រភពទឹកក្រោមដី ដើម្បី ធ្វើកសិកម្មផលិតអង្ករ នាំចេញទៅលក់នៅចិន។ កាតារ បារ៉ែនជាដើម ស្ថិតនៅក្នុងចំណោមប្រទេសចំនួន១០ដែលបាននាំចូលផលិតផលកសិកម្មច្រើនជាងគេក្នុងពិភពលោក។ ទោះជាមិនបានធ្វើផ្ទាល់ បូមទឹកក្រោមដីមកប្រើប្រាស់ច្រើនដូចគេ ប៉ុន្តែ ប្រទេសនាំចូលផលិតផលកសិកម្មបានចូលរួម ជំរុញផងដែរ ឲ្យមានការបូមប្រើប្រាស់ប្រភពទឹកក្រោមដី ច្រើនហួសហេតុ។
អាកាសធាតុប្រែប្រួល និងកំណើនមនុស្សសាស្រ្ត មាននៅកន្លែងដែលប្រភពទឹកក្រោមដី ត្រូវបានគេបូមប្រើហួសហេតុ
ការប្រែប្រួលអាកាសធាតុ ដែលជាដើមហេតុធ្វើឲ្យមានភាពរាំងស្ងួត គ្មានទឹកភ្លៀង។ ដូច្នេះ ប្រភពទឹកក្រោមដី ដើរតួសំខាន់ណាស់ នៅពេលដែលទឹកលើផែនដី ជួបការខ្វះខាត។ មួយវិញទៀត ប្រឈមទៅនឹងការកើនឡើងនៃចំនួនមនុស្សលើផែនដី ដែលធ្វើឲ្យតម្រូវការប្រើប្រាស់ទឹកកើនឡើងដែរនោះ គេត្រូវតែពិចារណាគិតគូរឡើងវិញ ពីរបៀបប្រើប្រាស់ប្រភពទឹកក្រោមដី។
នៅត្រង់ចំណុចនេះ អ្នកស្រាវជ្រាវចង់ឲ្យប្រទេសកសិកម្មធំៗ ដូចជាអាមេរិក ប៉ាគីស្ថាន ចិន ឥណ្ឌា ជាដើម ផ្លាស់ប្តូរវិធីសាស្រ្តធ្វើកសិកម្មរបស់ខ្លួន ដោយឈប់ពឹងផ្អែកទាំងស្រុងលើប្រភពទឹកក្រោមដី ប៉ុន្តែ ឲ្យងាកទៅបង្កើតប្រព័ន្ធស្តុកទឹក នៅលើដីវិញ ឬក៏កែច្នៃ ទឹកដែលប្រើប្រាស់រួចហើយ ដើម្បីយកទៅប្រើប្រាស់ម្តងទៀត សម្រាប់វិស័យកសិកម្ម។ ក្នុងរឿងនេះមានប្រទេសមួយចំនួនបានធ្វើរួចហើយ ដូចជាបារាំងជាដើម ដែលបានប្រើប្រភពទឹកក្រោមដីតិចបំផុតសម្រាប់កសិកម្មរបស់ខ្លួន ព្រោះថា បារាំងមានស្ទឹង ទន្លេ ដែលមានស្តុកទឹក អាចឲ្យគេយកទៅប្រើសម្រាប់ស្រោចស្រពដំណាំ និងស្រូវសាឡីរបស់បារាំង។ ប្រទេសអ៊ីស្រាអែលក៏ដើរតួជាគំរូគេក្នុងលោកដែរ ក្នុងរឿងចម្រាញ់ ចម្រោះ ស្ទើរតែ ៩០ភាគរយនៃ ទឹកដែលប្រើប្រាស់រួចហើយ ដើម្បីយកទៅប្រើប្រាស់ក្នុងវិស័យកសិកម្ម។
ក្រៅតែពីសន្សំសំចៃ កាត់បន្ថយប្រើប្រាស់ប្រភពទឹកក្រោមដី អ្នកវិទ្យាសាស្រ្តចង់ជំរុញឲ្យផងដែរ ឲ្យគេសិក្សាស្រាវជ្រាវរកពូជស្រូវសាឡី ឬប្រភពអាហារផ្សេងទៀត ដែលស្រូប ត្រូវការទឹកតិចបំផុត។ សម្រាប់ អ្នកស្រាវជ្រាវបើសិន មនុស្សគ្រប់រូប កាត់បន្ថយការបរិភោគសាច់សត្វ ឬស្រូវសាឡី ដែលជាប្រភពស្រូប ត្រូវការទឹកច្រើន នោះ គេនឹងចូលរួមបានច្រើនផងដែរ ក្នុងការកាត់បន្ថយ លែងសូវប្រើប្រាស់ប្រភពទឹកក្រោមដីច្រើនដូច សព្វថ្ងៃនេះ។
ប្រភពទឹកក្រោមដីត្រូវការ ១២០០ឆ្នាំ ដើម្បីកកើតថ្មី
ល្បឿននេះ គឺយឺតណាស់បើប្រៀបធៀបនឹងទឹកស្ទឹងដែលត្រូវការចាក់បំពេញ តែក្នុងពេល១៥ថ្ងៃ។ ប៉ុន្តែ តាមការសិក្សា របស់សម្ព័ន្ធអាមេរិកនិងភូមិ រូបសាស្រ្ត គេរកឃើញថា ប្រភពទឹកក្រោមដី ៨ ក្នុងចំណោមប្រភពទឹកក្រោមដី ធំៗ ចំនួន ៣៧ ក្នុងពិភពលោក ត្រូវគេបូមប្រើប្រាស់ ច្រើន ហួសកំណត់។
បើសិនប្រភពទឹកក្រោមដីខះ អស់ ដោយសារតែការបូមប្រើប្រាស់ច្រើន ហួសកំណត់ នោះ ទឹកសាបក្រោមដី នៅក្បែរសមុទ្រនឹងជំនួសដោយទឹកប្រៃក្រោមដី។ ប្រភពទឹកក្រោមដីដែលជាស្រទាប់សំខាន់មួយនៃផែនដី។ ដីនឹងបាក់ស្រុត ដោយសារតែគ្មានទឹកទ្រទ្រង់តទៅទៀត។ វិបត្តិទាំងអស់នេះ គឺនៅមិនស្មើ នឹងការគ្មានទឹកស្អាតសម្រាប់បរិភោគ ដែលផ្តល់ដោយប្រភពទឹកក្រោមដី។ គ្មានទឹក តើឲ្យមនុស្សរស់នៅបានយ៉ាងម៉េចទៅ។ ចំលើយគឺថា មនុស្សត្រូវតែភ្ញាក់រលឹក ទទួលខុសត្រូវលើទង្វើប្រើប្រាស់ទឹកប្រចាំថ្ងៃរបស់ខ្លួន។ គេមិនត្រូវរង់ចាំដល់ថ្ងៃដែលគ្មានទឹកបរិភោគនោះទេ។ មនុស្សគ្រប់រូប មិនថា អ្នកមាន ឬអ្នកក្រ ត្រូវតែមានស្មារតីទទួលខុសត្រូវ ចាប់ពីពេលនេះ ព្រោះថា គ្មានទឹក គឺគេមិនអាចផលិតចំណីអាហារបាន។ គ្មានទឹក គ្រប់គ្រាន់ នឹងធ្វើឲ្យការផលិតធ្លាក់ចុះ ហើយតម្លៃទំនិញ នឹងឡើងខ្ពស់កប់ពពក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ