ឥណ្ឌា និងប៉ាគីស្ថានជាសមាជិកពេញសិទ្ធិថ្មីនៃអង្គការ សហប្រតិបត្តិការក្រុងសៀងហៃ
ចុះផ្សាយនៅថ្ងៃ៖
ថ្ងៃ៨និង៩មិថុនា នៅក្រុង Astana រដ្ឋធានីកាហ្សាក់ស្ថាន ជំនួបកំពូល នៃអង្គការ សហប្រតិបត្តិការក្រុងសៀងហៃ ហៅកាត់ថា OCS ដែលមាន ៦ប្រទេសជាសមាជិក នាំមុខដោយចិន និង រុស្ស៊ី បានសម្រេចដំឡើងលក្ខន្តិកៈ ឥណ្ឌា និង ប៉ាគីស្ថាន ពី សមាជិក-សង្កេតការណ៍ ទៅជាសមាជិកពេញសិទ្ធិ របស់អង្កការអន្តរជាតិនេះ ដែលចោទពីមុខខ្លួន គឺភារកិច្ចពង្រឹងស្ថិរភាពនិងសន្តិសុខ ក្នុងលំហអាស៊ី-អឺរ៉ុបនេះ ដែល មានបណ្តាជនសឹងពាក់កណ្តាល លើផែនដី។ ជាការកត់សម្គាល់ កម្ពុជា តាំងពីឆ្នាំ២០១៥មក មានលក្ខន្តិកៈ ជា ប្រទេសដៃគូសន្ទនា របស់ OCS ។
អង្គការសហប្រតិបត្តិការក្រុងសៀងហៃ ហៅកាត់ថា OCS មានឈ្មោះ សៀងហៃយ៉ាងនេះ ពីព្រោះ ក្នុងឆ្នាំ ១៩៩៦ ពិតជានៅក្រុងសៀងហៃតែម្តង ដែលក្នុងជំនួបនៃប្រមុខ ៥រដ្ឋ ៖ ម្ខាងគឺចិន ហើយម្ខាងទៀត គឺ រុស្ស៊ី និង ៣ ប្រទេសតំបន់អាស៊ីកណ្តាល ដែលមានព្រំដែន ជាប់នឹងចិនដែរ និយាយឲ្យចំ កាហ្សាក់ស្ថាន កៀហ្ស៊ីស៊ីស្ថាន តាហ្ស៊ីគីស្ថាន បានចុះនឹងគ្នា ជាកិច្ចព្រមព្រៀងស្តីអំពី ការពង្រឹងជំនឿទុកចិត្តគ្នា ក្នុងវិស័យ យោធា និង ស្តីអំពីការកាត់បន្ថយដូចគ្នា ចំនួនកងកម្លាំងប្រដាប់អាវុធ ដែលម្ខាងៗបានដាក់ឲ្យប្រចាំការ នៅត្រង់តំបន់ព្រំដែនរួមនោះ។
ប៉ុន្តែ លុះក្នុងឆ្នាំ២០០១ ទេតើ ដែលនៅក្រុងសៀងហៃដដែល ក្រុម ៥ប្រទេសនេះ បានសម្រេចបង្កើតឡើង ជា អង្គការសហប្រតិបត្តិការក្រុងសៀងហៃ តាមរយៈ ការចុះជាសន្ធិសញ្ញាសមស្រប ដោយពេលនោះ បានទទួល ប្រទេសមួយទៀតនៃតំបន់អាស៊ីកណ្តាល ដែលគ្មានព្រំប្រទល់ជាប់នឹងចិនទេ គឺ អ៊ូសបេគីស្ថាន ឲ្យចូលជា សមាជិកពេញសិទ្ធិដែរ។
ក្នុងធម្មនុញ្ញខ្លួន អង្គការសហប្រតិបត្តិការក្រុងសៀងហៃ គូសបញ្ជាក់ថា អង្គការនេះ មិនមែនជា ប្លុកយោធា ដូច បក្សសម្ព័ន្ធ អូតង់ ឡើយ តែជាទីប្រជុំ បើកចំហ ស្តីអំពីបញ្ហាសន្តិសុខសម្រាប់តំបន់។ ភារកិច្ចធំៗ ជាគោល ប្រកាស ដោយ អង្គការនេះ គឺ ពង្រឹងស្ថិរភាព និង សន្តិសុខ ក្នុងលំហអាស៊ី-អឺរ៉ុប ដែលមាន ប្រទេសទាំងនោះជាសមាជិក , ប្រយុទ្ធទល់នឹង ភេរវនិយម ទល់នឹងពួកជ្រុលនិយម ទល់នឹងចរាចរណ៍គ្រឿងញៀន , អភិវឌ្ឍន៍សហប្រតិបត្តិការ សេដ្ឋកិច្ច ភាពជាដៃគូគ្នាវិស័យថាមពល ធ្វើការផ្លាស់ប្តូរផ្នែកវិទ្យាសាស្ត្រ និង វប្បធម៌។
ក្រោយពីទទួលឥណ្ឌា និងប៉ាគីស្ថានចូលជាសមាជិកពេញសិទ្ធិ អង្គការសហប្រតិបត្តិការក្រុងសៀងហៃ OCS ចាប់ពីអំណើះតទៅ រួមក្តោប ក្នុងជួរខ្លួន គឺ ៨ ប្រទេស ដែលក្នុងនោះ មាន៤ ប្រទេសប្រដាប់ទៅដោយ អាវុធនុយក្លេអ៊ែរ ពោលគឺ រុស្ស៊ី ចិន ឥណ្ឌា ប៉ាគីស្ថាន។ បើនិយាយពីភូមិសាស្ត្រវិញ OCS មានដែនដីសរុប ៣៤ លាន គ.ម២ ឬ ៦០% នៃដែនដីទ្វីបអាស៊ី-អឺរ៉ុប មានបណ្តាជន ជាង ៣.០០០ លាននាក់ ឬ ៤៥% នៃ បណ្តាជនផែនដី។ ខាងផលិតផលសរុបក្នុងស្រុក ហៅថា GDP ក្រុមប្រទេស OCS មាន GDP ប្រមាណ ១ភាគ៣ ក្នុងលោក។
គឺក្នុងឆ្នាំ ២០១៥ នាជំនួបកំពូល នៅក្រុង Oufa ប្រទេសរុស្ស៊ី ដែល ឥណ្ឌា និងប៉ាគីស្ថាន កាលណោះ ក្នុង ឋានៈជាប្រទេសសមាជិក-សង្កេតការណ៍ បានដាក់ពាក្យសុំចូលជា សមាជិកពេញសិទ្ធិតែម្តង។ ដូចដែល លោកប្រធានាធិបតីរុស្ស៊ី វ៉្លាឌីមៀរ ពូទីន បានថ្លែងមួយសប្តាហ៍មុន ពេលទទួលជួបលោកនាយករដ្ឋមន្ត្រី ឥណ្ឌា ណារិនដ្រា ម៉ូឌី ក្នុងក្របខ័ណ្ឌនៃ វេទិកាសេដ្ឋកិច្ចអន្តរជាតិ ក្នុងក្រុងរុស្ស៊ី Saint-Petersbourg ៖ ម៉ូស្គូ តាំងពី ដើមទីមក តែងគាំទ្រជានិច្ចដល់បេក្ខភាពឥណ្ឌា។ ចំពោះការគាំទ្រនេះ ប្រមុខរដ្ឋាភិបាលឥណ្ឌា បានសំដែង អំណរគុណយ៉ាងជ្រាលជ្រៅ ទៅកាន់លោកពូទីន។ បើរុស្ស៊ី រមែងជួយជ្រោមជ្រែង ដល់បេក្ខភាពឥណ្ឌា នោះ ជាធម្មតាទេ ដែលចិន គាំទ្រដល់ បេក្ខភាពនៃសម្ព័ន្ធមិត្តប៉ាគីស្ថានរបស់ខ្លួន។ តាមមតិពួកអ្នកវិភាគ ការដែល ឥណ្ឌា និង ប៉ាគីស្ថាន ដែលមើលមុខគ្នាមិនសូវចំ មកពីទំនាស់ នៅដែនដី Cachemire ជាទីដែលធ្លាប់មាន ផ្ទុះឡើង ជាសង្គ្រាម ក្នុងឆ្នាំ១៩៤៧-១៩៤៩ និង ក្នុងឆ្នាំ ១៩៦៥ រវាងកងទ័ពឥណ្ឌា និង កងទ័ពប៉ាគីស្ថាន ប្រហែលជា អាចជួយ បន្ធូរភាពតានតឹងរវាងប្រទេសទាំងពីរ ហើយនាំទៅកាន់ដំណោះស្រាយ វិវាទនេះ ដោយសន្តិវិធី។ រួចជាទូទៅ ការពង្រីកជួរ OCS ដោយទទួលប្រទេសពីរនេះ ជាសមាជិកពេញសិទ្ធិ គឺ មុខជា នឹង កែឲ្យប្រសើរឡើង “ស្ថានភាពភូមិសាស្ត្រ-នយោបាយ នៅអាស៊ីខាងត្បូង និង អាស៊ីកណ្តាល”។
ក្រោយពីឥណ្ឌា និង ប៉ាគីស្ថាន ឆ្លងទៅជាសមាជិកពេញសិទ្ធិ នៅបន្តស្ថិតនៅ ជាសមាជិក-សង្កេតការណ៍ គឺ អាហ្វហ្កានីស្ថាន អ៊ីរ៉ង់ ម៉ុងហ្គោលី បេឡារុស។ សហការជាមួយ OCS ក៏ទាំង ប្រទេសដែលមាន លក្ខន្តិកៈ ជា ដៃគូសន្ទនា ក្នុងនោះ មានតួកគី សេរីលង្កា អាស៊ែបែហ្សន់ អារមេនី នេប់ាល់ និង កម្ពុជា។
ករណីកម្ពុជា ៖ គឺថ្ងៃ២៤ កញ្ញា ឆ្នាំ២០១៥ ដែលកម្ពុជា បានក្លាយជាផ្លូវការ ជាដៃគូសន្ទនា របស់ អង្គការសហប្រតិបត្តិការក្រុងសៀងហៃ។ អនុស្សរណៈស្តីអំពីសហប្រតិបត្តិការកម្ពុជា ជាមួយអង្គការនេះ ត្រូវបានចុះ នៅក្រុង Sian ប្រទេសចិន ក្នុងក្របខ័ណ្ឌនៃ វេទិកាសេដ្ឋកិច្ចអឺរ៉ុប-អាស៊ី។ កាលណោះ អនុស្សរណៈ ត្រូវបានចុះហត្ថលេខា ដោយឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការ អន្តរជាតិ រាជាណាចក្រកម្ពុជា លោក ហោ ណាំហុង និងដោយអគ្គលេខាធិការ អង្គការ OCS លោក Dmitri Mezentsev ។ សេចក្តីសម្រេច ស្តីអំពីការផ្តល់ដល់កម្ពុជា លក្ខន្តិកៈ ជាដៃគូសន្ទនា របស់ OCS ត្រូវបានអនុម័ត ក្នុង ឋានៈជាតុល្យាការនៃ ជំនួបកំពូល OCS នៅក្រុងរុស្ស៊ី Oufa ក្នុងខែកក្កដាឆ្នាំ២០១៥នោះ។ តាមការឲ្យដឹងនៃ ភាគីកម្ពុជាផ្ទាល់ តទៅថ្ងៃមុខ រាជាណាចក្រនេះ គ្រោងទទួលលក្ខន្តិកៈ ជាសមាជិក-សង្កេតការណ៍ ដោយសង្ឃឹម ប្រែក្លាយបន្តិចម្តងៗ លុះរហូតដល់បានលក្ខន្តិកៈ ជាសមាជិកពេញសិទ្ទិតែម្តង របស់ OCS ។
ក្នុងរបៀបវារៈនៃជំនួបកំពូល OCS នៅក្រុង Astana រដ្ឋធានីកាហ្សាក់ស្ថាន ក្រៅពីកម្មវត្ថុ ស្តីអំពីការពង្រីកជួរ របស់ខ្លួន ក៏មានអនុម័តយក អនុសញ្ញាស្តីអំពីការប្រឈមទល់នឹង ភេរវនិយម និង ទល់នឹងពួកជ្រុលនិយម។
ជាការកត់សម្គាល់ ជំនួបកំពូលលើកក្រោយ នឹងប្រព្រឹត្តទៅ ក្នុងឆ្នាំ ២០១៨ នៅប្រទេសចិនតែម្តង -ប្រទេស ជាដើមកំណើត នៃអង្គការសហប្រតិបត្តិការក្រុងសៀងហៃ។ គួរនិយាយថា ភាសាផ្លូវការដែលគេប្រើ ក្នុង អង្គការនេះ គឺ ភាសាចិន និង ភាសារុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ