ចិន និងរុស្ស៊ី ត្រៀម ចូលប្រកួតប្រជែងជាមួយក្រុមហ៊ុនផលិតយន្តហោះអាមេរិក និងអឺរ៉ុប
អ៊ែរប៊ូស Airbus របស់អឺរ៉ុប និងប៊ូអ៊ីង Boeing របស់អាមេរិកនឹងលែងជាក្រុមហ៊ុនផ្តាច់មុខខាងផលិតយន្តហោះដឹកអ្នកដំណើរ ទៀតហើយ។ អ្នកជំនាញជាច្រើនយល់ថា នាប៉ុន្មានឆ្នាំខាងមុខ ក្រុមហ៊ុនផលិតយន្តហោះអ៊ឺរ៉ុប និងអាមេរិកនឹងជួប ប្រកួតប្រជែងជាមួយ ក្រុមហ៊ុនចិន និងក្រុមហ៊ុនរុស្ស៊ី ដែលកំពុងផលិត ប្រភេទយន្តហោះធុនមធ្យម ដើម្បីប្រជែងជាមួយយន្តហោះ ប៊ូអ៊ីង 737MAX និងអ៊ែរប៊ូស A321neo។
ចុះផ្សាយនៅថ្ងៃ៖
យន្តហោះធុនមធ្យមរបស់ចិន និងរុស្ស៊ី មិនបានបង្ហាញខ្លួន នៅក្នុងពិព័រណ៍យន្តហោះ អន្តរជាតិបួរហ្សេ នៅ ឆ្នាំនេះ ពិតមែន ប៉ុន្តែ ម្ចាស់របស់វា គឺ ក្រុមហ៊ុនចិនComac និងក្រុមហ៊ុនIrkout របស់រុស្ស៊ី ដែលជាក្រុមហ៊ុនថ្មីថ្មោង នៅក្នុងផ្នែកផលិតយន្តហោះដឹកអ្នកដំណើរ មិនបានលាក់ទេ ពីមហិច្ឆតា ចង់ឲ្យយន្តហោះ ធុនមធ្យម របស់ខ្លួន ប្រកួតប្រជែង ជាមួយយន្តហោះអឺរ៉ុប អ៊ែរប៊ូស A321neo និងយន្តហោះអាមេរិក ប៊ូអ៊ីង 737MAX។
បច្ចុប្បន្ននេះ ក្រុមហ៊ុនរដ្ឋចិន Comac កំពុងផលិត ធុនមធ្យម C-919 និងបានដាក់ឲ្យហោះហើរជាលើកដំបូង កាលពីថ្ងៃទី ៥ឧសភាកន្លងទៅ។ អាចហោះហើរក្នុងរយៈចម្ងាយមធ្យម យន្តហោះរបស់ចិន អាចដឹកអ្នកដំណើរបាន ១៦៨នាក់។ រុស្ស៊ីឯណោះវិញ កំពុងអភិវឌ្ឍ ផលិតយន្តហោះធុនមធ្យមដែរ គឺ MC-21 ដែលនឹងក្លាយជាគូប្រជែងសំខាន់មួយនៅថ្ងៃអនាគតរបស់យន្តហោះអ៊ែរប៊ូសA 321 និងប៊ូអ៊ីង737។
សម្រាប់អ្នកជំនាញ ចិន និងរុស្ស៊ី មិនឈប់ត្រឹមអភិវឌ្ឍយន្តហោះចម្ងាយមធ្យមនោះទេ។ ក្រុមហ៊ុនចិន Comac បានចុះកិច្ចសន្យាជាមួយក្រុមហ៊ុនរដ្ឋរុស្ស៊ី ដើម្បីផលិតរួមគ្នា យន្តហោះធុនធំ មួយគ្រឿង ដែលអាចដឹកអ្នកដំណើរ ចំនួន ២៨០នាក់។ យន្តហោះចម្ងាយឆ្ងាយ ដែលមានតម្លៃពី១៣ ទៅ ២០ពាន់លានដុល្លារ នឹងអាចប្រកួតប្រជែងជាមួយ យន្តហោះ ហោះហើរ ក្នុងចម្ងាយឆ្ងាយរបស់ប៊ូអ៊ីង787 និងអ៊ែរប៊ូស A350។
បច្ចុប្បន្ននេះ ក្រុមហ៊ុនចិន និងរុស្ស៊ី មានសមត្ថភាពផលិតយន្តហោះតូចៗ ដែលធានាការហោះហើរជិតៗ នៅក្នុងស្រុកតែប៉ុណ្ណោះ។ យន្តហោះធុនមធ្យមរបស់ចិន និងរុស្ស៊ីទៀតសោត នៅមិនទាន់អាចនាំចេញ សម្រាប់យកទៅលក់ នៅបរទេស ដោយសារតែវានៅមិនទាន់បានទទួលប័ណ្ណបញ្ជាក់ ពីអាជ្ញាធរអាកាសចរណ៍អាមេរិក និងអឺរ៉ុប។
សម្រាប់អ្នកទទួលខុសត្រូវធំៗរបស់ក្រុមហ៊ុនប៊ូអ៊ីង និងអ៊ែរប៊ូស ការប្រកួតប្រជែងពីខាងក្រុមហ៊ុនចិន និងរុស្ស៊ី គឺជារឿងដែលគេមិនអាចមើលរំលង ព្រោះថា ចិនជាពិសេស កំពុងអភិវឌ្ឍបច្ចេកវិទ្យាផលិតយន្តហោះចម្ងាយមធ្យម ដើម្បីបំពេញតម្រូវការក្នុងស្រុកចិនផ្ទាល់តែម្តង។ គេវាយតម្លៃថា នៅ២០ឆ្នាំខាងមុខ ចិននឹងក្លាយជាទីផ្សារធំជាងគេនៅក្នុងពិភពលោក ដែលត្រូវការយន្តហោះថ្មី ប្រមាណ ៦ពាន់គ្រឿង និងមានតម្លៃ ១ពាន់ ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ