លទ្ធផលនៃទស្សនកិច្ចលោកប្រធានាធិបតីចិនស៊ី ជីនពីង រយៈពេលពីរថ្ងៃនៅរដ្ឋធានីរុស្ស៊ី
លោកប្រធានាធិបតីរុស្ស៊ី វ៉្លាឌីមៀរ ពូទីន ថ្ងៃអង្គារទី ៤ កក្កដា បានទទួលជួប សមភាគីចិនរបស់គាត់ លោក ស៊ី ជីនពីង នៅវិមានក្រេមឡាំង ពិភាក្សាអំពីពាណិជ្ជកម្មរវាងប្រទេសទាំងពីរនិងបាននិយាយប៉ះលើភាពតានតឹងកាន់តែខ្លាំងឡើងនៅឧបទ្វីបកូរ៉េបន្ទាប់ពីក្រុងព្យុងយ៉ាង បានបាញ់សាកល្បងយ៉ាងជោគជ័យមីស៊ីលបាលីស្ទិក។ ជាលទ្ធផលនៃកិច្ចរចា មានចុះបានឯកសារ ជាង២០ច្បាប់ក្នុងនោះ គឺសេចក្តីថ្លែងការណ៍រួមថ្នាក់កំពូលស្តីអំពីការស៊ីជម្រៅតទៅទៀតភាពជាដៃគូយុទ្ធសាស្ត្ររវាង ចិននិងរុស្ស៊ីនិងកិច្ចព្រមព្រៀងពេញមួយចង្កោម ស្តីអំពីសហប្រតិបត្តិការវិស័យថាមពល ពាណិជ្ជកម្ម វិនិយោគ ឧស្សាហកម្ម ហេដ្ឋារចនាសម្ព័ន្ធដឹកជញ្ជូននិងកសិកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ជាការកត់សម្គាល់ តាំងពីគាត់ឡើងជាប្រធានាធិបតីចិនក្នុងឆ្នាំ ២០១៣មក លោក ស៊ី ជីនពីង បំពេញទស្សនកិច្ចលើកនេះនៅរុស្ស៊ីគឺជាលើកទី៦ហើយតាមសំដីគាត់ផ្ទាល់ គាត់ជួបជាមួយសមភាគីរុស្ស៊ី លោកពូទីន ដល់ទៅ ២០ដងឯណោះ គឺញឹកញយជាងជាមួយប្រមុខរដ្ឋបរទេសណាក៏ដោយរួចតាមដែលលោកពូទីនបញ្ជាក់គ្រាន់តែក្នុងឆ្នាំនេះ រដ្ឋបុរសទាំងពីរជួបគ្នាជាលើកទី៣ទៅហើយ។
មេដឹកនាំចិន ដែលបានអញ្ជើញមកដល់ក្រុងម៉ូស្គូនារសៀលថ្ងៃចន្ទនៅល្ងាចថ្ងៃនោះឯង បានជួបពិភាក្សា ក្រៅផ្លូវការជាមួយលោកពូទីនដើម្បីរាវរក” ដំណោះស្រាយឲ្យវិបត្តិនៅឧបទ្វីបកូរ៉េតាមរយៈការសន្ទនានិងកិច្ចចរចា “។
មុនផ្តើមជំនួបផ្លូវការថ្ងៃអង្គារជាមួយលោកស៊ី ជីនពីង លោកពូទីន បានថ្លែងជាអាទិ៍ ៖ គឺបញ្ហាសេដ្ឋកិច្ច ដែលស្ថិតនៅជានិច្ចជាក្តីកង្វល់របស់យើង ប៉ុន្តែយើងឯកភាពគ្នា សម្របសម្រួលការខំប្រឹងប្រែងរបស់យើងនៅលើឆាកអន្តរជាតិ។
លោកប្រធានាធិបតីចិនពីចំណែកគាត់បានសាទរ “ លក្ខណៈពិសេស” “ នៃចំណងរវាងមហាអំណាចទាំងពីរក្នុងឋានៈជា”ប្រទេសរួមរស់ភូមិផងរបងល្អនឹងគ្នា ,ជាមិត្តដ៏ស្មោះនឹងគ្នា , ជា ដៃគូឥតខ្ចោះ”។
ចង្កោមកិច្ចព្រមព្រៀង មានទឹកប្រាក់រាប់សិបពាន់លានដុល្លារ ដែលត្រូវបានចុះ សឲ្យឃើញជាបឋមពី ការបែរមុខរបស់រុស្ស៊ីទៅទិសខាងកើត ដោយមកពីទំនាក់ទំនងជាមួយសហភាពអឺរ៉ុប ស្ថិតនៅសាំញ៉ាំដដែល។
ក្នុងចង្កោមឯកសារនោះ តាមដែលប្រធានអគ្គនាយកក្រុមហ៊ុនយក្សរុស្ស៊ីខាងឧស្ម័ន Gazprom លោក Alexei Miller ប្រកាសឲ្យដឹងគឺមានចុះបានកិច្ចព្រមព្រៀងដែលកំណត់ថា រុស្ស៊ីនឹងចាប់ផ្តើមបង្ហូរឧស្ម័ន តាមខ្សែបំពង់ចេញពីតំបន់ស៊ីបេរី ទៅកាន់ប្រទេសចិន នៅថ្ងៃ ២០ធ្នូឆ្នាំ២០១៩។ គឺកាលពីថ្ងៃ២១ ឧសភា ឆ្នាំ ២០១៤ដែលរុស្ស៊ីនិងចិន បានចុះកុងត្រាធំសំបើមលក់ឧស្ម័នខ្លួនទៅឲ្យប្រទេសចិនក្នុងទឹកប្រាក់៤០០.០០០ លានដុល្លារសម្រាប់អំឡុងពេល៣០ឆ្នាំ ដែលជាលទ្ធផលនៃកិច្ចចរចាអស់ជិត ១០ឆ្នាំ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ