នុយក្លេអ៊ែរកូរ៉េខាងជើង៖ក្រុងវ៉ាស៊ីនតោនបន្តប្រើធម៌ក្តៅ និងធម៌ត្រជាក់ដាក់ក្រុងព្យុងយ៉ាង
ចុះផ្សាយនៅថ្ងៃ៖
ស្តាប់ - ០៧:០៨
នៅថ្ងៃអង្គារ ទី២២ សីហា រដ្ឋបាលអាមេរិកាំងបានបង្កើនគំនាបដាក់កូរ៉េខាងជើងដោយបានអនុម័តទ័ណ្ឌកម្មថ្មីក្នុងសំណុំរឿងនុយក្លេអ៊ែរ និងគ្រាប់មីស៊ីល។ ទន្ទឹមគ្នានេះ លោកប្រធានាធិបតីអាមេរិកដូណាល់ ត្រាំបានចេញមុខប្រកាសក្តែងៗថា ការដំឡើងសាច់ដុំរបស់លោកដាក់មនុស្សខ្លាំងកូរ៉េខាងជើងលោកគីម ជុនអ៊ុនពិតជាបានធ្វើឲ្យលោកគីម ជុនអ៊ុនខ្លបខ្លាច និងចាប់ផ្តើមបញ្ចេញកាយវិការស្លូតបូត គោរពអាមេរិក។ រីឯប្រមុខការទូតអាមេរិកលោក Rex Tillerson បានឆ្លៀតបន្ថែមដោយកោតសរសើរពីភាពអត់ធ្មត់របស់កូរ៉េខាងជើង។ តែចិនបានព្រមានត្រង់ៗថា វិធានការដាក់ទ័ណ្ឌកម្មថ្មីរបស់អាមេរិកនឹងរឹតតែធ្វើឲ្យស្ថានការណ៍ស្មុគស្មាញពិបាកដោះស្រាយ។
ការដែលចិនទើសទាល់ចិត្តខ្លាំងចំពោះទ័ណ្ឌកម្មអាមេរិកដាក់លើកូរ៉េខាងជើងក៏ដោយសារចិនខ្លួនឯងហាក់ដូចជាបានទទួលរងនឹងទ័ណ្ឌកម្មនោះផ្ទាល់។ ចូរកុំភ្លេចថា ទ័ណ្ឌកម្មរបស់អាមេរិកដាក់លើកូរ៉េខាងជើងបានសំដៅជាពិសេសលើក្រុមហ៊ុនបរទេស ឬជនបរទេសចិន និងរុស្ស៊ីដែលកំពុងរកស៊ីជាមួយកូរ៉េខាងជើង។ គោលដៅរបស់អាមេរិក គឺកាត់ផ្តាច់ចំណូលរបស់កូរ៉េខាងជើងពីក្រៅដើម្បីកុំឲ្យរបបកុម្មុយនិស្តមួយនេះយកទៅអភិវឌ្ឍន៍កម្មវិធីនុយក្លេអ៊ែរ និងកម្មវិធីគ្រាប់មីស៊ីល។ ម្យ៉ាងទៀត ចិនមិនយល់ស្របនឹងអាមេរិកដែលបានអនុម័តជាតែម្នាក់នៅក្នុងបញ្ហានេះទេ និងយល់ថា ទង្វើរបៀបនេះនឹងរឹតតែធ្វើឲ្យរឿងដ៏រសើបមួយនេះពិបាកដោះស្រាយ។
នៅក្នុងទ័ណ្ឌកម្មថ្មីដាក់លើកូរ៉េខាងជើង ក្រសួងសេដ្ឋកិច្ចអាមេរិកបានសំដៅលើក្រុមហ៊ុនចិន និងរុស្ស៊ីដែលរកស៊ីទិញធ្យូងថ្ម និងលោហៈធាតុជាច្រើនផ្សេងទៀតពីកូរ៉េខាងជើង។ តួលេខផ្តល់ដោយរដ្ឋបាលអាមេរិកាំងឲ្យដឹងថា ក្នុងចន្លោះឆ្នាំ ២០១៣ និង ២០១៦ ក្រុមហ៊ុនចិនបានទិញរ៉ែធ្យូងថ្មពីកូរ៉េខាងជើងក្នុងទឹកប្រាក់ ៥០០លានដុល្លារ។ ទឹកប្រាក់យ៉ាងសម្បើមនេះមិនត្រូវបានរបបក្រុងព្យុងយ៉ាងយកទៅចិញ្ចឹមភាពអត់ឃ្លានរបស់ពលរដ្ឋខ្លួនទេ តែបែរជាយកទៅអភិវឌ្ឍន៍កម្មវិធីនុយក្លេអ៊ែរ និងកម្មវិធីគ្រាប់មីស៊ីលទៅវិញ។ នៅខាងប្រទេសរុស្ស៊ីវិញ មានជនជាតិរុស្ស៊ី ៣នាក់ រួមទាំងក្រុមហ៊ុនរុស្ស៊ីមួយបានទទួលទ័ណ្ឌកម្មរបស់អាមេរិកក្នុងបទលក់ប្រេងទៅឲ្យកូរ៉េខាងជើងជាថ្នូរនឹងការទិញលោហៈធាតុពីកូរ៉េខាងជើង។
ទ័ណ្ឌកម្មថ្មីរបស់អាមេរិកដាក់លើកូរ៉េខាងជើងពេលនេះបានធ្វើឡើង ក្រោយពីទ័ណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី៦ សីហាដែលសំដៅបិទខ្ទប់ចំណូលរបស់ក្រុងព្យុងយ៉ាងដែលបានមកពីការលក់ធ្យូងថ្ម ដែក និងក្នុងផ្នែកនេសាទ។
តើលោកគីម ជុនអ៊ុនពិតជាខ្លាចលោកដូណាល់ ត្រាំមែន ឬ?
គឺលោកដូណាល់ ត្រាំខ្លួនឯងដែលនិយាយថា លោកគីម ជុនអ៊ុនបានបោះមួយជំហានថយក្រោយដោយមិនហ៊ានប្រើគ្រាប់មីស៊ីលវាយប្រហារអាមេរិក និងថា លោកគីម ជុនអ៊ុនបានចាប់ផ្តើមគោរពអាមេរិកដោយមិនសូវប្រើសម្តីក្អេងក្អាងដូចមុន។ នៅត្រង់ថា តើលោកគីម ជុនអ៊ុនខ្លាចលោកដូណាល់ ត្រាំ ឬមួយលោកត្រាំខ្លាចលោកគីម ជុនអ៊ុន គឺជារឿងមួយដែលមិនអាចផ្តល់ចម្លើយជាក់ច្បាស់ណាមួយទេ។ គួររម្លឹកជូនឡើងវិញថា សង្រ្គាមពាក្យសម្តីរវាងលោកត្រាំ និងលោកគីម ជុនអ៊ុនបានកើតមានឡើង បន្ទាប់ពីលោកគីម ជុនអ៊ុនបានព្រមានវាយអាមេរិកដោយគ្រាប់មីស៊ីលបំពាក់ក្បាលនុយក្លេអ៊ែរ និងក្រោយពីលោកត្រាំព្រមានវ៉ៃកូរ៉េខាងជើងឲ្យចាស់ដៃវិញ បើលោកគីម ជុនអ៊ុនថ្លើមធំហ៊ានដាក់អាមេរិកមុន។
ក្រោយមក ស្ថានការណ៍ហាក់បានស្ងប់ស្ងាត់បន្តិចដោយសារតែលោកគីម ជុនអ៊ុនបានប្រកាសពីការសម្រាកមិនសាកល្បងនុយក្លេអ៊ែរ និងគ្រាប់មីស៊ីល។ នៅក្នុងន័យនេះ លោកដូណាល់ ត្រាំបានឆ្លៀតលើកយកទៅពន្យល់បកស្រាយនាថ្ងៃអង្គារ ទី២២ សីហាថា វិធានការបង្ហាញសាច់ដុំ និងការដំឡើងធ្មុងរបស់លោកដាក់លោកគីម ជុនអ៊ុនពិតជាទទួលបានលទ្ធផលវិជ្ជមាន ព្រមទាំងធ្វើឲ្យមនុស្សខ្លាំងកូរ៉េខាងជើងចាប់ផ្តើមគោរពកោតខ្លាចអាមេរិក។ នៅចំពោះមុខសកម្មជនជាច្រើនពាន់នាក់នាជំនួបសាធារណៈក្នុងរដ្ឋ Arizona លោកត្រាំបានថ្លែងថា ចំណាត់ការរបស់លោកតបនឹងលោកគីម ជុនអ៊ុននៅមានកម្រិត ពោលមិនទាន់ខ្លាំងដូចដែលគ្រប់គ្នាបានគិតឡើយ។
ចំណែកលោកប្រមុខការទូតអាមេរិក Rex Tillerson ក៏បានឆ្លៀតនិយាយពីបញ្ហាកូរ៉េខាងជើងដែរ តែបានប្រើសម្តីការទូតជាងលោកត្រាំបន្តិច។ លោក Tillerson បានសរសើរពីភាពអត់ធ្មត់របស់លោកគីម ជុនអ៊ុនដែលបានព្យួរការសាកល្បងនុយក្លេអ៊ែរ និងគ្រាប់មីស៊ីល និងសង្ឃឹមថា ទង្វើរបៀបនេះរបស់លោកគីម ជុនអ៊ុនអាចជាសញ្ញាវិជ្ជមានមួយបើកផ្លូវឆ្ពោះទៅកាន់កិច្ចចរចាមួយទល់មួយរវាងក្រុងវ៉ាស៊ីតោន និងក្រុងព្យុងយ៉ាង។
លោកគីម ជុនអ៊ុនបានបញ្ជាឲ្យផលិតបន្ថែមនូវម៉ូទ័រគ្រាប់មីស៊ីល និងគ្រាប់ក្បាលនុយក្លេអ៊ែរ
តាមពិតទៅ ល្បែងដែលលោកដូណាល់ ត្រាំ និងលោកគីម ជុនអ៊ុនកំពុងលេងជាមួយគ្នាពេលនេះ គឺជាការសាកល្បងកម្លាំងគ្នា ព្រោះតាំងពីលោកត្រាំឡើងកាន់តំណែងប្រធានាធិបតីអាមេរិកមក លោកគីម ជុនអ៊ុននៅមិនទាន់ដឹងចិត្តលោកត្រាំពិតប្រាកដ និងពិបាកទាយថា តើនៅក្នុងល្បែងមួយនេះ លោកត្រាំហ៊ានដាក់លុយប៉ុន្មាន។ ពិតណាស់ថាពេលនេះ ពោលតាំងពីលោកគីម ជុនអ៊ុនបានប្រកាសសម្រាកការសាកល្បងនុយក្លេអ៊ែរ និងគ្រាប់មីស៊ីលមក លោកត្រាំបានចាត់ទុកជាជោគជ័យមួយរបស់លោក និងហ៊ានទាំងប្រើទ័ណ្ឌកម្មថ្មីប្រឆាំងកូរ៉េខាងជើងទៀតផង។
កូរ៉េខាងជើងនៅមិនបានឆ្លើយតបអ្វីនឹងទ័ណ្ឌកម្មថ្មីរបស់អាមេរិក ឬមួយក៏ប្រតិកម្មរបស់លោកដូណាល់ ត្រាំពេលនេះទេ តែលោកគីម ជុនអ៊ុនផ្ទាល់ខ្លួនបានបង្ហាញឲ្យឃើញនាថ្ងៃពុធនេះនូវភាពចម្រើនផ្នែកបច្ចេកវិទ្យានៃកម្មវិធីគ្រាប់មីស៊ីល និងកម្មវត្ថុពោរពេញដោយមហិច្ឆតានាពេលអនាគត។ នាឱកាសទស្សនកិច្ចនៅក្នុងវិទ្យាស្ថានបរិក្ខារគីមីនៃសាលាវិទ្យាសាស្រ្តការពារដែលជាកន្លែងផលិតគ្រាប់មីស៊ីល លោកគីម ជុនអ៊ុនបានបញ្ជាឲ្យផលិតបន្ថែមនូវម៉ូទ័រកាំជ្រួច និងគ្រាប់ក្បាលនុយក្លេអ៊ែរក្រោមបច្ចេកវិទ្យាថ្មី។ កាយវិការរបៀបនេះស បញ្ជាក់ឲ្យឃើញថា លោកគីម ជុនអ៊ុនមិនមែនមិនខ្លាចការគំរាមរបស់លោកត្រាំប៉ុណ្ណោះទេ តែបែរជាពួនសំងំពង្រឹងកម្លាំងបន្ថែមទៅវិញ។
ជាការពិត កិច្ចចរចាមួយទល់មួយរវាងក្រុងវ៉ាស៊ីតោន និងក្រុងព្យុងយ៉ាង គឺជាអ្វីដែលកូរ៉េខាងជើងបានទាមទារចង់បានយ៉ាងទទូចជាយូរមកហើយ។ តែគេមិនត្រូវភ្លេចនិយាយទេថា ភាគីទាំងពីរបន្តមិនទុកចិត្តគ្នា និងបានដាក់លក្ខខណ្ឌឲ្យគ្នាទៅវិញ ទៅមកដោយគ្មានអ្នកណាហ៊ានធ្វើសម្បទានមុនឡើយ។ វ៉ាស៊ីនតោនថា ខ្លួនអាចចរចាបាន តែក្រុងព្យុងយ៉ាងត្រូវលះបង់កម្មវិធីនុយក្លេអ៊ែរ និងគ្រាប់មីស៊ីលជាមុន។ ចំណែកក្រុងព្យុងយ៉ាងឆ្លើយបកវិញថា ខ្លួនអាចលះបង់បាន លុះត្រាតែវ៉ាស៊ីនតោនឈប់គំរាមវ៉ៃប្រហារ និងផ្តល់ជំនួយឲ្យខ្លួនជាមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ