លោកស្រីយីងឡាក់ បាត់ខ្លួន នៅថ្ងៃប្រកាសសាលក្រមរបស់តុលាការ
តុលាការកំពូលថៃ នៅថ្ងៃសុក្រទី ២៥ បានចេញដីកាចាប់ខ្លួន លោកស្រី យីងឡាក់ ស៊ីណាវ៉ាត បន្ទាប់ពីលោកស្រីខកខាន មិនបង្ហាញខ្លួន នៅថ្ងៃប្រកាសសាលក្រម។ តាមសមាជិករបស់បក្សភឿថៃ លោកស្រីយីងឡាក់ បានចាកចេញរួចហើយ ពីប្រទេសថៃ ទៅប្រទេសសិង្ហបុរី មុននឹងធ្វើដំណើរ ទៅជួបលោកថាក់ស៊ីន ជាបងប្រុស នៅទីក្រុងឌូបៃ។
ចុះផ្សាយនៅថ្ងៃ៖
នៅថ្ងៃសុក្រ តុលាការកំពូលថៃ បានចេញដីកាចាប់ខ្លួន ជំនួសឲ្យការប្រកាសសាលក្រម ប្រឆាំងលោកស្រីយីងឡាក់។ លោកស្រីយីងឡាក់ ដែលប្រឈមនឹងទោសជាប់ពន្ធនាគារ ១០ឆ្នាំ ពីបទធ្វេសប្រហែស ក្នុងកម្មវិធីឧបត្ថម្ភអង្ករដល់កសិករ បានអវត្តមាន មិនទៅបង្ហាញខ្លួន នៅថ្ងៃប្រកាសសាលក្រមរបស់តុលាការ។
មេធាវីរបស់លោកស្រីយីងឡាក់ លោកNorawit Larlengបានសុំតុលាការឲ្យពន្យារ លើកពេលការប្រកាសសាលក្រម ព្រោះថា លោកស្រីយីងឡាក់ ឈឺ មិនអាចចូលខ្លួនទៅតុលាការ។
នៅប៉ុន្មានម៉ោង ចេញសាលដីកាចាប់ខ្លួន លោកស្រីយីងឡាក់ លោកនាយករដ្ឋមន្រ្តីថៃ ប្រាយុទ្ធ ចាន់អូចាបាននិយាយប្រាប់អ្នកកាសែតថា លោកបានបញ្ជាឲ្យគេពង្រឹង ត្រួតពិនិត្យ នៅតាមច្រកព្រំដែន។ ឧបនាយករដ្ឋមន្រ្តីថៃ លោកបានមានប្រសាសន៍ប្រាប់អ្នកសារព័ត៌មានដែរថា លោកស្រី យីងឡាក់ ប្រហែលជាបានចាកចេញពីប្រទេសថៃ។ ប៉ុន្តែ មន្រ្តីអន្តោប្រវេសន៍ថៃវិញបានបញ្ជាក់ថា គេមិនបានឃើញដានរបស់លោកស្រី នៅតាមច្រកចេញចូល ព្រំដែននោះទេ។
លោកស្រីយីងឡាក់ បានបាត់ខ្លួន ដ៏អាថ៌កំបាំង ព្រោះសូម្បីមេធាវីរបស់លោកស្រី ក៏មិនដឹងថា តើលោកស្រី កំពុងស្ថិតនៅកន្លែងណាដែរ។ សមាជិករបស់បក្សលោកស្រីយីងឡាក់ ដែលសុំមិនបញ្ចេញឈ្មោះ បាននិយាយប្រាប់ទីភ្នាក់ងារព័ត៌មានបារាំង AFPថា លោកស្រីយីងឡាក់ ពេលនេះ លែងស្ថិតនៅក្នុងប្រទេសថៃទៀតហើយ។ លោកស្រីទើបតែបានសម្រេចចិត្ត ចាកចេញពីប្រទេស នៅប៉ុន្មានថ្ងៃមុន តុលាការប្រកាសសាលក្រមតែប៉ុណ្ណោះ។
១ឆ្នាំកន្លះ មកហើយដែលតុលាការបើកសវនការជំនុំជម្រះ លោកស្រី យីងឡាក់ ពីបទ ធ្វេសប្រហែស ក្នុងកម្មវិធីឧបត្ថម្ភអង្ករដល់កសិករ។ នៅក្នុងពេលកាន់អំណាចជានាយករដ្ឋមន្រ្តី លោកស្រី យីងឡាក់បានអនុវត្តកម្មវិធីទិញស្រូវអង្ករ ពីកសិករថៃ ក្នុងតម្លៃខ្ពស់ជាងទីផ្សារ។ តុលាការ លោកស្រីបានឡើងការពារនយោបាយទិញស្រូវអង្ករ របស់រដ្ឋាភិបាល ដែលលោកស្រីចាត់ទុកថា បានជួយលើកស្ទួយកសិករថៃ ប៉ុន្តែ អ្នកសេដ្ឋកិច្ចវាយតម្លៃថា នយោបាយឧបត្ថម្ភអង្កររបស់លោកស្រី ធ្វើឲ្យរដ្ឋាភិបាលខាតបង់ប្រាក់ ពី៨ ទៅ ២០ពាន់លានដុល្លារ។
ក្នុងរយៈពេល១ឆ្នាំកន្លះមកនេះ លោកស្រី បានចេញមុខ ទៅឆ្លើយតទល់នឹងការចោទប្រកាន់នៅតុលាការ រហូតធ្វើឲ្យគេជឿថា លោកស្រី ចង់ដោះស្រាយ បញ្ហា តទល់ជាមួយ រដ្ឋាភិបាលសឹក តាមផ្លូវតុលាការ។
ការបាត់ខ្លួន អវត្តមានរបស់លោកស្រី យីងឡាក់ បានធ្វើឲ្យគេភ្ញាក់ផ្អើលគ្រប់គ្នា រួមទាំងអ្នកគាំទ្រជាង១ពាន់នាក់ របស់លោកស្រី ដែលបានទៅឈរចាំ លើកទឹកចិត្ត លោកស្រី នៅមុខតុលាការកំពូលនៅថ្ងៃនេះ។ បើមើលទៅលើសកម្មភាពតស៊ូ របស់លោកស្រី នៅតុលាការ ក្នុងរយៈពេល ១ឆ្នាំកន្លះ គេសឹងមិនជឿថា លោកស្រីសម្រេចចិត្ត ជ្រើសរើសយកផ្លូវ រត់គេចខ្លួន មិនទទួលយកសាលក្រមនោះទេ។
លោកស្រីយីងឡាក់ គ្មានជំនឿលើតុលាការ ដែលគេជឿថា ស្ថិតនៅក្រោមឥទ្ធិពលរបស់ក្រុមយោធាថៃ។ នៅដើមខែសីហានេះ លោកស្រីបាននិយាយរួចហើយថា សវនការជំនុំជម្រះលោកស្រី គឺជារឿង”នយោបាយ” ដែលរដ្ឋាភិបាលសឹកបានរៀបចំឡើង ដើម្បី បោសសម្អាត លុបបំបាត់ ឥទ្ធិពលរបស់ត្រកូលស៊ីណាវ៉ាត របស់លោកស្រី ពីឆាកនយោបាយថៃ។
បើនៅក្រាញននៀល ប្រឈមនឹងការដាក់ទោស លោកស្រីយីងឡាក់អាចក្លាយជាវីរៈនារី
នៅពេលលោកស្រីយីងឡាក់ រត់គេចខ្លួន បែបនេះ គឺរដ្ឋាភិបាលសឹករបស់លោកប្រាយុទ្ធ ចាន់អូចារ ហើយនិងចៅក្រម គឺមិនមែនបរាជ័យនោះទេ។ ហើយអ្នកដែលខាតគឺ លោកស្រី យីងឡាក់។ លោកស្រី អាចរត់ចោលស្រុក រួចខ្លួន មិនឲ្យនៅជាប់ពន្ធនាគារមែន។ ប៉ុន្តែ បើនិយាយពីជីវិតនយោបាយរបស់លោកស្រី វិញ គឺចប់ហើយ។ អាចថា លោកស្រី និងត្រកូលថាក់ស៊ីន ត្រូវខាតបង់ ច្រើន ជាងទទួលផលចំណេញ។
បើសិនលោកស្រី យីងឡាក់ នៅតស៊ូ រហូតដល់ដំណាក់កាលចុងក្រោយ មានន័យថា ក្លាហាន ប្រឈមនឹងការដាក់ទទួលទោស ពន្ធនាគារ តាមការសម្រេចរបស់តុលាការ នោះលោកស្រីនឹងក្លាយជាវីរៈនាទី នៅក្នុងកែវភ្នែករបស់ប្រជាកសិករថៃ របស់ក្រុមអ្នកគាំទ្រអាវក្រហម។ ដោយសុខចិត្ត ទទួលទោសពីតុលាការ លោកស្រីអាចបង្ហាញថា លោកស្រីជាជនរងគ្រោះនយោបាយ ដែលរបបសឹក បានប្រើប្រព័ន្ធតុលាការ ជាឈ្នាន់ សម្រាប់ បង្រ្កាបបំបិទមាត់ ចាប់ចងក្រុមប្រឆាំង។ បើសិនលោកស្រីត្រូវតុលាការផ្តន្ទាទោស នោះនឹងមានអ្នកគាំទ្រ អាវក្រហមច្រើនណាស់ ដែលនឹងចេញមុខ តវ៉ា ការពារលោកស្រី។ ពួកគេនឹងអាចត្រលប់មកធ្វើបាតុកម្ម តវ៉ា និងកាន់កាប់ផ្លូវ ក្នុងក្រុងបាងកក ដូចកាលពីប៉ុន្មានឆ្នាំមុន។
បាតុកម្ម របស់ក្រុមអាវក្រហម ដែលអាចចូលលុកលុយ បង្កឲ្យមានចលាចល នៅក្នុងក្រុង បាងកក មិនមែនជាអ្វី ដែលរដ្ឋាភិបាលសឹករបស់លោកប្រាយុទ្ធ ចាន់អូចា ប្រាថ្នាចង់ឃើញនោះទេ ព្រោះថា នៅតែពីរខែទៀត ប្រទេសថៃ ត្រូវរៀបចំពិធីថ្វាយព្រះភ្លើង បូជាសព អតីតព្រះមហាក្សត្រថៃ នៅខែតុលាខាងមុខ។
សម្រាប់រដ្ឋាភិបាលសឹក គឺ ដូចដកបន្លាចេញពីទ្រូង
របបសឹកចង់ឲ្យតុលាការ ផ្តន្ទាទោសលោកស្រី យីងឡាក់ ព្រោះដើម្បីចង់បញ្ជាក់ពីភាពស្របច្បាប់ និងចាំបាច់ ដែលរបបសឹក បានធ្វើរដ្ឋប្រហារទម្លាក់លោកស្រីយីងឡាក់ ចេញពីអំណាចកន្លងមក។ ប៉ុន្តែ បើសិន លោកស្រី ត្រូវជាប់ទោសនៅពន្ធនាគារពិតមែន គឺលោកស្រីយីងឡាក់ នឹងក្លាយជាវីរៈនារី ហើយនឹងអាចប្រកូកប្រកាសឲ្យមានបាតុកម្មតវ៉ា ប្រឆាំងនឹងអំណាចរបបសឹក។ យោធាថៃ មិនចង់ប្រើកម្លាំង ដាក់ខ្លួន តតាំង ប្រឆាំងប្រជាជននោះទេ ព្រោះថា ធ្វើដូច្នេះ នឹងធ្វើឲ្យខូចមុខមាត់របស់យោធា ដែលរហូតមកទទួលបានការគោរព ស្រឡាញ់ពីប្រជាជនថៃ ជាទូទៅ។
ប៉ុន្តែ បើសិនលោកស្រីយីងឡាក់ រត់គេចខ្លួនបាត់អីចឹង ក្រុមយោធា ក៏មិនចាំបាច់មកត្រូវប្រឈមនឹងចលនាតវ៉ារបស់ក្រុមអ្នកគាំទ្ររបស់ត្រកូលថាក់ស៊ីនដែរ។ គ្មានមេ គ្មានកើយ គឺក្រុមអ្នកគាំទ្រ លោកស្រីយីងឡាក់ មិនអាចប្រមូលផ្តុំគ្នា មកតវ៉ាប្រឆាំងដើម្បីបុព្វហេតុរបស់លោកស្រីយីងឡាក់ដែរ។
ជារួម នៅពេលលោកស្រីយីងឡាក់រត់គេចខ្លួនយ៉ាងដូច្នេះ គឺរបបសឹកថៃ ធូរស្រាលចិត្តច្រើន គឺដូចជាដកបន្លាពីទ្រូង មិនមែន កើតទុក្ខនោះទេ។ តាមប្រភពព័ត៌មានក្នុងស្រុកថៃ របបសឹកទំនងបានបិទភ្នែកជួយសម្រួល ឲ្យលោកស្រី យីងឡាក់បានចាកចេញពីប្រទេស ដោយសុវត្ថិភាព នៅមុនការប្រកាសសាលក្រមនៅថ្ងៃនេះ។ កាសែតថៃ មួយចំនួន បានសរសេរថា លោកស្រីយីងឡាក់ បានចាកចេញពីផ្ទះ ក្នុងក្រុងបាងកក តាំងពីថ្ងៃយប់ថ្ងៃពុធ ម្ល៉េះ ដោយជិះក្នុងរថយន្តខ្មៅមួយ ដែលអមដោយមន្រ្តីប៉ូលិស និងទាហានថៃ។ ព័ត៌មាននេះអាចគួរឲ្យគេជឿបានដែរ ព្រោះថាលោកស្រី យីងឡាក់ ដែលតុលាការបានហាមឃាត់ មិនឲ្យចាកចេញពីប្រទេស កាលពីឆ្នាំ ២០១៥ បានរស់នៅ ក្រោមការតាមដាន ជាប់របស់ពួកយោធា។ ដូច្នេះ គ្មានរឿងអ្វី ដែលលោកស្រី អាចលួចរត់គេចចេញបានពីផ្ទះ ដោយទាហានថៃ មិនដឹងនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ