វិបត្តិរ៉ូហ៊ីងយ៉ា ៖ បារាំងប្រើពាក្យ "ប្រល័យពូជសាសន៍" ចំពោះអំពើហិង្សានៅភូមា
ចុះផ្សាយនៅថ្ងៃ៖
ស្តាប់ - ០៥:២៦
វិបត្តិរ៉ូហ៊ីងយ៉ា បាននិងកំពុងក្លាយជាបច្ចុប្បន្នភាពពិភពលោក ! នៅក្នុងបទសម្ភាសន៍នាទីក្រុងញូវយ៉ក ប្រធានាធិបតីបារាំង លោក អេម៉ានុយអែល ម៉ាក្រុង បានចាត់ទុកអំពើហិង្សាលើជនជាតិរ៉ូហ៊ីងយ៉ានៅភូមាជា “អំពើប្រល័យពូជសាសន៍” និងជា “ការបោសសម្អាតជាតិសាសន៍”។ ក្នុងពេលដែលបារាំងចង់ធ្វើជាអ្នកផ្តួចផ្តើមគំនិតដាក់គំនាបភូមាក្នុងវិបត្តិនេះ ក្រុមហ៊ុនហ្វេសប៊ុកបានប្រកាសបិទខ្ទប់ការបង្ហោះផ្សាយរបស់ពួកឧទ្ទាមរ៉ូហ៊ីងយ៉ា លើប្រព័ន្ធសង្គមរបស់ខ្លួន។
វិបត្តិរ៉ូហ៊ីងយ៉ា ជាប្រធានបទសំខាន់មួយនៃមហាសន្និបាតអង្គការសហប្រជាជាតិឆ្នាំនេះ។ ប្រមុខដឹកនាំប្រទេសមហាអំណាច សុទ្ធតែបានលើកឡើងអំពីវិបត្តិនេះ នៅវេទិកាអង្គការសហប្រជាជាតិ។ ប្រធានាធិបតីបារាំង បានចាត់ទុកអំពើហិង្សាលើជនជាតិរ៉ូហ៊ីងយ៉ា ជាអំពើ “ប្រល័យពូជសាសន៍” និងជាការ “បោសសម្អាតជាតិសាសន៍”។
នៅក្នុងបទសម្ភាសន៍ពីក្រុងញូវយ៉ក ផ្សព្វផ្សាយនៅល្ងាចថ្ងៃពុធម្សិលមិញ ដែលលោកប្រធានាធិបតីបារាំង អេម៉ានុយអែល ម៉ាក្រុង បានបញ្ជាក់ថា បារាំងនឹងធ្វើជាអ្នកផ្តួចផ្តើមគំនិតគិតគូរអំពីវិបត្តិរ៉ូហ៊ីងយ៉ា ជាមួយនឹងបណ្តាប្រទេសជាដៃគូនៅក្នុងក្រុមប្រឹក្សាសន្តិសុខអង្គការសហប្រជាជាតិ។ បារាំងនឹងជំរុញឱ្យអង្គការសហប្រជាជាតិ ចេញសេចក្តីសម្រេចថ្កោលទោស និងធ្វើសកម្មភាព ដូចជា ស្នើសុំឱ្យបញ្ឈប់អំពើហិង្សាលើជនជាតិភាគតិចមួយក្រុមនេះ ព្រមទាំងបើកបណ្តាញមនុស្សធម៌។
សម្រាប់លោកប្រធានាធិបតីបារាំង អំពើបោសសម្អាតជាតិសាសន៍កំពុងកើតមាននៅក្នុងប្រទេសភូមា ! ដូច្នេះហើយបានជាបារាំងសន្យាត្រូវតែធ្វើអ្វី ម្យ៉ាង ដើម្បីថ្កោលទោសសកម្មភាពប្រល័យពូជសាសន៍នោះ។ ហើយមានតែសេចក្តីសម្រេចថ្កោលទោសរបស់អង្គការសហប្រជាជាតិទេ ទើបមានតម្លៃ និងមានឥទ្ធិពលខ្លាំង ព្រមទាំងអាចបើកផ្លូវឱ្យមានអន្តរាគមន៍ក្នុងក្របខ័ណ្ឌអង្គការប្រជាជាតិបាន។
ពេលនេះស្ថានភាពស្មុគស្មាញខ្លាំង ការចែកជំនួយប្រព្រឹត្តទៅយ៉ាងត្រដាបត្រដួស និងចាត់ចែងឡើងដោយទាហានបង់ក្លាដែស។ ក្រុមជំនួយមនុស្សធម៌ កាកបាតក្រហមរងការវាយប្រហារពីសំណាក់ជនអ្នកស្អប់ជនជាតិរ៉ូហ៊ីងយ៉ា រហូតមានស្លាប់ដល់ទៅ យ៉ាងហោចណាស់៩នាក់។ល។ និង។ល។
សូមបញ្ជាក់ថា មិនមែនតែបារាំងទេ ដែលបានបញ្ចេញទស្សនៈនិងប្រើពាក្យខ្លាំងៗធ្ងន់ៗ ស្តីពីអំពើហិង្សាលើជនជាតិរ៉ូហ៊ីងយ៉ានោះ នៅថ្ងៃពុធម្សិលមិញដែរ សហរដ្ឋអាមេរិកតាមរយៈប្រសាសន៍របស់អនុប្រធានាធិបតី លោក Mike Pence ក៏បានទាមទារដូចបារាំងដែរ ឱ្យក្រុមប្រឹក្សាសន្តិសុខអង្គការសហប្រជាជាតិ ធ្វើអន្តរាគមន៍ឱ្យឆាប់រហ័ស និងម៉ឺងម៉ាត់ ដើម្បីបិទបញ្ចប់អំពើហិង្សាដែលមានទម្រង់ជាអំពើដ៏សាហាវឃោរឃៅ។
ហ្វេសប៊ុកបានប្រកាសបិទខ្ទប់គណនី របស់ពួកឧទ្ទាមរ៉ូហ៊ីងយ៉ា
នរណាក៏ដឹងដែរ ថាប្រព័ន្ធសង្គមហ្វេសប៊ុក បានក្លាយជាឧបករណ៍សម្រាប់បំពងឃោសនាព័ត៌មានខ្លាំងណាស់ មិនថាពីសំណាក់ក្រុមអ្នកការពារជនជាតិភាគតិចរ៉ូហ៊ីងយ៉ា ឬខាងរដ្ឋាភិបាលនិងយោធាភូមាទេ។ រាល់សេចក្តីថ្លែងការណ៍ផ្លូវការ សុទ្ធផ្សព្វផ្សាយបង្ហោះចេញពីបណ្តាញសង្គម ហ្វេសប៊ុកទាំងអស់។
ថ្វីបើសេចក្តីប្រកាសរបស់ក្រុមហ៊ុនហ្វេសប៊ុក បានធ្វើឱ្យខាងរដ្ឋាភិបាលនិងយោធាភូមារីករាយបន្តិចមែន ប៉ុន្តែដោយពិតទៅនោះ សេចក្តីសម្រេចរបស់ហ្វេសប៊ុកគ្មានពាក់ព័ន្ធនឹងនយោបាយ ហើយក៏មិនមែនជាចម្លើយតបទៅនឹងសំណើរបស់ខាងណាដែរ។ បើតាមការពន្យល់បំភ្លឺរបស់ហ្វេសប៊ុក ប្រព័ន្ធសង្គមមួយនេះមាននយោបាយ យ៉ាងសាមញ្ញ និងច្បាស់លាស់របស់ខ្លួន ច្រានចេញពីបណ្តាញនូវរាល់គ្រប់ក្រុមជនណា ឬអង្គការណាដែលញុះញង់អំពើហិង្សា តាមរយៈការបិទខ្ទប់គណនីក្នុងប្រព័ន្ធហ្វេសប៊ុករបស់ក្រុមនោះ។
អញ្ចឹងហើយបានជាយើងឮ និងទទួលព័ត៌មានច្រើនមកថាមានអាក់ខោនរបស់ក្រុមអ្នកទទួលខុសត្រូវ អ្នកការពារបុព្វហេតុរ៉ូហ៊ីងយ៉ា ត្រូវគាំង នារយៈពេលប៉ុន្មានថ្ងៃចុងក្រោយនេះ។
ហ្វេសប៊ុក មិនមែនជាបណ្តាញផ្សព្វផ្សាយអំពើហិង្សា
អ្នកនាំពាក្យរបស់ហ្វេសប៊ុកបានបដិសេធរឿងនេះ និងបានអះអាងថា ហ្វេសប៊ុក មិនត្រូវការផ្តល់មេរៀន ឬថ្កោលទោសទង្វើរបស់ជនណាម្នាក់ឡើយ ! ហ្វេសប៊ុកចង់តែរក្សាសេរីភាពនៃការប្រើប្រាស់និងវត្តមាននៃអាក់ខោនរបស់ពួកអ្នកការពាររ៉ូហ៊ីងយ៉ាជានិច្ច ដោយលុបចោលតែខ្លឹមសារណាដែលមានបង្កភាពរន្ធត់ ដែលមានបង្កប់តែភាពញុះញង់ និងការចែកចាយមនោគមន៍វិជ្ជាហិង្សាប៉ុណ្ណោះ។
តាំងពីថ្ងៃទី ២៥ សីហា មក ជនជាតិរ៉ូហ៊ីងយ៉ា ជាង៤សែនពីរម៉ឺននាក់ នាំគ្នារត់ទីណាត់ទីណែង ទៅបង់ក្លាដែស ដើម្បីគេចពីកណ្តាប់ដៃដែកដ៏ហិង្សារបស់ពួកយោធាភូមា។ ក្រុមអ្នកការពាររ៉ូហ៊ីងយ៉ា បានចោទយោធាភូមាថា បានចាប់រំលោភ សម្លាប់ និងដុតបំផ្លាញភូមិឋានសេសសល់របស់ជនជាតិភាគតិចនៅ និងរបស់អង្គការមនុស្សធម៌។
ក្រុមហ៊ុនហ្វេសប៊ុកបានដឹងយ៉ាងច្បាស់ថា ក្រុមនេះបានប្រើប្រាស់ប្រព័ន្ធសង្គមហ្វេសប៊ុក ដើម្បីទាក់ទាញចំណាប់អារម្មណ៍ស្តីអំពី ហិង្សា និងការធ្វើទុក្ខមុកម្នេញ ដែលកំពុងកើតមាន។ នៅលើបណ្តាញសង្គម ដែលបណ្តាជនភូមាចូលចិត្តលេងខ្លាំង គេឃើញមានរូបត្លុកជាច្រើន ព្រមទាំងវីដេអូចំអកសារព័ត៌មានបរទេស និងពិសេសរូបយុវតីជ័យលាភីណូបែលសន្តិភាព ដែលរិះគន់ចំណាត់ការរបស់លោកស្រី អ៊ុងសានស៊ូជី ក្នុងវិបត្តិ ដែលសុទ្ធតែមានមានលក្ខណៈជ្រុលនិយម និងដើម្បីរ៉ូហ៊ីងយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ