នាយករដ្ឋមន្រ្តី បង់ក្លាដែសទាមទារឲ្យមានបង្កើតតំបន់សុវត្ថិភាពសម្រាប់ជនជាតិរ៉ូហ៊ីងយ៉ា
ភូមាកំពុងរងការរិះគន់ពីគ្រប់ទិស ដោយសារអំពើហិង្សា ដែលឈានទៅដល់ការរត់ចោលភូមិរបស់ជនជាតិរ៉ូហ៊ីងយ៉ា រាប់សែននាក់ ទៅក្នុងទឹកដីបង់ក្លាដែស។ នៅថ្ងៃព្រហស្បតិ៍ បន្ទាប់ពីប្រធានាធិបតី បារាំង លើកឡើងពីអំពើប្រល័យពូជសាសន៍ នៅភូមា នាយករដ្ឋមន្រ្តីបង់ក្លាដែស ឯណោះវិញ បានឡើងថ្លែងនៅអង្គការសហប្រជាជាតិ ទាមទារឲ្យភូមា បញ្ឈប់ការបោសសម្អាត បណ្តេញជនជាតិពិន្ធុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ពីលើវេទិកា ក្នុងមហាសន្និបាតអង្គការសហប្រជាជាតិ លោកស្រីនាយករដ្ឋមន្រ្តីបង់ក្លាដែស Sheikh Hasina បានអំពាវនាវ សុំឲ្យមានបង្កើតតំបន់សុវត្ថិភាពមួយ សម្រាប់ទទួលជនជាតិភាគតិចរ៉ូហ៊ីងយ៉ា ដែលបានរត់គេចចេញពី អំពើហិង្សា នៅរដ្ឋរ៉ាឃីន និងកំពុងកកកុញ នៅក្នុងជំរំជនភៀសខ្លួន ក្នុងទឹកដីបង់ក្លាដែស។ តាមយោបល់របស់ប្រមុខរដ្ឋាភិបាលបង់ក្លាដែស តំបន់សុវត្ថិភាពសម្រាប់ប្រជាជនភៀសខ្លួនរ៉ូហ៊ីងយ៉ា ត្រូវស្ថិតនៅក្នុងទឹកដីភូមា ហើយនិងត្រូវស្ថិតនៅក្រោមការគ្រប់គ្រងត្រួតពិនិត្យរបស់បេសកកម្មរបស់អង្គការសហប្រជាជាតិ។
សព្វថ្ងៃនេះ ទឹកដីភាគខាងត្បូងរបស់បង់ក្លាដែស ដែលមានព្រំដែនជាប់ជាមួយភូមា មានជនភៀសខ្លួនរ៉ូហ៊ីងយ៉ាជាង ៨សែននាក់។ នេះបើតាមលោកស្រីនាយករដ្ឋមន្រ្តីបង់ក្លាដែស។ ថ្លែងទៅកាន់មហាសន្និបាតអង្គការសហប្រជាជាតិ ប្រមុខរដ្ឋាភិបាលបង់ក្លាដែសបានទាមទារសុំឲ្យភូមាបញ្ឈប់ការបោសសម្អាតជនជាតិពិន្ធុ។ នាយករដ្ឋមន្រ្តីបង់ក្លាដែស បរិហាររិះគន់ផងដែរ ចំណាត់ការរបស់អាជ្ញាធរភូមា ដែលបានបង្កប់រាយមីន នៅតាមព្រំដែន ជាមួយបង់ក្លាដែស ក្នុងគោលដៅទប់ស្កាត់កុំឲ្យជនជាតិរ៉ូហ៊ីងយ៉ា ដែលរត់ចូលទៅក្នុងទឹកដីបង់ក្លាដែស អាចត្រលប់ចូលទៅភូមាវិញ។
នៅថ្ងៃអង្គារ កន្លងទៅ នៅក្នុងសង្កថា ជាភាសាអង់គ្លេស ដែលលោកស្រីបានឡើងថ្លែងជាសាធារណៈ លោកស្រីអ៊ុងសាន ស៊ូជី ប្រមុខរដ្ឋាភិបាលស៊ីវិលភូមា មិនបាននិយាយចំៗ ឈ្មោះជនជាតិរ៉ូហ៊ីងយ៉ាសូម្បីមួយដង។ ប៉ុន្តែ លោកស្រី បានអះអាងធានាថា ភូមាត្រៀមខ្លួនរួចហើយ ដើម្បីទទួលយកវិញ ប្រជាជនកាន់សាសនាអ៊ីស្លាម ដែលបានរត់គេចចេញពីអំពើហិង្សានៅរដ្ឋរ៉ាឃីន។ នៅក្នុងសង្កថា លោកស្រីអ៊ុងសាន ស៊ូជី ជ័យលាភី ណូបែលសន្តិភាព ប្រកាសថា នឹងទទួលធ្វើមាតុភូមិនិវត្តប្រជាជនកាន់សាសនាអ៊ីស្លាម ប្រមាណ ៤សែននាក់ ដែលបានរត់ទៅជ្រកកោន នៅទឹកដីបង់ក្លាដែស។ ចំនួននេះ គឺពាក់កណ្តាល នឹងចំនួនដែលលោកស្រីនាយករដ្ឋមន្រ្តីបង់ក្លាដែស លើកឡើងខាងដើម ដែលថា មានប្រជាជនរ៉ូហ៊ីងយ៉ា ប្រមាណ ៨សែននាក់ កំពុងស្ថិតនៅក្នុងទឹកដី បង់ក្លាដែស ដោយសារតែអំពើហិង្សានៅភូមា។
មួយវិញទៀតសំណើរបស់លោកស្រីអ៊ុងសាន ស៊ូជី ហាក់មិនសូវច្បាស់លាស់ ព្រោះគ្មានកំណត់ថ្ងៃវិលត្រលប់ ផ្ទុយពីនេះ មានបង្កប់ដោយលក្ខខណ្ឌ នៅត្រង់ថា ការទទួលយកជនជាតិរ៉ូហ៊ីងយ៉ានឹងធ្វើឡើងក្រោមការត្រួតពិនិត្យ ផ្ទៀងផ្ទាត់ លើក្រដាសស្នាម មុននឹងភូមាអាចទទួលយកប្រជាជនដែលលោកស្រីអ៊ុងសាន ស៊ូជី នៅតែមិនទាន់យល់ថា ហេតុអ្វីបានជាពួកគេរត់គេចចេញពីភូមា ទៅទឹកដីបង់ក្លាដែសនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ