វិបត្តិរ៉ូហ៊ីងយ៉ា៖ ចិនស្នើដំណោះស្រាយបីដំណាក់
ចុះផ្សាយនៅថ្ងៃ៖
ស្តាប់ - ០៥:៥១
ការជ្រោមជ្រែងស្វែងរកដោះស្រាយឱ្យវិបត្តិរ៉ូហ៊ីងយ៉ាបានចាប់អណ្តែតឡើងលើកឆាកអន្តរជាតិ។ ជំនួបកំពូលអាស៊ី-អឺរ៉ុប ដែលបានចាប់បើកនៅថ្ងៃចន្ទនេះ សម្រាប់រយៈពីរថ្ងៃ បានជួបជជែកច្រើន អំពីការធ្វើមាតុភូមិនិវត្តន៍ជនជាតិរ៉ូហ៊ីងយ៉ាមកភូមាវិញ។ ចំណែកចិនក៏បានលើកសំណើបីចំណុច ដែលអាចនាំភូមា និងបង់ក្លាសដែស ឱ្យចាកចេញពីភាពទ័លច្រកអន្តោប្រវេសន៍បាន។
ជំនួបកំពូលអាស៊ី-អឺរ៉ុបថ្ងៃនេះ ជាវេទិកាអន្តរក្រសួងលើកទី ១៣ នៃបណ្តាប្រទេសនៅអឺរ៉ុបនិងនៅអាស៊ី បានទទួលការចូលរួមជាង៥០ប្រទេស។ ជំនួប “ពិភាក្សាអាស៊ី-អឺរ៉ុប” ឬហៅកាត់ថា ASEM តែងរៀងចំធ្វើឡើង ជារៀងរាល់ពីរឆ្នាំម្តង ដើម្បីរឹតចំណងទំនាក់ទំនងនយោបាយ និងសេដ្ឋកិច្ច រវាងទ្វីបទាំងពីរ។ ប៉ុន្តែនៅឆ្នាំនេះ ជំនួបមានលក្ខណៈពិសេសដោយភាគីអឺរ៉ុបបានស្នើ ឧទ្ទិសវេទិកានេះដល់បញ្ហារ៉ូហ៊ីងយ៉ា។
អឺរ៉ុបមកលើកចិត្ត មិនមែនមកដាក់សម្ពាធ
ជំហរដ៏ចម្បងរបស់អឺរ៉ុប គឺរក្សាអន្តរកាលប្រជាធិបតេយ្យនៅភូមា ដែលអាចផុយបាក់ដោយសារវិបត្តិរ៉ូហ៊ីងយ៉ា។ តាមរយៈប្រសាសន៍របស់លោកស្រី ប្រមុខការទូតសហភាពអឺរ៉ុប Federica Mogherini ដែលទើបបានជួបពិភាក្សារួចជាមួយលោកស្រីប្រមុខការទូតភូមា អ៊ុង សានស៊ូជី អឺរ៉ុបគ្មានជំហរនយោបាយជ្រៀតជ្រែក ឬចង់ដាក់សម្ពាធលើភូមា និងរដ្ឋាភិបាលស៊ីវិលថ្មីថ្មោងនេះទេ ប៉ុន្តែការដែលអឺរ៉ុបមកជជែកពិភាក្សាជាមួយភូមា រឿងរ៉ូហ៊ីងយ៉ាថ្ងៃនេះ មកពីចង់ដើរតួជាអ្នកបើកផ្លូវ បើកឱកាសឱ្យមានកិច្ចចរចា។
វេទិកាថ្ងៃនេះ គឺជាការលើកទឹកចិត្តភូមា និងបង់ក្លាដែស ធ្វើការរួមគ្នា ចូលតុចរចាគ្នា។ ជាការចរចា ដោយមានការគាំទ្រពីសហភាពអឺរ៉ុប និងសហគមន៍អន្តរជាតិ ដើម្បីឈានទៅសម្រេចការចុះកិច្ចព្រមព្រៀងស្តីអំពីការបញ្ជូនជនភៀសខ្លួនរ៉ូហ៊ីងយ៉ាពីបង់ក្លាដែស ឱ្យត្រលប់មកភូមា ជាដីកំណើតរបស់ពួកគេវិញ។ ឯចំណែករដ្ឋមន្ត្រីការបរទេសបារាំង ដែលអញ្ជើញទៅចូលរួមក្នុងវេទិកានោះដែរ បានផ្តល់តម្លៃខ្លាំងដល់ស្វែងរកច្រកផ្តល់ជំនួយមនុស្សធម៌ដល់ជនភៀសខ្លួន។
តាំងតែពីខែសីហាមក មានជនរ៉ូហ៊ីងយ៉ា ជាងកន្លះលាននាក់ រស់នៅរដ្ឋរ៉ាក់ឃីន ភាគខាងលិចប្រទេសភូមា បាននាំគ្នារត់គេចពីប្រតិបត្តិការយោធាបង្ក្រាបដ៏ហិង្សា ទាំងហ្វូងៗសំដៅប្រទេសបង់ក្លាដែស ជិតខាង ដែលមានទំនៀមទំលាប់ប្រពៃណីសាសនាអ៊ីស្លាមដូចគ្នា។ ប៉ុន្តែបញ្ហានៅត្រង់ថា បង់ក្លាដែលលែងមានសមត្ថភាពទទួលពួកគេ ព្រោះបង់ក្លាដែសបានទទួលជនភៀសខ្លួនរ៉ូហ៊ីងយ៉ាមួយលាននាក់រួចទៅកាលពីឆ្នាំទៅ។ ទើបវិបត្តិនេះបានក្លាយជាបញ្ហាមនុស្សធម៌ដ៏ធ្ងន់ធ្ងរបំផុត មិនធ្លាប់មាននៅក្នុងប្រវត្តិមនុស្សជាតិ។
បង់ក្លាដែសប្រទេសអ្នកទទួលជនភៀសខ្លួនបានប្រឹងនិងបន្តចរចាជាមួយភូមារហូតមក ដើម្បីបញ្ជូនជនជាតិរ៉ូហ៊ីយ៉ាត្រលប់ទៅកន្លែងកំណើតវិញ ប៉ុន្តែការចរចាមានដំណើរដូចអូសឬស្សីបញ្ច្រាសចុង។ ខាងយោធាភូមាបដិសេធសំណើរបស់បង់ក្លាដែស។
ភូមា-បង់ក្លាដែស ទទួលយកដំណោះស្រាយរបស់ចិន
ក្នុងឱកាសមកបំពេញទស្សនកិច្ច និងចូលរួមជំនួបកំពូលអាស៊ីអឺរ៉ុបនេះ លោករដ្ឋមន្ត្រីការបរទេសចិន វង់ យី ក៏បានកាន់គម្រោងដំណោះស្រាយ បីដំណាក់មកជាមួយផង។
សម្រាប់លោកប្រមុខការទូតចិន ដំណាក់កាលទីមួយ ត្រូវមានការឈប់បាញ់ទាំងស្រុង ដើម្បីឱ្យប្រជាពលរដ្ឋអាចរស់នៅបានដោយសន្តិភាព និងគ្មានការភ័យភិតរុញច្រានឱ្យរត់ភៀសខ្លួន។ មានការឈប់បាញ់ហើយ ត្រូវមានការចរចាទ្វេភាគីរវាងភូមានិងបង់ក្លាដែសទៀត ដើម្បីរកច្រកចេញ។ ហើយដំណាក់កាលទីបី ដែលជាដំណាក់កាលចុងក្រោយ គឺប្រទេសទាំងពីរត្រូវធ្វើការរួមគ្នាស្តីពីការស្រាយជម្លោះសម្រាប់រយៈពេលវែង ពោលគឺកាត់បន្ថយភាពក្រីក្រនៅរដ្ឋរ៉ាឃីន ដោយមានជំនួយអន្តរជាតិ។
ស្ថានភាពពេលនេះ ហាក់សឹងអាចចាត់ទុកបានថាជាដំណាក់កាលទីមួយហើយ ! ដូច្នេះដល់វេលាដែលភាគីភូមានិងបង់ក្លាដែស ចាប់ផ្តើមគិតគូរជជែកគ្នាអំពី ការវិលត្រលប់របស់ជនភៀសខ្លួនហើយ។ ហើយបើមានការព្រមព្រៀងគ្នា គេត្រូវចុះហត្ថលេខាភ្លាម ! នេះជាការគូសបញ្ជាក់បន្ថែមរបស់លោក វង់ យី ដែលក៏បានអំពាវនាវឱ្យសហគមន៍អន្តរជាតិ និងអង្គការសហប្រជាជាតិជួយចូកជួយចែវ រៀបចំលក្ខខណ្ឌចាំបាច់ និងសម្រួលស្ថានការណ៍ឱ្យ ប្រទេសទាំងពីរឱ្យសម្រេចបំណងនេះបាន។
ដោយគ្មានការភ្ញាក់ផ្អើល សំណើរបស់ចិននេះ ត្រូវបានបង់ក្លាដែសនិងភូមា ព្រមទទួលយកហើយ ! ព្រោះចិនជាអ្នកគាំទ្រដ៏សំខាន់របស់ភូមា ដែលឯកាលើឆាកអន្តរជាតិ និងជាអ្នកវិនិយោគលំដាប់ទីមួយនៅក្នុងប្រទេសភូមា។ កាលពីសប្តាហ៍មុនទៀត ចិនបានចេញមុខជំទាស់និងរារាំងមិនឱ្យអង្គការសហប្រជាជាតិចេញសេចក្តីសម្រេចបានថ្កោលទោសភូមាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ