លោកណាហ្ស៊ីប រ៉ាហ្សាក់ប្រកាសរំលាយសភាម៉ាឡេស៊ី
ចុះផ្សាយនៅថ្ងៃ៖
ស្តាប់ - ០៦:៣២
នាយករដ្ឋមន្រ្តីម៉ាឡេស៊ី លោកណាហ្ស៊ីប រ៉ាហ្សាក់ នៅថ្ងៃសុក្រទី ៦មេសា បានប្រកាស ថា លោកនឹងរំលាយសភា នៅថ្ងៃសៅរ៍ស្អែក ដើម្បី រៀបចំការបោះឆ្នោតមុនកាលកំណត់ដែលត្រូវធ្វើឡើង នៅពេលប៉ុន្មានសប្តាហ៍ខាងមុខ។ លោកណាហ្ស៊ីប រ៉ាហ្សាក់ នឹងឈរឈ្មោះ ជាថ្មី សម្រាប់អាណត្តិទី៣របស់លោក ដោយត្រូវប្រកួតប្រជែងជាមួយអតីតនាយករដ្ឋមន្រ្តី ជើងចាស់ និងមានប្រជាប្រិយភាព លោកមហាធារមហាម៉េដ។
ការប្រកាសរបស់នាយករដ្ឋមន្រ្តី ដើម្បី រំលាយសភា នៅថ្ងៃស្អែក នឹងបើកផ្លូវឲ្យមានការរៀបចំបោះឆ្នោតមុនកាលកំណត់។ ដោយពិតទៅត រឿងរំលាយសភា ម៉ាឡេស៊ី ដើម្បីរៀបចំការបោះឆ្នោតមុនកាលកំណត់ ត្រូវបានគេរំពឹងទុកថា នឹងអាចកើតមានតាំងពីឆ្នាំមុនម្ល៉េះ ដោយសារតែរឿងអាស្រូវពុករលួយ ផ្ទាល់ខ្លួន របស់លោកនាយករដ្ឋមន្រ្តីម៉ាឡេស៊ី។
តាំងពីឆ្នាំ ២០១៥ម្ល៉េះ លោកណាហ្ស៊ីប រ៉ាហ្សាក់ បានរងការចោទប្រកាន់ថា បាន កេងយក លួចយកលុយរដ្ឋ ពីមូលនិធិដែលបង្កើតឡើង សម្រាប់ការវិនិយោគ អភិវឌ្ឍម៉ាឡេស៊ី។ អាជ្ញាធររបស់ប្រទេសបី គឺសិង្ហបុរី អាមេរិក ហើយនិងចុងក្រោយប្រទេសស្វ៊ីស កំពុងបើកការស៊ើបអង្កេតទៅលើរឿងនេះ។ តុលាការអាមេរិកផ្ទាល់ បានរកឃើញថា ទឹកប្រាក់ជាង ៧០០លានដុល្លារ ត្រូវបានផ្ទេរចេញពីមូលនិធិអភិវឌ្ឍម៉ាឡេស៊ី ទៅគណនីផ្ទាល់ខ្លួនរបស់លោក លោកណាហ្ស៊ីប រ៉ាហ្សាក់ ដែលជាស្ថាបនិករបស់មូលនិធិ។ នាយករដ្ឋមន្រ្តីម៉ាឡេស៊ីបានបដិសេធការចោទប្រកាន់ និងថា ទឹកប្រាក់ជាង ៧០០លានដុល្លារ តាមពិតជាអំណោយរបស់មិត្តជាសេដ្ឋី អារ៉ាប៊ី សាអូឌីត ដែលបានផ្តល់ឲ្យលោកសម្រាប់ធ្វើយុទ្ធនាការឃោសនាបោះឆ្នោតនៅម៉ាឡេស៊ី។ លោករ៉ាហ្សាក់ នៅបានទម្លាក់កំហុសលើប្រទេសលោកខាងលិច ថា ជាអ្នកប្រឌិតរឿងនេះឡើង ក្នុងគោលបំណង ធ្វើឲ្យលោកធ្លាក់ចេញពីអំណាចតែប៉ុណ្ណោះ។
សូមអាន៖ម៉ាឡេស៊ី៖បាត់លុយ៤ពាន់លានដុល្លាររបស់ធនាគារអភិវឌ្ឍន៍ម៉ាឡេស៊ីទីមួយ 1MDB
រឿងអាស្រូវពុករលួយ ដែលមានលោកជាចុងចោទកើតមានតាំងពីឆ្នាំ ២០១៥ ប៉ុន្តែ លោកណាហ្ស៊ីប រ៉ាហ្សាក់ បានក្រាញ មិនព្រមប្រកាសរំលាយសភាភ្លាមនោះទេ។ លោកបានពន្យារពេល រហូតមកដល់ថ្ងៃនេះ ក្នុងបំណងចំណេញពេល រៀបចំក្រឡានយោបាយដែលនឹងអាចធ្វើឲ្យលោកឈ្នះឆ្នោត កាន់តំណែងជានាយករដ្ឋមន្រ្តីនៅអាណត្តិទី៣ បន្តទៀត។
តាមគម្រោង នៅក្រោយការប្រកាសរំលាយសភា គណៈកម្មការបោះឆ្នោត មានពេលពីរខែ សម្រាប់រៀបចំការបោះឆ្នោត។ គេរំពឹងថា ការបោះឆ្នោត សភានឹងអាចប្រព្រឹត្តទៅ នៅមុនថ្ងៃទី ១៥ឧសភា គឺគេត្រូវរៀបចំឲ្យបានមុនពិធីបុណ្យតមអាហាររបស់ប្រជាជន កាន់សាសនាអ៊ីស្លាម ដែលតំណាងឲ្យ៦០ភាគរយនៃប្រជាជនសរុបរបស់ម៉ាឡេស៊ី ដែលមានប្រមាណ ៣០លាននាក់។
ការបោះឆ្នោត សភាលើកនេះសំខាន់ និងពិសេសប្លែកខុសពីការបោះឆ្នោតលើកមុនៗ នៅត្រង់ថា រណសិរ្ស ជាតិ ដែលជាគណបក្សចម្រុះ របស់ណាហ្ស៊ីប រ៉ាហ្សាក់ ដែលដឹកនាំ ប្រទេសម៉ាឡេស៊ី តាំងពីទទួលឯករាជ្យ ពីអង់គ្លេស នៅឆ្នាំ ១៩៥៧ កំពុងត្រូវប្រជែងខ្លាំង ជាលើកទី១ ពីគណបក្សប្រឆាំងដែលកំពុងដឹកនាំដោយបុគ្គលដ៏សំខាន់គឺ លោកមហាធា មហាម៉េដ ដែលតាមពិតទៅធ្លាប់ជាអ្នកទទួលខុសត្រូវជាន់ខ្ពស់ម្នាក់របស់បក្សកាន់អំណាច។
លោកមហាធារ មហាម៉េដ ដែលធ្លាប់ធ្វើជានាយករដ្ឋមន្រ្តី ម៉ាឡេស៊ី ជាង២០ ឆ្នាំ និងធ្លាប់ជាគ្រូបណ្តុះបណ្តាលផ្ទាល់របស់លោកនាយករដ្ឋមន្រ្តី ណាហ្ស៊ីប រ៉ាហ្សាក់។ ប៉ុន្តែ រឿងអាស្រូវពុករលួយ របស់លោកណាហ្ស៊ីប រ៉ាហ្សាក់ នៅឆ្នាំ ២០១៥ បានធ្វើឲ្យលោកមហាម៉េដ សម្រេចដើរចេញពីបក្សកាន់អំណាច ដើម្បី ទៅចូលរួមចាប់ដៃជាមួយ ក្រុមប្រឆាំង បង្កើតបក្សថ្មីមួយ ឈ្មោះថា សម្ព័ន្ធនៃក្តីសង្ឃឹម។ ទោះជាធ្លាប់រងការរិះគន់ ថា ជាមេដឹកនាំផ្តាច់ការ និងពុករលួយ ប៉ុន្តែ លោកមហាធារ មហាម៉េដ ត្រូវបានប្រជាជនម៉ាឡេស៊ី ជាទូទៅ ចាត់ទុកថា ជាមេដឹកនាំម្នាក់ ដែលបានផ្លាស់ប្តូរមុខមាត់ របស់ម៉ាឡេស៊ី ពីប្រទេសដែលមានសេដ្ឋកិច្ចអន់ថយ ទៅជាប្រទេស ដែលមានកំណើនសេដ្ឋកិច្ច ដ៏សំខាន់មួយ នៅតំបន់អាស៊ីអាគ្នេយ៍។
គណបក្សប្រឆាំងរិះគន់ច្បាប់ពុះបែងចែកមណ្ឌលបោះឆ្នោត
២ឆ្នាំ ចុងក្រោយនេះ លោក រ៉ាហ្សាក់ និងគណបក្សចម្រុះរបស់លោកបានប្រើគ្រប់មធ្យោបាយដើម្បី បង្កើត យុទ្ធសាស្រ្ត រៀបចំក្រឡាដើរ យ៉ាងម៉េច ដើម្បី បំបាក់កម្លាំងរបស់គណបក្សបក្សប្រឆាំង និងដើម្បី ជួយ ឲ្យគណបក្សរបស់លោកឈ្នះឆ្នោតជាថ្មី។
នៅឆ្នាំ ២០១៥ មេដឹកនាំបក្សប្រឆាំង ដ៏ល្បីឈ្មោះរបស់ម៉ាឡេស៊ី គឺលោកអាន់វ៉ា អ៊ីប្រាហ៊ីម ត្រូវបានតុលាការផ្តន្ទាទោស ជាថ្មីម្តងទៀត ឲ្យជាប់ពន្ធនាគារ៥ឆ្នាំ ក្នុងបទស្រឡាញ់ភេទដូចគ្នា។ លោកណាហ្ស៊ីប រ៉ាហ្សាក់ ធ្លាប់សង្ឃឹមថា នឹងអាចទទួលបានជ័យជំនះដោយស្រួល នៅពេលដែលបក្សប្រឆាំងបែកបាក់ គ្មានមេដឹកនាំពិតប្រាកដ។ ប៉ុន្តែ នៅពេលដែលឃើញមហាធារ មហាម៉េដ ជាអតីតនាយករដ្ឋមន្រ្តី និងធ្លាប់ជាគ្រូបណ្តុះបណ្តាលរបស់ខ្លួនទៅចូលរួមជាមួយបក្សប្រឆាំង លោកណាហ្ស៊ីប រ៉ាហ្សាក់ ក៏កើតមានគំនិតថ្មី បង្កើតយុទ្ធសាស្រ្តថ្មី។ នៅថ្ងៃទី២៩មីនា គណបក្សកាន់អំណាច ដែលមានសំឡេងភាគច្រើននៅសភាបានបោះឆ្នោត ច្បាប់ដ៏ចម្រូងចម្រាសពីរ គឺច្បាប់ដែលពុះ បែងចែកជាថ្មី ទំហំមណ្ឌលបោះឆ្នោត ហើយនិងច្បាប់ប្រឆាំងនឹងការចុះផ្សាយព័ត៌មានមិនពិត ដែលគេរិះគន់ថា បង្កើតឡើងដើម្បីបំបិទមាត់របស់ក្រុមប្រឆាំង និងអ្នកកាសែត ដែលអាចសរសេររឿងអាស្រូវ កេងបន្លំលុយរដ្ឋរបស់លោករ៉ាហ្សាក់។ ទៅតាម ច្បាប់បែងចែកមណ្ឌលបោះឆ្នោតថ្មី ចំនួនមនុស្ស បោះឆ្នោត នៅក្នុងមណ្ឌលដែលគាំទ្រគណបក្សប្រឆាំងនឹងកើនឡើង ប៉ុន្តែ អាសនៈ នៅតែដដែល គ្មានកើនឡើង ក្នុងពេលដែលមណ្ឌលដែលគណបក្សកាន់អំណាចធ្លាប់តែឈ្នះឆ្នោត ត្រូវបានបន្ថយចំនួនមនុស្សមកវិញ។
ដោយរៀបចំ ពុះចែកសាជាថ្មី មណ្ឌលបោះឆ្នោត គណបក្សកាន់អំណាច នឹងនៅតែអាចទទួលបានអាសនៈច្រើន នៅសភា នោះបើទោះបីជាគណបក្សមិនបានទទួលសំឡេងគាំទ្រ ច្រើន នៅទូទាំងប្រទេសក៏ដោយ។ នៅក្រោយការបោះឆ្នោតរបស់សភា លោកមហាធារ មហាម៉េដ បានបរិហារ រិះគន់ លោកណាហ្ស៊ីប រ៉ាហ្សាក់ ថា ជាមនុស្សបាតផ្សារ និងសត្វចម្លែក។
មួយវិញទៀត លោកណាហ្ស៊ីប រ៉ាហ្សាក់នៅពីរឆ្នាំចុងក្រោយនេះ បានអនុវត្តនយោបាយជាច្រើន ដើម្បី ទាក់ទាញសំឡេងឆ្នោតពីប្រជាជនម៉ាឡេ អ្នកកាន់សាសនាអ៊ីស្លាម ដែលតំណាងឲ្យ៦០ភាគរយនៃប្រជាជនសរុបរបស់ម៉ាឡេស៊ី។ លោកធ្លាប់បានសន្យាថា នឹងបង្កើតតំណែង មុខនាទីសាធារណៈ ដល់ទៅជិត ២លាន សម្រាប់ប្រជាជនម៉ាឡេ ដែលរហូតមកដល់ពេលនេះ មិនសូវបានទទួលប្រយោជន៍ច្រើន បើប្រៀបធៀបនឹងជនជាតិ ចិន ដែលមានចំនួន ប្រមាណ ២៦ភាគរយ នៃប្រជាជនសរុបរបស់ម៉ាឡេស៊ី។ ដើម្បី ទាក់ទាញសំឡេងពីជនជាតិចិន លោករ៉ាហ្សាក់នៅធ្លាប់លើកឡើងថា ជនជាតិចិន នឹងអាចរួចផុតពីការធ្វើបាប រើសអើង បើសិនពួកគេបោះឆ្នោតគាំទ្របក្សរបស់លោក។ អ្នកវិភាគមួយចំនួនវាយតម្លៃថា លោករ៉ាហ្សាក់ កំពុងបង្កើតយុទ្ធសាស្រ្តបំបែកបំបាក់ប្រជាជនម៉ាឡេស៊ី ដែលគេមិនធ្លាប់ឃើញមានពីមុនមកនៅម៉ាឡេស៊ី ក្នុងគោលបំណងតែមួយគត់ គឺរក្សាអំណាចរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ