ចិន និងអាល្លឺម៉ង់រឹតចំណងពាណិជ្ជកម្មរវាងគ្នាដើម្បីទប់ទល់នឹងអាមេរិក
ចិន និងអាល្លឺម៉ង់បានចុះហត្ថលេខាលើកិច្ចព្រមព្រៀងពាណិជ្ជកម្មដែលមានតម្លៃ ២០ពាន់លានអឺរ៉ូ។ នៅក្នុងពិធីចុះហត្ថេលខានៅថ្ងៃម្សិលមិញ នៅទីក្រុងប៊ែរឡាំង លោកនាយករដ្ឋមន្រ្តីចិន លី ខឺឈាំង និងលោកស្រី នាយករដ្ឋមន្រ្តី អាល្លឺម៉ង់អង់ហ្គេឡា មែរកិល បានលើកឡើងពីសារៈសំខាន់នៃកិច្ចសហប្រតិបត្តិការអន្តរជាតិ ហើយ និង ការបើកទីផ្សារសេរី។ អាល្លឺម៉ង់ និងចិន ចង់រឹតចំណងសេដ្ឋកិច្ចនឹងគ្នា នៅពេលដែលអាមេរិករបស់លោកដូណាល់ ត្រាំ កំពុងដាក់របាំងពន្ធគយលើទំនិញ នាំចូលពីចិន ហើយនិងអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២៧
២០នាទី ដើម្បីចុះហត្ថលេខាលើកិច្ចព្រមព្រៀងចិន អាល្លឺម៉ង់ ដែលមានតម្លៃ ២០ពាន់លានអឺរ៉ូ។ ពិធីចុះហត្ថលេខាលើកិច្ចព្រមព្រៀងពាណិជ្ជកម្ម ធ្វើឡើង នៅទីក្រុងប៊ែរឡាំង នៅក្រោមអធិបតីភាពរបស់នាយករដ្ឋមន្រ្តី ចិន លោកលី ខឺឈាំង ហើយនិងលោកស្រី នាយករដ្ឋមន្រ្តីអាល្លឺម៉ង់ អង់ហ្គេឡា មែរកិល។
ចាប់តាំងពី២ឆ្នាំ មកនេះ ចិនបានក្លាយជាដៃគូ ពាណិជ្ជកម្មទី១របស់អាល្លឺម៉ង់។ ប៉ុន្តែ ក្នុងនាមជាប្រទេសនាំចេញ ដូចគ្នា ចិន អាល្លឺម៉ង់ ដែលឃើញថា គំរូពាណិជ្ជកម្មរបស់ខ្លួន កំពុងត្រូវប្រឈមនឹងការគំរាមកំហែង ដោយសាររបាំងពន្ធគយរបស់អាមេរិក ចង់រឹតចំណងពាណិជ្ជកម្ម រវាងគ្នា ដើម្បី រួមគ្នា តទល់ជាមួយក្រុងវ៉ាស៊ីនតោន។
ប៉េកាំង និងប៊ែឡាំងបានរួមគ្នារិះគន់ចំណាត់ការរបស់រដ្ឋបាលអាមេរិក ដែលទើបចាប់អនុវត្ត ដំឡើងពន្ធលើទំនិញនាំចូលពីចិន តាំងពីដើមខែកក្កដានេះ។ ចិន ដែលបានក្លាយជាប្រទេសដំបូង គេ ក្នុងបញ្ជីដំឡើងពន្ធគយរបស់អាមេរិក បានដើរនយោបាយការទូត ប្រមែរប្រមូល គ្រប់សម្ព័ន្ធមិត្តសេដ្ឋកិច្ច។ នៅសប្តាហ៍មុន ចិនបើកវេទិកាសេដ្ឋកិច្ចជាមួយ ប្រទេសនៅអឺរ៉ុបកណ្តាល និងខាងកើត ចំណែកនៅសប្តាហ៍ក្រោយ ចិន នឹងបើកជំនួបកំពូលជាមួយ សហភាពអឺរ៉ុបវិញម្តង។
នៅក្នុងសន្និសីទកាសែត នៅថ្ងៃចន្ទ លោកស្រីនាយករដ្ឋមន្រ្តីអាល្លឺម៉ង់ បានថ្លែងថា អាល្លឺម៉ង់ ហើយនិងចិន នៅតែគាំទ្រការដោះដូរសេរី ទៅតាមការកំណត់របស់អង្គការពាណិជ្ជកម្មពិភពលោក។
អាល្លឺម៉ង់ ចូលរួមជាមួយ ចិន ដើម្បី ការពារនយោបាយដោះដូរសេរី ប៉ុន្តែ ប៊ែរឡាំងក៏មិនចង់ចូលជិតស្និទ្ធខ្លាំង ជាមួយក្រុងប៉េកាំង ដែលតាមពិតមិនមែនជាសិស្សគំរូណាស់ណា ក្នុងរឿងដោះដូរពាណិជ្ជកម្មស្មើភាពគ្នានោះ។
ឆ្លើយតបនឹងការបារម្ភរបស់អ្នកទទួលខុសត្រូវអឺរ៉ុប ជាពិសេសរបស់លោកស្រីនាយករដ្ឋមន្រ្តីអាល្លឺម៉ង់ដែលចង់ឲ្យចិនបើកចំហរទីផ្សារសម្រាប់អ្នកវិនិយោគបរទេស លោកនាយករដ្ឋមន្រ្តីចិន លី ខឺឈាំងបានបញ្ជាក់ថា អំណើះតទៅ ក្រុមហ៊ុនអាល្លឺម៉ង់អាចចូលទៅវិនិយោគនៅទីផ្សារមូលប័ត្រ និងធានារ៉ាប់រង នៅប្រទេសចិន។ លោកលី ខឺឈាំង បានអំពាវនាវផងដែរ ឲ្យក្រុមហ៊ុនអាល្លឺម៉ង់ វិនិយោគកាន់តែច្រើន ខាងផ្នែកបច្ចេកវិទ្យាជាន់ខ្ពស់ នៅប្រទេសចិន ផ្ទាល់ ដោយមិនចាំបាច់ត្រូវផ្ទេរបច្ចេកវិទ្យាដូចមុននោះទេ។ ប្រមុខរដ្ឋាភិបាលចិនបាននិយាយធានាផងដែរថា ក្រុមហ៊ុនអាល្លឺម៉ង់ មិនត្រូវបារម្ភឡើយ ពីការលួចចម្លង ព្រោះថា អាជ្ញាធរចិននឹងមិនអនុគ្រោះដាច់ខាត អ្នកដែលលួចកម្មសិទ្ធិបញ្ញា។ សូមបញ្ជាក់ថា គឺការរំលោភ កម្មសិទ្ធិបញ្ញា ការលួចចម្លងបច្ចេកវិទ្យារបស់ក្រុមហ៊ុនអាមេរិកាំង នៅប្រទេសចិន ដែលជាដើមហេតុនៃការថ្នាំងថ្នាក់ អន់ចិត្តរបស់លោកដូណាល់ រហូតប្រកាសបើកសង្រ្គាមពាណិជ្ជកម្មជាមួយទីក្រុងប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ