ទស្សនៈកិច្ចលោកស្រីអង់ហ្គេឡា មែគែល នៅចិន
លោកស្រីអធិការបតីអាល្លឺម៉ង់ អង់ហ្គេឡា មែគែល កំពុងតែបំពេញទស្សនកិច្ច រយៈពេល២ថ្ងៃ នៅរដ្ឋធានីប៉េកាំងប្រទេសចិន ដែលទិសដៅនៃទស្សនកិច្ចនេះ គឺដើម្បីបើកទីផ្សារសេដ្ឋកិច្ច រវាងចិន និងអាល្លឺម៉ង់ ឲ្យកាន់តែទូលំទូលាយ។ គ្រាន់តែទៅដល់ភ្លាម កិច្ចសន្យាទិញយន្តហោះ Airbus ក្នុងទឹកប្រាក់ ១៥,៥ ពាន់លានអឺរ៉ូ ត្រូវបានប្រកាសជាឱឡាឬក។
ចុះផ្សាយនៅថ្ងៃ៖
ស្តាប់ - ០២:១៧
បន្ទាប់ពីលោកប្រធានាធិបតីចិន ស៊ី ជិនពីង បានធ្វើទស្សនកិច្ចយ៉ាងគគ្រឹកគគ្រេង នៅប្រទេសអង់គ្លេស កាលពីពេលថ្មីៗនេះ ឥឡូវដល់វេនលោកស្រី អង់ហ្គេឡា មែគែល ប្រមុខរដ្ឋាភិបាលអាល្លឺម៉ង់ វិញម្តង ដែលត្រូវធ្វើដំណើរទៅប្រទេសចិន។ នេះគឺជាដំណើរទស្សនកិច្ច រយៈពេល ២ថ្ងៃ ដែលលោកស្រីធ្វើឡើង ក្នុងគោលដៅ រឹតចំណងសេដ្ឋកិច្ច រវាងចិន និងអាល្លឺម៉ង់ ក៏ដូចជាសហភាពអឺរ៉ុបទាំងមូល។ ហើយនៅមិនប៉ុន្មានថ្ងៃទៀតនេះ លោកប្រធានាធិតីបារាំង ក៏នឹងអញ្ជើញទៅធ្វើទស្សនកិច្ច នៅចិនដែរ។
កិច្ចសន្យាធំៗ ដែលចិនបានចុះហត្ថលេខា នាពេលនេះ គឺ កិច្ចសន្យាទិញយន្តហោះ Airbus ធនមធ្យមប្រភេទA320 ចំនួន១០០គ្រឿង និងយន្តហោះធនធំប្រភេទ A330 ចំនួន៣០គ្រឿង ដែលគិតជាទឹកប្រាក់សរុប ប្រមាណជា១៥,៥ពាន់លានអឺរ៉ូ។ សូមបញ្ជាក់ថា ក្រុមហ៊ុន Airbus ជាក្រុមហ៊ុនចម្រុះ រវាងបារាំង អាល្លឺម៉ង់ និងអង់គ្លេស។ ក្រុមហ៊ុននេះ កំពុងតែប្រជែងទីផ្សារនៅចិន ជាមួយនឹងក្រុមហ៊ុន Boeing របស់អាមេរិក។
ក្រៅពីកិច្ចសន្យាទិញយន្តហោះ Airbus ដែលបានចុះ ក្នុងពេលទស្សនកិច្ច របស់លោកស្រីមែគែល នាពេលនេះ គឺនៅមានកិច្ចសន្យាពីរទៀត ទីមួយកិច្ចសន្យារវាង ក្រុមហ៊ុន Nokia របស់ហ្វាំងឡង់ ជាមួយនឹងក្រុមហ៊ុន China Mobile និងទីពីរ កិច្ចសន្យារបស់ក្រុមហ៊ុនផលិតរថយន្តអាល្លឺម៉ង់ Volkswagen និងធនាគារ ICBC របស់ចិនផងដែរ។
ជាការពិត ថ្វីត្បិតតែឆ្នាំនេះ សេដ្ឋកិច្ចចិន បានទទួលកំណើនទាបតិច មិនធ្លាប់មាន ខុសពីឆ្នាំមុនៗ ក៏ប៉ុន្តែចិននៅតែ ជាទីផ្សារដ៏សំខាន់ សម្រាប់សេដ្ឋកិច្ចពិភពលោក។ លោកស្រីអង់ហ្គេឡា មែគែលបានបញ្ជាក់ថា លោកស្រីមានទំនុកចិត្តលើសេដ្ឋកិច្ចរបស់ចិន ដែលត្រូវតែហ៊ានពុះពារនូវរបត់ថ្មី ដើម្បីឈរជើងឲ្យរឹងមាំ។ លោក លី កឺឈាំង នាយករដ្ឋមន្ត្រីចិន ធ្លាប់បានថ្លែងថា ចិនត្រូវការអភិវឌ្ឍន៍តម្លើងកម្រិតឧស្សាហកម្មរបស់ខ្លួន។ ដូច្នេះវា ជាការចាំបាច់ ដែលចិនត្រូវការ បទពិសោធន៍ បច្ចេកវិទ្យាជាន់ខ្ពស់ ដ៏ទំនើប របស់អាល្លឺម៉ង់។
សូមបញ្ជាក់ថា កន្លងមក សេដ្ឋកិច្ចចិន គឺជាសេដ្ឋកិច្ចបែបផលិតដើម្បីតែនាំចេញ ហើយពេលនេះ កំពុងជួបបញ្ហា ដោយសារការនាំចេញ ត្រូវធ្លាក់ចុះ។ មួយវិញទៀត វិស័យនាំចេញរបស់ចិន គឺជាការនាំចេញនូវផលិតផលសាមញ្ញាធម្មតា គុណភាពមធ្យម និងតម្លៃថោក។ របត់ថ្មីនៃសេដ្ឋកិច្ចចិន នាពេលនេះ គឺកំពុងតែបត់ក្បាល ទៅបំពេញឲ្យដល់ ការប្រើប្រាស់ក្នុងស្រុក ព្រមទាំងលើកកំពស់កម្រិតបច្ចេកវិទ្យានៃការផលិត ដើម្បីនាំចេញផលិតផលគុណភាពខ្ពស់ លក់បានថ្លៃ។ ជាមួយនឹង ចំនួនប្រជាជន ដ៏ច្រើនរបស់ចិន ព្រមទាំងកម្រិតជីវភាព កាន់តែធូរធា របស់ប្រជាជនចិន អឺរ៉ុប ក៏ដូចជាសហរដ្ឋអាមេរិក សម្លឹងឃើញទីផ្សារចិន ប្រៀបដូចជាឃ្មុំពេញក្បាលទឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ