បាក់ទំនប់នៅឡាវ ៖ ប្រជាជនមិនជឿលើតុល្យការរបស់រដ្ឋាភិបាល
ប្រតិបត្តិការស្វែងរងជនបាត់ខ្លួន ក្នុងហេតុការណ៍ធ្លាយទំនប់ទឹកនៅប្រទេសឡាវ បានចូលដល់ថ្ងៃទីបួន។ នៅថ្ងៃសុក្រនេះ ជនរងគ្រោះថ្មីម្នាក់ទៀត ទើបត្រូវសង្គ្រោះបាន ! ជាទារកតូចមួយជាប់កុនជាមួយម្តាយក្នុងខ្ទមកប់ទឹកភក់។ រូបភាពវីដេអូ ទារកស្រែកយំស្រង់ដោយក្រុមសង្គ្រោះថៃ ត្រូវបានចែករំលែកក្នុងប្រព័ន្ធសង្គមហ្វេសប៊ូក រាប់ពាន់ដង ក្នុងរយៈពេលតែពីរបីម៉ោង។ ទន្ទឹមនឹងសារអរគុណចំពោះទឹកចិត្តរបស់ក្រុមសង្គ្រោះថៃ ប្រជាពលរដ្ឋឡាវបានសម្តែងកំហឹងកាន់តែខ្លាំងឡើងៗខុសពីទម្លាប់ ប្រឆាំងនឹងអាជ្ញាធរក្រុងវៀងចន្ទ ដែលថាចំនួនជនគ្រោះស្លាប់បាត់បង់ជីវិត មានតែ២៧នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
បើតាមសេចក្តីថ្លែងការណ៍នៅថ្ងៃសុក្រនេះ ក្រុមសង្គ្រោះថៃ បានរកឃើញនិងសង្គ្រោះអ្នកភូមិឡាវ ចំនួន១៤នាក់ ប្រុសបួននាក់ ស្ត្រី៦នាក់ ក្នុងនោះម្នាក់មានផ្ទៃពោះផង និងកុមារ៤នាក់ ដែលបានរត់គេចពីទឹកជំនន់ ទៅតោងលើទីទួល អត់អាហារតាំងពីបួនថ្ងៃមក។ ជនរងគ្រោះដ៏គួរឱ្យកត់សម្គាល់ គឺរូបភាពក្មេងតូចមួយ យំរហាម ជាប់កុនលើចុងឈើ ទើបត្រូវជួយដោយអ្នកសង្គ្រោះថៃ ពរដើរកាត់ទឹកពីមុខអ្នកជាម្តាយ។
ជារូបភាពមនុស្សធម៌ប្រកបដោយនិម្មិត្តរូប ដែលប្រជាពលរដ្ឋឡាវទូទៅសូមថ្លែងអំណរគុណ ! រូបភាពនេះត្រូវបានបង្ហោះផ្សាយនិងចែកចាយតាមប្រព័ន្ធសង្គមយ៉ាងទូលំទូលាយនិងយ៉ាងលឿនរហ័ស ខុសពីទម្លាប់នៃរបបកុម្មុយនិស្តដែលតាំងពីជាច្រើនទសវត្សរ៍ មិនអនុគ្រោះឱ្យមានការទាមទារ ឬសារព័ត៌មានឯករាជ្យធ្វើការផ្សព្វផ្សាយអ្វីដោយងាយៗ។
ប៉ុន្តែទន្ទឹមនឹងអំណរនោះ អ្នកភូមិក៏បានចាប់ផ្ទុះកំហឹង ស្រែកចោទប្រកាន់អាជ្ញាធរ ថាកំពុងលាក់បាំងចំនួនជនរងគ្រោះ ដោយប្រកាសតុល្យការអ្នកស្លាប់តែ២៧នាក់។ គ្មាននរណាម្នាក់ជឿសោះឡើយ ចំពោះតួលេខផ្តល់ដោយរដ្ឋាភិបាលនេះទេ ! ច្បាស់មានស្លាប់ដល់ទៅរយនាក់ ព្រោះគ្រាន់តែនៅក្នុងភូមិ May មួយ មានមនុស្សបាត់ខ្លួនច្រើនណាស់ ! នេះបើតាមសំដីរបស់ពលរដ្ឋម្នាក់ ដែលសុំមិនបញ្ចេញឈ្មោះ។ អ្នកភូមិម្នាក់ទៀត បានបង្ហាញភាពសង្ស័យរបស់ខ្លួនថា កំហុគទឹកឡើងលឿនណាស់ មនុស្សតិចណាស់ដែលអាចរត់លឿនរកកន្លែងទួលទាន់នោះ។
សូមបញ្ជាក់ថា ក្រោយការបាក់ទំនប់ភ្លាម អាជ្ញាធរឡាវបានប្រកាសថាមានមនុស្សបាត់ខ្លួនជាងមួយរយនាក់។ ថ្ងៃបន្តបន្ទាប់មកនេះទៀត សារព័ត៌មានផ្លូវការ តែងតែបន្ទាបចំនួនជនរងគ្រោះផ្តល់ដោយសារព័ត៌មានបរទេស និងបានអះអាងថា ប្រើចំណាត់ការសង្គ្រោះបានប្រសើរបំផុត អស់ពីលទ្ធភាពហើយ។
នៅថ្ងៃសុក្រនេះ ក្រុមការងាររបស់ភ្នាក់ងារសារព័ត៌មានបារាំង AFP បានសាកល្បងចុះយកព័ត៌មានដល់កន្លែងកើតហេតុ ប៉ុន្តែអាជ្ញាធរបានបដិសេធមិនឱ្យចូល ដោយអះអាងមានតែយោធាឡាវប៉ុណ្ណោះដែលអាចចូលទៅបាន។
ឡាវប្រទេសដ៏ក្រីក្រមួយនៅតំបន់អាស៊ីអាគ្នេយ៍រំពឹងយ៉ាងខ្លាំង នារយៈពេលប៉ុន្មានឆ្នាំចុងក្រោយនេះលើការអភិវឌ្ឍទំនប់វារីអគ្គីសនី ដោយមិនខ្វល់អំពីបញ្ហាសុវត្ថិភាពនិងបរិស្ថាន។ គម្រោងទំនប់ទឹកដែលបាក់នេះមានតម្លៃជាង១ពាន់លានដុល្លារ និងជារបស់ក្រុមហ៊ុនឡាវជាមួយថៃនិងកូរ៉េខាងត្បូង។ ថៃបានផ្តល់ជំនួយសង្គ្រោះ ឯកូរ៉េខាងត្បូងបានប្រកាសផ្តល់ជំនួយបន្ទាន់១លានដុល្លារ ពាក់កណ្តាលជាសម្ភារៈ ពាក់កណ្តាលជាលុយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ