តើលោក អ៊ីមរ៉ាន ខាន់នឹងអាចដោះស្រាយជម្លោះចាស់ឆ្នាំ ជាមួយឥណ្ឌាបានដែរឬទេ?
ចុះផ្សាយនៅថ្ងៃ៖
ប្រមុខរដ្ឋាភិបាលឥណ្ឌា នៅថ្ងៃចន្ទដើមសប្តាហ៍នេះ បានទូរស័ព្ទទៅអបអរជ័យជំនះរបស់ លោកអ៊ីមរ៉ាន ខាន់ បន្ទាប់ពីគណបក្សចលនាយុត្តិធម៌របស់ អ៊ីមរ៉ាន ខាន់បានទទួលសំឡេងនាំមុខគេ នៅក្នុងការបោះឆ្នោតសភាប៉ាគីស្ថាន។ លោកអ៊ីមរ៉ាន ខាន់ ដែលកំពុងដើរបញ្ចុះបញ្ចូលគណបក្សដទៃទៀត ដើម្បីបង្កើតរដ្ឋាភិបាលចម្រុះធ្លាប់បាននិយាយនៅក្រោយការបោះឆ្នោតថា លោកចង់ដោះស្រាយជម្លោះទឹកដីជាមួយប្រទេសឥណ្ឌា តាមរយៈការចរចាការទូត។ នៅក្រោមការដឹកនាំរបស់រដ្ឋាភិបាលថ្មី របស់លោកអ៊ីមរ៉ាន ខាន់ តើប៉ាគីស្ថាន និងឥណ្ឌានឹងមានទំនាក់ទំនងល្អប្រសើរជាងមុន ឬផ្ទុយទៅវិញ រឹតតែតានតឹងនឹងគ្នាខ្លាំងជាងមុន ?
នៅក្នុងកិច្ចសន្ទនាតាមទូរស័ព្ទជាលើកទី១ជាមួយ លោកអ៊ីមរ៉ាន ខាន់ លោកនាយករដ្ឋមន្រ្តីឥណ្ឌា ណារិនដ្រា ម៉ូឌី បានបញ្ជាក់ប្រាប់អនាគតនាយករដ្ឋមន្រ្តីប៉ាគីស្ថានពីទស្សនៈរបស់លោកដែលចង់បានសន្តិភាព ហើយនិងការអភិវឌ្ឍន៍ នៅក្នុងប្រទេសជិតខាងរបស់ឥណ្ឌា។ តាមគណបក្សPTI លោកអ៊ីមរ៉ាន ខាន់វិញ បាននិយាយប្រាប់នាយករដ្ឋមន្រ្តីថា ជម្លោះរវាងប្រទេសទាំងពីរគួរតែដោះស្រាយតាមការចរចា។ នៅក្នុងសុន្ទរកថា ក្រោយការបោះឆ្នោត លោកអ៊ីមរ៉ាន ខាន់ធ្លាប់បានលើកឡើងរួចហើយ ពីឆន្ទៈរបស់លោកដែលចង់រកដំណោះស្រាយឲ្យជម្លោះដណ្តើមទឹកដី នៅតំបន់កាស្មៀរ ដែលជាប្រភព ដើមចមនៃសង្រ្គាមពីរលើក រវាងឥណ្ឌាហើយ និង ប៉ាគីស្ថាន។
នៅប្រទេសឥណ្ឌា លោកអ៊ីមរ៉ាន ខាន់ត្រូវបានគេស្ញប់ស្ញែងខ្លាំង នៅក្នុងនាមជាអតីតកីឡាករគ្រីកេត។ លោកធ្លាប់មានស្នាដៃ ដឹកនាំក្រុមកីឡាករជម្រើសជាតិគ្រីចកេតប៉ាគីស្ថានឲ្យឈ្នះពានរង្វាន់ពិភពលោក នៅឆ្នាំ១៩៩២។ ប៉ុន្តែ នៅក្នុងផ្នែកនយោបាយវិញ លោកអ៊ីមរ៉ាន ខាន់ត្រូវបានអ្នកនយោបាយឥណ្ឌាភាគច្រើន ជាពិសេស គណបក្សហិណ្ឌរបស់លោកនាយករដ្ឋមន្រ្តីណារិនដ្រា ម៉ូឌីតែម្តង មិនទុកចិត្ត ដោយសារតែជំហរនយោបាយរបស់លោក។
នៅក្នុងសំណុំរឿងកាស្មៀរ លោកអ៊ីមរ៉ាន ខាន់ធ្លាប់បាននិយាយថា បើសិនឥណ្ឌាបោះជំហានតែមួយ ជំហានមករកប៉ាគីស្ថាន នោះប៉ាគីស្ថាននឹងបោះជំហានរកវិញ ដល់ទៅពីរជំហានឯណោះ។ ពាក្យនេះអាចធ្វើឲ្យគេជឿថា អនាគតប្រមុខរដ្ឋាភិបាលថ្មីរបស់ប៉ាគីស្ថានពិតជាមានជំហរចង់ដោះស្រាយជម្លោះទឹកដីនៅតំបន់កាស្មៀរខ្លាំងណាស់។ ប៉ុន្តែ សម្រាប់ឥណ្ឌាវិញ ចេតនារបស់លោកអ៊ីមរ៉ាន ខាន់ ដែលចង់ដោះស្រាយជម្លោះទឹកដីនៅតំបន់កាស្មៀរ ដែលប្រទេសទាំងពីរនៅតែឈ្លោះដណ្តើមគ្នារហូតមកនេះ គឺមិនគ្រប់គ្រាន់ នឹងធ្វើឲ្យឥណ្ឌាត្រេកអរ ជឿជាក់នោះទេ។
ហេតុអ្វី បានជាលោកអ៊ីមរ៉ាន ខាន់ មិនអាចជាមេដឹកនាំប៉ាគីស្ថានដែលជួយកាត់បន្ថយភាពតានតឹងជាមួយឥណ្ឌានោះ?
ភាពធូរស្រាលរវាងប្រទេសសត្រូវជិតខាងទាំងពីរកើតមានឡើង មិនមែនអាស្រ័យទៅលើនាយករដ្ឋមន្រ្តីប៉ាគីស្ថាននោះទេ ប៉ុន្តែ វាអាស្រ័យទៅជំហរ និងឆន្ទៈចង់បានរបស់កងទ័ពប៉ាគីស្ថានទៅវិញទេ។ ទោះជាលែងដឹកនាំប្រទេសដូចមុន និងបើកផ្លូវឲ្យមានការបោះឆ្នោតជ្រើសរើសជនស៊ីវិលឲ្យដឹកនាំប្រទេសក្តី ក៏យោធាប៉ាគីស្ថាននៅតែជាអ្នកក្តោបក្តាប់អំណាច ពិតប្រាកដ និងដើរតួសំខាន់ក្នុងនយោបាយការបរទេស ជាពិសេស ជាមួយប្រទេសឥណ្ឌា ដែលប៉ាគីស្ថានបានផ្ទុះសង្រ្គាមប្រយុទ្ធគ្នា ដល់ទៅ៣លើក ចាប់តាំងពីឆ្នាំ ១៩៤៧មក។
មន្រ្តីជាន់ខ្ពស់របស់គណបក្សកាន់អំណាចឥណ្ឌាបានវាយតម្លៃថា លោកអ៊ីមរ៉ាន ខាន់ជាអាយ៉ងដែលនឹងធ្វើនយោបាយទៅតាមការញាក់របស់មេយោធាប៉ាគីស្ថាន។ នៅប៉ាគីស្ថាន លោកអ៊ីមរ៉ាន ខាន់ធ្លាប់ត្រូវបានបក្សដទៃទៀត ជាពិសេសគណបក្សកាន់អំណាចរបស់លោកអតីតនាយករដ្ឋមន្រ្តីណាវ៉ា ស្ហារីហ្វ ចោទប្រកាន់បានឈ្នះឆ្នោត ដោយសារតែមានអន្តរាគមន៍គាំទ្រ ជួយលួចបន្លំ សន្លឹកឆ្នោតពីសំណាក់យោធាប៉ាគីស្ថាន។
ទាំងលោកអ៊ីមរ៉ាន ខាន់ ហើយនិងកងទ័ពប៉ាគីស្ថានបានទាត់ចោលការចោទប្រកាន់។ លោកអ៊ីមរ៉ាន ខាន់បដិសេធការចោទប្រកាន់ ប៉ុន្តែ សំណួរសួរថា តើលោកអ៊ីមរ៉ាន ខាន់ហ៊ានធ្វើនយោបាយណាមួយ ដែលផ្ទុយពីការចង់បានរបស់យោធាប៉ាគីស្ថានដែរទេ? លោកណាវ៉ា ស្ហារីហ្វដែលត្រូវបានតុលាការទម្លាក់ចេញពីតំណែងនាយករដ្ឋមន្រ្តីប៉ាគីស្ថាន និងដែលពេលនេះ កំពុងជាប់ឃុំ ក្នុងបទចោទប្រកាន់ប្រព្រឹត្តអំពើពុករលួយ ធ្លាប់ជាមនុស្សស្និទ្ធនឹងកងទ័ពប៉ាគីស្ថាន។ គេជឿថា បើគ្មានភ្លើងខៀវពីកងទ័ព គណបក្សរបស់លោកណាវ៉ា ស្ហារីហ្វ ក៏មិនអាចឈ្នះឆ្នោតនៅឆ្នាំ ២០១៣ដែរ។ ប៉ុន្តែ លោកណាវ៉ា ស្ហារីហ្វ ដែលបានចាប់ផ្តើម ស្តារកសាងទំនាក់ទំនងល្អឡើងវិញ ជាមួយ ឥណ្ឌា ដែលមិនធ្លាប់មាននៅក្នុងប្រវត្តិទំនាក់ទំនងរវាងប្រទេសគូសត្រូវទាំងពីរ ត្រូវបានគេផ្តួលចេញពីអំណាច ដោយសារតែជំហរខ្វែងគ្នាជាមួយមេដឹកនាំយោធា។ ចង់ ឬមិនចង់ លោកអ៊ីមរ៉ាន ខាន់ក៏នឹងអាចជួបវាសនាដូចលោកណាវ៉ា ស្ហារីហ្វ បើសិនលោកហ៊ានដើរចេញពីខ្សែនយោបាយរបស់យោធាប៉ាគីស្ថាន។
សម្រាប់អ្នកវិភាគមួយចំនួនវិញ ទោះជាគ្មានខ្សែនយោបាយរបស់កងទ័ព ក៏លោកអ៊ីមរ៉ាន ខាន់ផ្ទាល់ គ្មានចេតនាពិតប្រាកដ ទៅបោះដៃ កសាងទំនាក់ទំនងល្អជាមួយឥណ្ឌា ដូចសំដីរបស់លោកដែរ។ លោកអ៊ីមរ៉ាន ខាន់ ធ្លាប់បានបង្ហាញឲ្យឃើញពីជំហរគាំទ្រខ្លាំងក្រុមអ៊ីស្លាមជ្រុលនិយមនៅប៉ាគីស្ថាន។ កាលនៅជាប្រធានក្រុមបក្សប្រឆាំង លោកធ្លាប់បានរិះគន់រដ្ឋាភិបាលប៉ាគីស្ថានថាបានប្រើចំណាត់ការយោធាខ្លាំងៗ ប្រឆាំងក្រុមភេរវនិយមប៉ាគីស្ថានទៀតផង។ ជំហររបស់លោកអ៊ីមរ៉ានខាន់ ល្មមធ្វើឲ្យឥណ្ឌាចងចាំ និងត្រូវប្រុងប្រយ័ត្នជាប់ជានិច្ច ជាមួយរដ្ឋាភិបាលថ្មីរបស់ប៉ាគីស្ថាន ព្រោះថា គឺក្រុមភេរវនិយមប៉ាគីស្ថាននេះហើយដែលជាក្រុមគ្រោះថ្នាក់ និងធ្លាប់វាយប្រហារទឹកដីឥណ្ឌាកន្លងមក។ ក្រុងញូវដេលី ធ្លាប់បានចោទប្រកាន់ថា កងទ័ពប៉ាគីស្ថានធូររលុង គ្មានចេតនាលុបបំបាត់អ៊ីស្លាមជ្រុលនិយម ដែលមានគោលដៅវាយប្រហារឥណ្ឌានោះទេ។ ទំនាក់ទំនងរវាងប្រទេសនុយក្លេអ៊ែរទាំងពីរ បានចាប់ល្អក់កករ ប៉ុន្មានឆ្នាំចុងក្រោយនេះ រហូតដល់មានជម្លោះការទូតជាប្រចាំ ដោយសារ តែជម្លោះដណ្តើមទឹកដីនៅតំបន់កាស្មៀរ ហើយនិងការចោទប្រកាន់របស់ឥណ្ឌាដែលថា ភាគីប៉ាគីស្ថានមានបំណង ការពារក្រុមភេរវនិយម ដែលចិញ្ចឹមចិត្តវាយប្រហារឥណ្ឌា។ ដូច្នេះ ប៉ាគីស្ថាន នៅក្រោមការដឹកនាំរបស់នាយករដ្ឋមន្រ្តី អ៊ីមរ៉ាន ខាន់ ដែលធ្លាប់និយាយយ៉ាងបើកចំហរ គាំទ្រក្រុមអ៊ីស្លាមជ្រុលនិយម ដែលជាសត្រូវរបស់ឥណ្ឌា ច្បាស់ជាមិនអាចត្រលប់ទៅកសាងទំនាក់ទំនងល្អណាមួយ ជាមួយឥណ្ឌាបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ