ប៉ាគីស្ថាន ៖ បក្សឈ្នះចាប់ចរចាបង្កើតរដ្ឋាភិបាលចម្រុះ បក្សចាញ់បង្កើតចលនាប្រឆាំង
គណបក្សរបស់លោក អ៊ីមរ៉ាន ខាន់ បានប្រកាសចាប់ផ្តើមចរចា ដើម្បីរៀបចំបង្កើតរដ្ឋាភិបាលចម្រុះជាមួយក្រុមអ្នកឯករាជ្យ និងបក្សនយោបាយតូចៗហើយ។ គណបក្សសង្ឃឹមថា លោក អ៊ីមរ៉ាន ខាន់ នឹងអាចឡើងស្បថចូលកាន់តំណែងនៅមុនថ្ងៃទី ១៤សីហាខាងមុខ។ ប៉ុន្តែបក្សចាញ់ឆ្នោតបានប្រមូលផ្តុំគ្នា បង្កើតជាចលនាប្រឆាំង ដោយគ្រោងនឹងចុះធ្វើបាតុកម្មនៅថ្ងៃពុធខាងមុខផង។
ចុះផ្សាយនៅថ្ងៃ៖
ស្តាប់ - ០១:៥៩
តាមលទ្ធផលបណ្តោះអាសន្នចុងក្រោយ ចេញផ្សាយនៅថ្ងៃសៅរ៍ គណបក្សចលនាដើម្បីយុត្តិធម៌ របស់លោក អ៊ីមរ៉ាន ខាន់ ដោយទទួលសំឡេងគាំទ្រដល់ទៅ ១១៦អាសនៈ។ ជាជោគជ័យខ្លាំងជាងការគ្រោងទុក ប៉ុន្តែមិនគ្រប់គ្រាន់សម្រាប់បង្កើតរដ្ឋាភិបាលម្នាក់ឯងទេ។ ហេតុដូច្នេះហើយបានជាគណបក្សបានចាប់ផ្តើមភ្លាម តាំងពីថ្ងៃនេះ ស្វែងរកដៃគូមកបង្កើតរដ្ឋាភិបាលចម្រុះ។
បើតាមអ្នកនាំពាក្យ ដំណើរការចរចាជាមួយគណបក្សតូចៗ និងអ្នកឯករាជ្យ ទំនងជាត្រូវប្រើពេលប្រមាណ១២ថ្ងៃ។ គណបក្សសង្ឃឹមថា លោក អ៊ីមរ៉ាន ខាន់ នឹងអាចធ្វើពិធីស្បថចូលកាន់តំណែងបាននៅមុខថ្ងៃទី ១៤សីហា ស្របតាមកាលបរិច្ឆេទធម្មតា ជាទម្លាប់របស់ប៉ាគីស្ថានពីមុន ក្នុងការរៀបចំបង្កើតរដ្ឋាភិបាលថ្មី។
ប៉ុន្តែទន្ទឹមជាមួយគ្នានេះ គណបក្សតូចចំនួន១២ផ្សេងទៀត បានបើកសន្និសីទមួយប្រមូលកម្លាំង ប្រឆាំងនឹងលទ្ធផលឆ្នោត។ គណបក្សនយោបាយចាញ់ឆ្នោតនេះ គ្រោងនឹងធ្វើបាតុកម្ម នៅថ្ងៃពុធខាងមុខ ដើម្បីបរិហារភាពមិនប្រក្រតីក្នុងពេលបោះឆ្នោត ពោលគឺបដិសេធជោគជ័យរបស់លោក អ៊ីមរ៉ាន ខាន់។ បក្សសម្ព័ន្ធអ៊ីស្លាមប៉ាគីស្ថាន (បក្សកំពុងកាន់អំណាច) នាំមុខដោយលោក លោក Shahbaz Sharif ប្អូនលោក ណាវ៉ា ស្ហារីហ្វ អតីតនាយករដ្ឋមន្ត្រីប៉ាគីស្ថាន ដែលបានជាប់ឆ្នោតលំដាប់ទីពីរ បានចូលរួមក្នុងសន្និសីទនេះដែរ តែសន្យាផ្តល់សេចក្តីសម្រេចចិត្តនៅថ្ងៃអាទិត្យនេះ ថាចូលរួម ជាមួយចលនាប្រឆាំងឬក៏អត់។
ប្រសិនបើបក្សនេះព្រមទៅភ្ជាប់ខ្លួនជាមួយក្រុមប្រឆាំងតូចៗទាំង១២ និងមិនព្រមចូលកាន់អាសនៈសភា នោះស្ថានភាពនយោបាយប៉ាគីស្ថាននឹងយ៉ាបយឺនខ្លាំង លោក អ៊ីនរ៉ាន ខាន់ ក៏មិនអាចឡើងដឹកនាំប្រទេសបាន។
ស្ថិតនៅលំដាប់ទីបី បក្សប្រជាជនប៉ាគីស្ថាន (៤៣អាសនៈ) មិនសូវចេញប្រតិកម្មអ្វីទេ ហើយក៏មិនបានចូលរួមក្នុងសន្និសីទរបស់ចលនាប្រឆាំងដែរ។
បើតាមអ្នកសង្កេតការណ៍អឺរ៉ុប ការបោះឆ្នោតសភាប៉ាគីស្ថាន រងគំនាបនិងការបិទបាំងសេរីភាពនៃការបញ្ចេញមតិ ព្រមទាំងគ្មានសមភាពក្នុងពេលឃោសនា មិនដូចឆ្នាំ២០១៣ទេ ប៉ុន្តែជាលទ្ធផលដែលអាចទទួលយកបាន។ ចំណែកអាមេរិកវិញក៏ឯកភាពនឹងសេចក្តីសន្និដ្ឋានរបស់អ្នកសង្កេតការណ៍អឺរ៉ុបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ