ប្រទេសចំនួន៦ សម្រេចផ្អាកការនាំចូលសាច់ជ្រូកមកពីប្រទេសបែលហ្សិកដោយហេតុជម្ងឺប៉េស្ជ្រូក
ប្រទេសចំនួន៦ ក្នុងនោះក៏មានចិននិងកូរ៉េខាងត្បូងដែរ បានសម្រេចផ្អាកការនាំចូលសាច់ជ្រូកពីប្រទេសបែលហ្សិក បន្ទាប់ពីរកឃើញករណីជម្ងឺប៉េស្តជ្រូកនៅលើជ្រូកព្រៃក្នុងភាគខាងត្បូងប្រទេសបែលហ្សិក-នេះបើយោងតាមការបញ្ជាក់របស់សហព័ន្ធគ្រប់គ្រងសាច់បែលហ្សិក( Febev)។
ចុះផ្សាយនៅថ្ងៃ៖
ស្តាប់ - ០២:២៤
មន្ត្រីសហព័ន្ធផ្នែកគ្រប់គ្រងសាច់នៃប្រទេសបែលហ្សិក( Febev)លោក Michael Gore បានថ្លែងប្រាប់ថាប្រទេសចំនួន ៦ ដែលសម្រេចចិត្តផ្អាកការនាំចូលសាច់ជ្រូកពីប្រទេសបែលហ្សិកនោះ មានប្រទេសចិន កូរ៉េខាងត្បូង តៃវ៉ាន់ ហ្វីលីពីន ម៉េចស៊ិកនិង Biélorussie ។ សូមបញ្ជាក់ថា ប្រទេសចិននិងកូរ៉េខាងត្បូងគឺជាប្រទេសដែលនាំចូលសាច់ជ្រូកបែលហ្សិកយ៉ាងច្រើនជាងគេបំផុត។
ជាសរុប ទំាងខាងក្រៅនិងទាំងខាងក្នុងសហភាពអឺរ៉ុប បែលហ្សិក នាំចេញសាច់ជ្រូកខ្លួន ចំនួន ៧សែន៣ ម៉ឺនតោនក្នុងមួយឆ្នាំៗ។ រីឯប្រទេសបារាំងវិញ ការនាំសាច់ជ្រូកចេញទៅឯបរទេស មានចំនួនប្រមាណ៧សែនតោន នៅឆ្នាំ ២០១៦។
គួរំលឹកថា វត្តមានជម្ងឺប៉េស្តជ្រូក ត្រូវបានគេបញ្ជាក់នៅថ្ងៃទី១៣កញ្ញា ថាពិតជាមានមែននៅក្នុងប្រទេសបែលហ្ស៊ិក បន្ទាប់ពីគេបានធ្វើការវិភាគទៅលើសាកសពជ្រូកព្រៃចំនួន ២ក្បាលរួកមក។ ជ្រូកព្រៃងាប់ទាំងពីរនោះ ត្រូវបានគេរកឃើញនៅតំបន់ Etalle ភាគខាងត្បូងបែលហ្សិកនិងនៅមិនឆា្ងយប៉ុន្មានពីព្រំដែនប្រទេសបារាំងនិង Luxembourg ឡើយ។
យោងតាមការសន្និដ្ឋានរបស់មន្ត្រីសហព័ន្ធគ្រប់គ្រងសាច់បែលហ្សិក វត្តមាននៃរោគប៉េស្តនេះ ប្រហែលជាបណ្តាលមកពីជ្រូកព្រៃដែលងាប់នោះ បានស៊ីសាច់ចម្លងរោគ សាច់ដែលប្រហែលពួកអ្នកដឹកជញ្ជូនផ្លូវគោក បាននាំយកមក ពី អឺរ៉ុបខាងកើត ជាទីដែលមេរោគប៉េស្តជ្រូក បានឆ្លងរាលដាលនៅក្នុងប្រទេសចំនួនជាង១០ទៅហើយ។
ចំណែកលោក René Collin រដ្ឋមន្ត្រីក្រសួងកសិកម្មបែលហ្សិកវិញ បានថ្លែងបញ្ជាក់ឲ្យដឹងដែរថា គេបានរកឃើញខ្មោចជ្រូកព្រៃដែលឆ្លងមេរោគប៉េស្ត៍នេះ ចំនួន៥ក្បាល។ ស្របគ្នានេះ អជ្ញាធរបែលហ្សិក ដោយមានការពិគ្រោះយោបល់ជាមួយគណៈកម្មការអឺរ៉ុប បានចេញ បំរាម ជាបណ្តោះអាសន្ន មិនអោយមានការធ្វើដំណើរចេញចូលទៅក្នុងព្រៃ នៅក្នុង បរិវេណ ប្រមាណ ៦ម៉ឺន៣០០០ហិកតា ឬត្រូវជា៦៣០គមក្រឡានៅក្នុងខេត្តមួយរបស់ប្រទេសបែលហ្សិក។ លើសពីនេះ អាជ្ញាធរបែលហ្ស៊ិក ក៏បានចេញបំរាមហាមការបរបាញ់សត្វដែរ នៅក្នុងរយៈពេល១ខែ។ មិនតែប៉ុណ្ណោះ ក៏មាន ការហាមឃាត់ មិន ឲ្យ ចំណីដល់សត្វព្រៃ ស៊ីដែរ ដើម្បីចៀសវៀងកុំឲ្យសត្វដទៃ ទៀត មក ផ្តុំចោមរោមស៊ី ដែលយោងតាមអាជ្ញាធរក្នុងស្រុក វារឹតតែ ជម្រុញ ឲ្យ មាន ការចម្លងរោគ កាន់តែធ្ងន់ធ្ងរថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ