ចិនបានសន្យាប៉ាគីស្ថានក្នុងការបន្តគាំទ្រលើគម្រោងហេដ្ឋារចនាសម្ព័ន្ធសេដ្ឋកិច្ច
លោកនាយករដ្ឋមន្រ្តីប៉ាគីស្ថានអ៊ីមរ៉ាន់ ខាន់កំពុងបន្តដំណើរទស្សនកិច្ចនៅក្នុងប្រទេសចិន។ បន្ទាប់ពីបានជួបសន្ទនាជាមួយលោកប្រធានាធិបតីចិនស៊ី ជីនពីងនាថ្ងៃសុក្រ ទី២ វិច្ឆិកា លោកអ៊ីមរ៉ាន់ ខាន់បានជួបសន្ទនាជាមួយសមភាគីចិនលោកលី ខឺជាំងនៅថ្ងៃសៅរ៍ ទី៣ វិច្ឆិកានេះ។ នៅក្នុងជំនួប លោកលី ខឺជាំងបានសន្យាបន្តគាំទ្រគម្រោងហេដ្ឋារចនាសម្ព័ន្ធសេដ្ឋកិច្ចរួមគ្នារវាងចិន និងប៉ាគីស្ថាន។
ចុះផ្សាយនៅថ្ងៃ៖
ស្តាប់ - ០២:០៧
វត្តមានរបស់លោកនាយករដ្ឋមន្រ្តីប៉ាគីស្ថានអ៊ីមរ៉ាន់ ខាន់ទឹកដីចិនពេលនេះមិនមែនជារឿងចៃដន្យទេ មិនចៃដន្យព្រោះទី១ ប៉ាគីស្ថានក្នុងនាមជាមិត្តចាស់ម្នាក់របស់ចិនកំពុងជួបបញ្ហាហិរញ្ញវត្ថុដ៏ធ្ងន់ធ្ងរដែលមានតែចិនទេទើបអាចជួយសម្រាលបាន និងទី២ ប៉ាគីស្ថានចង់ដឹងពីជំហរច្បាស់លាស់របស់ចិននៅក្នុងគម្រោងហេដ្ឋារចនាសម្ព័ន្ធសេដ្ឋកិច្ចរវាងប្រទេសទាំងពីរ។ គួររម្លឹកថា គម្រោងហេដ្ឋារចនាសម្ព័ន្ធសេដ្ឋកិច្ចរវាងចិន និងប៉ាគីស្ថានបានអនុញ្ញាតឲ្យមានការតភ្ជាប់ពីតំបន់ប៉ែកខាងលិចប្រទេសចិនទៅកាន់កំពង់ផែប៉ាគីស្ថាន Gwada ស្ថិតក្នុងសមុទ្រអារ៉ាប៊ី។
លោកអ៊ីមរ៉ាន់ ខាន់បានថ្លែងថាក្នុងឆ្នាំ ២០១៣ គម្រោងហេដ្ឋារចនាសម្ព័ន្ធសេដ្ឋកិច្ចមួយនេះគ្រាន់ជាគំនិតប៉ុណ្ណោះ តែឥឡូវបានលេចជារូបរាង ហើយវាពិតជាសំណាងដ៏ធំសម្រាប់ចិន និងប៉ាគីស្ថានក្នុងការបោះជំហានទៅមុខ និងទាក់ទាញក្រុមអ្នកវិនិយោគ។ តែក្តីបារម្ភរបស់លោកអ៊ីម រ៉ាន់ខាន់មានពីរ ទី១ ខ្លាចចិនកាត់បន្ថយការចូលរួមរបស់ខ្លួន និងទី២ ប៉ាគីស្ថានដែលកំពុងជួបបញ្ហាហិរញ្ញវត្ថុមិនអាចធានារ៉ាប់រងចំណែករបស់ខ្លួនបាន។ យ៉ាងណាក៏ដោយ លោកលី ខឺជាំងបានធានាលោកអ៊ីមរ៉ាន់ ខាន់ថា ចិននឹងបន្តគាំទ្រលើគម្រោងហេដ្ឋារចនាសម្ព័ន្ធសេដ្ឋកិច្ចនោះដោយមិនដកថយទេ។
គួរបញ្ជាក់ថា គម្រោងហេដ្ឋារចនាសម្ព័ន្ធសេដ្ឋកិច្ចរវាងចិន និងប៉ាគីស្ថានជាមហិច្ឆតារបស់លោកប្រធានាធិបតីចិនស៊ី ជីនពីងដើម្បីសម្រួលពាណិជ្ជកម្មចិន។ តែក្នុងពេលជាមួយគ្នា គម្រោងហេដ្ឋារចនាសម្ព័ន្ធសេដ្ឋកិច្ចមួយក៏ទទួលរងការរិះគន់ ទិតៀនដែរ។ អ្នកខ្លះថា ជាមធ្យោបាយដើម្បីចូលរួមជួយអភិវឌ្ឍប្រទេសក្រីក្រ តែខ្លះទៀតថា ជំនួយចិនបានធ្វើឲ្យប្រទេសក្រីក្រទាំងនោះជំពាក់បំណុលចិនកាន់តែច្រើនឡើង។ ក្រៅពីសន្យាបន្តគាំទ្រលើគម្រោងហេដ្ឋារចនាសម្ព័ន្ធសេដ្ឋកិច្ចរវាងគ្នា ចិនក៏បានចុះកិច្ចព្រមព្រៀងចំនួន ១៦ ជាមួយប៉ាគីស្ថានដែលភាគច្រើនជាកិច្ចព្រមព្រៀងសហប្រតិបត្តិការផ្នែកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ