នាយករដ្ឋមន្រ្តីឥណ្ឌាធ្វើដំណើរទៅកាន់វិហារកាតូលិកដែលរងការវាយប្រហារភេរវកម្មក្នុងប្រទេសស្រីលង្កា
នៅថ្ងៃអាទិត្យ ទី៩ មិថុនា នាយករដ្ឋមន្រ្តីឥណ្ឌាលោកណារិនដ្រា ម៉ូឌីបានបំពេញទស្សនកិច្ចនៅក្នុងប្រទេសស្រីលង្កា។ តែមុននឹងអញ្ជើញទៅជួបសន្ទនាជាមួយប្រធានាធិបតីស្រីលង្កាលោកម៉ៃរីប៉ាឡា ស៊ីរីសេណា លោកម៉ូឌីបានធ្វើដំណើរទៅកាន់វិហារកាតូលិកសាំង អង់តូនីដែលបានរងការវាយប្រហារភេរវកម្មកាលពីថ្ងៃទី២១ មេសា។ គួររម្លឹកថា ក្នុងពិធីបុណ្យសាសនាកាតូលិកថ្ងៃទី២១ មេសា ក្រុមភេរវជនបានបើកការវាយប្រហារលើសណ្ឋាគារប្រណិតៗមួយចំនួន និងវិហារកាតូលិកសាំង អង់តូនីដោយបណ្តាលឲ្យមានមនុស្សស្លាប់ចំនួន ២៥៨នាក់។ រូបភាពទៅកាន់វិហារកាតូលិកសាំង អង់តូនីរបស់លោកម៉ូឌីត្រូវបានលោកចុះផ្សាយនៅក្នុងបណ្តាញសង្គម Twitter របស់លោក។
ចុះផ្សាយនៅថ្ងៃ៖
ស្តាប់ - ០២:២៥
មុននឹងត្រូវលោកម៉ៃរីប៉ាឡា ស៊ីរីសេណាក្រាលព្រំក្រហមទទួលនៅវិមានប្រធានាធិបតី លោកណារិនដ្រា ម៉ូឌីបានឆ្លៀតឈាងចូលមើលវិហារកាតូលិកសាំង អង់តូនីដោយមិនបានប្រៀងទុក។ « ខ្ញុំជឿជាក់ថា ស្រីលង្កានឹងក្រោកឈរឡើងដោយខ្លួនឯង។ ទង្វើភេរវនិយមដ៏កំសាកនឹងមិនអាចឈ្នះលើស្មារតីស្រីលង្កាបានឡើយ។ ឥណ្ឌារួមសាមគ្គីជាមួយប្រជាជនស្រីលង្កា » នេះការថ្លែងរបស់លោកម៉ូឌីនៅក្នុងបណ្តាញសង្គម Twitter ដោយមានភ្ជាប់ជាមួយនូវរូបថតនៃទស្សនកិច្ចរបស់លោកនៅវិហារកាតូលិកសាំង អង់តូនីផងដែរ។ គួរបញ្ជាក់ថាមុននឹងទៅដល់ទឹកដីស្រីលង្កាក្នុងថ្ងៃអាទិត្យ ទី៩ មិថុនា នាយករដ្ឋមន្រ្តីឥណ្ឌាបានអញ្ជើញទៅបំពេញទស្សនកិច្ចក្នុងប្រទេសម៉ាល់ឌីវនាថ្ងៃសៅរ៍ ទី៨ មិថុនា។
នៅក្នុងប្រទេសម៉ាល់ឌីវ លោកម៉ូឌីបានចូលរួមសម្ពោធប្រព័ន្ធរ៉ាដាមួយនៅឆ្នេរសមុទ្រ និងមជ្ឈមណ្ឌលហ្វឹកហ្វឺនកងទ័ពមួយ។ ម៉ាល់ឌីវ និងឥណ្ឌាបានដើរតួនាទីសំខាន់សម្រាប់រក្សាសន្តិសុខនៅភាគខាងត្បូងនៃឧបទ្វីបឥណ្ឌាដែលមានចរាចរផ្លូវសមុទ្រទិសខាងកើត និងលិចដ៏មមាញឹក និងដែលក្រុងញូដែលីកំពុងបារម្ភពីកំណើនឥទ្ធិពលកាន់តែខ្លាំងរបស់ប្រទេសចិននៅក្នុងតំបន់។ ម៉ាល់ឌីវជាប្រទេសសម្ព័ន្ធមិត្តប្រពៃណីរបស់ឥណ្ឌា តែនៅក្នុងជំនាន់លោកប្រធានាធិបតីអាប់ឌុលឡា យ៉ាមីនចន្លោះឆ្នាំ ២០១៣ ២០១៨ ម៉ាល់ឌីវបានងាកខ្លាំងរកចិនទាំងផ្នែកនយោបាយ និងហិរញ្ញវត្តុ។ គឺទើបតែបរាជ័យរបស់លោកយ៉ាមីននាការបោះឆ្នោតក្នុងខែកញ្ញា ឆ្នាំ ២០១៨ និងការឡើងកាន់អំណាចរបស់លោកអ៊ីប្រាហ៊ីម ម៉ូហាម៉េដ សូលីដែលម៉ាល់ឌីវបានងាកមករកឥណ្ឌាជាថ្មី។
សេណារីយ៉ូដូចគ្នានេះក៏បានកើតមាននៅក្នុងប្រទេសស្រីលង្កាដែរ។ គឺទើបតែនៅក្រោយការបោះឆ្នោតឆ្នាំ ២០១៥ ទេដែលក្រុងកូឡុំបូបានបែរមុខរកឥណ្ឌាវិញ។ ក្នុងខែឧសភាកន្លងទៅថ្មីៗនេះ ស្រីលង្កាបានប្រកាសភ្ជាប់ដៃគូជាមួយឥណ្ឌា និងជប៉ុនដើម្បីសាងសង់កំពង់ផែទឹកជ្រៅថ្មីមួយស្ថិតក្បែរកំពង់ផែទឹកជ្រៅដែលចិនមានចំណែកភាគហ៊ុនដល់ទៅ ៨៥%។ កំពង់ផែមួយនេះត្រូវបានស្រីលង្កាសាងសង់ដោយប្រើប្រាក់កម្ចីរបស់ចិន តែដោយគ្មានលទ្ធភាពសងលុយចិន រដ្ឋាភិបាលស្រីលង្កាបានសុខចិត្តប្រគល់ឲ្យចិនមានភាគហ៊ុនច្រើនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ