តើគ្រិស្តសាសនា នៅជប៉ុនមានប្រវត្តិយ៉ាងណា ?
ចុះផ្សាយនៅថ្ងៃ៖
ស្តាប់ - ០៦:៥៥
សម្តេចប៉ាប ហ្វ្រង់ស័រ បានបញ្ចប់ទស្សនកិច្ចនៅប្រទេសថៃ និងបាននិមន្តដល់ប្រទេសជប៉ុននៅថ្ងៃសៅរ៍នេះ ដើម្បីបំពេញទស្សនកិច្ចរយៈពេលបួនថ្ងៃ។ ក្រៅអំពីចង់ផ្សព្វផ្សាយសារប្រយុទ្ធប្រឆាំងនឹងសង្គ្រាមនុយក្លេអ៊ែរ ដែលជាកម្មវត្ថុដ៏ចំបងនៃទស្សនកិច្ច នៅណាវ៉ាសាគី និងហ៊ីរ៉ូស្ហ៊ីម៉ា សម្តេចប៉ាបនឹងប្រារព្វពិធីឧទ្ទិសដល់វិញ្ញាណក្ខន្ធគ្រិស្តសាសនិកជន “លាក់មុខ”។ តើគ្រិស្តសាសនិកជនលាក់មុខជប៉ុនជានរណា ? គ្រិស្តសាសនា នៅជប៉ុន មានប្រវត្តិយ៉ាងណា ?
មុននឹងមានជំនួបជាមួយជនរងគ្រោះក្នុងគ្រោះមហន្តរាយរញ្ជួយដី-ស៊ូណាមី-នុយក្លេអ៊ែរហ្វូគុស្ហ៊ីម៉ា និងជំនួបផ្សេងៗនៅតូក្យូ នៅថ្ងៃចន្ទ ទស្សនកិច្ចដែលគួរឱ្យកត់សម្គាល់ជាងគេ គឺនៅថ្ងៃអាទិត្យស្អែក ពេលព្រះអង្គនិមន្តទៅណាវ៉ាសាគី និងហ៊ីរ៉ូស្ហ៊ីម៉ា ដែលរងគ្រាប់បែកបរមាណូ កាលពី៧៤ឆ្នាំមុន។ នៅហ៊ីរ៉ូស្ហ៊ីម៉ា ព្រះអង្គនឹងថ្លែងសុន្ទរកថាជាសាធារណៈ ពីវិមានសន្តិភាពស្តូបរំលឹកវិញ្ញាណក្ខន្ធជនរងគ្រោះនុយក្លេអ៊ែរ ដែលស្ថិតនៅក្បែរកន្លែងធ្លាក់គ្រាប់បែកបរមាណូគ្រាប់ទីមួយ កាលពីថ្ងៃទី៦សីហា ឆ្នាំ១៩៤៥។
ក្រៅអំពីកម្មវត្ថុដ៏ចំបងចង់បំផុសបំផុលពិភពលោកឱ្យប្រយុទ្ធប្រឆាំងនឹងនុយក្លេអ៊ែរ ដំណើរទស្សនកិច្ចរបស់សម្តេចប៉ាប មានទម្រង់ជារំលឹកប្រវត្តិសាស្ត្រគ្រិស្តសាសនានៅជប៉ុន តាមគន្លងអ្នកផ្សព្វផ្សាយសាសនាមុនៗ។ នៅណាវ៉ាសាគី សម្តេចប៉ាបនឹងប្រារព្វពិធីឧទ្ទិសដល់វិញ្ញាណក្ខន្ធគ្រិស្តសាសនិកជន ដែលបានបាត់បង់ជីវិត ដោយការធ្វើទុកបុកម្នេញពីសំណាក់រដ្ឋាភិបាលជប៉ុន ក្នុងអតីតកាល។
គ្រិស្តសាសនានិងការធ្វើទុក្ខបុកម្នេញ
សាសនាគ្រិស្តសាសនាដែលតំណាងដោយប្រជាពលរដ្ឋប្រមាណ១% ត្រូវបាននាំចូលមកជប៉ុន នៅពាក់កណ្តាលសតវត្សរ៍ទី ១៦ (១៥៤៩) ដោយ លោក ហ្វ្រង់ស័រហ្សាវីយ៉េរ អ្នកផ្សព្វផ្សាយសាសនាជាតិអេស្ប៉ាញ។ ប៉ុន្តែនៅគ្រិស្តសាសនាត្រូវជួបប្រវត្តិខ្មៅងងឹតនិងជូរចត់ខ្លាំងណាស់ភ្លាម។ នៅចុងសតវត្សរ៍ទី១៦ដរដ្ឋាភិបាលយោធាShoguns ដែលមានអារម្មណ៍ថាអំណាចក្នុងដៃចាប់រង្គោះរង្គើរ បានកាប់សម្លាប់អ្នកកាន់សាសនាគ្រិស្ត ធ្វើបាប ធ្វើទារុណកម្ម ចាប់ឆ្កាង ឱ្យស្លាប់ដោយសន្សឹមៗតាមជំនោរទឹកជោរឡើង។
តាំងពីពេលនោះមកគ្រិស្តសាសនាត្រូវបានគេហាមឃាត់ បន្ទាប់មកនៅឆ្នាំ១៦៣៩ ជប៉ុនបានបិទទ្វារ ផ្តាច់ខ្លួនពិភពលោកខាងក្រៅ រហូតដល់ចុងសតវត្សរ៍ទី១៩។ ជាងពីរសតវត្សរ៍កន្លង នៅឆ្នាំ១៨៦៧ ជប៉ុនបានបើកទ្វាររកពិភពលោកខាងក្រៅ អ្នកកាន់សាសនាគ្រិស្តបានរងការធ្វើទុក្ខបុកម្នេញម្តងទៀត តែលើកនេះក្នុងរយៈពេលត្រឹមតែ៧ឆ្នាំ។ ប៉ុន្តែនៅពេលអ្នកផ្សព្វផ្សាយសាសនាអាចធ្វើដំណើរទៅកាន់ប្រទេសជប៉ុនបានវិញ សង្ឃកាតូលិកមានការភ្ញាក់ផ្អើលយ៉ាងខ្លាំង នៅពេលឃើញមានពលរដ្ឋជប៉ុន ជាគ្រិស្តសាសនិក ជាច្រើនសិបនាក់ បន្តបដិបត្តិសាសនាគ្រិស្ត ដោយសម្ងាត់ពីបម្រាមរដ្ឋាភិបាល អស់រយៈពេលជាង២៥០ឆ្នាំ ដោយគ្មានគម្ពីBibles គ្មានបុព្វជិត ...
ពិតជាពុំធ្លាប់កើតមានក្នុងប្រវត្តិសាសនាគ្រិស្ត។ ពួកគេមានគ្នាប្រមាណ៦ម៉ឺននាក់ នៅសម័យនោះ និងនៅសល់តែប្រមាណមិនដល់១៥០០នាក់ទេ នាពេលនេះ និងដែលប្រសិទ្ធិនាមថា ជាភាសាជប៉ុនថា “កាគុរ៉េ គីរីស្ហ៊ីតង់” ឬគ្រិស្តសាសនិកជន “លាក់មុខ”។ សម្តេចប៉ាប នឹង នាំគ្រិស្តសាសនិកជនលាក់មុខ៥នាក់ ទៅសូត្រធម៌ក្នុងពិធីឧទ្ធិសវិញ្ញាក្ខន្ធដល់បុព្វបុរសកាគុរ៉េគីរីស្ហ៊ីតង់នៅថ្ងៃ ស្អែក នៅណាវ៉ាសាគី ទីដែលមានវិហារកាតូលិកដំបូងនិងតែមួយគត់នៅជប៉ុន។ ប៉ុន្តែសម្រាប់ក្រុមគ្រិស្តសាសនិកលាក់មុខ វត្តមានរបស់សម្តេចប៉ាបមិនអាចប្តូរផ្លាស់ទំនាក់ទំនងរបស់ពួកគេជាមួយនឹងបុរីវ៉ាទីកង់បានឡើយ។
គ្រិស្តសាសនិកជន “លាក់មុខ” ដែលពួកគេបានតាំងខ្លួន និងដាក់ឈ្មោះខ្លួនឯងថា កាគូរ៉េគីរីស្ហ៊ីតង់ ជាអ្នកកាន់សាសនាគ្រិស្ត “ចាស់បូរាណ” និងក្លាយជាសាសនាមួយបែបថ្មី មានឬសគល់ជាគ្រិស្តសាសនាមែន តែការអនុវត្ត ខុសប្លែកពីសាសនាគ្រិស្តទូទៅ ដោយមានលាយច្របល់រងឥទ្ធិពលពីសាសនាព្រះពុទ្ធនិងស្ហ៊ីនតៅ។ ឧទាហរណ៍ ការប្រារព្ធបុណ្យឆ្លងឆ្នាំ មួយភាគធំធ្វើតាមទំនៀមទំលាប់ស្ហ៊ីនតៅ ពិធីបុណ្យពេលស្លាប់ធ្វើតាមប្រពៃណីសាសនាព្រះពុទ្ធ។ ការគោរពបូជាបែបគ្រិស្តសាសនាផ្ទាល់ក៏ប្រែប្រួលទៅតាមប្រវត្តិសាស្ត្រ ដូចជានៅក្នុងពិធីចូលកាន់សាសនា គ្រិស្តសាសនិកជននាំគ្នាទៅប្រារព្ធនៅកោះ Nakae no shima កន្លែងដែលគ្រិស្តសាសនិកជនជប៉ុនរងការកាប់សម្លាប់ និងទៅយកទឹកសមុទ្ទកន្លែងនោះមកប្រោះព្រំប្រសិទ្ធី។
តាំងពីជប៉ុនបានបើកទូលាយ ពលរដ្ឋមានសិទ្ធិជ្រើសរសើកាន់សាសនាមក កាគុរ៉េគីរីស្ហ៊ីតង់ ប្រមាណពាក់កណ្តាលបដិសេធមកចូលវិហារកាតូលិកទេ និងបន្តកាន់ប្រពៃណីគ្រិស្តនៅស្ងាត់ក្នុងក្រុមគ្រួសារ។ ចំណែកក្មេងៗសម័យថ្មីមិនសូវចាប់អារម្មណ៍នឹងជំនឿតែមបែបកាកុរ៉េគិរីស្ហ៊ីតង់ ដែលកំពុងជិតផុតពូជ។ សហគមន៍នេះមានតែមនុស្សចាស់ៗខ្លាំង និងមិនខុសពីសង្គមជប៉ុនទូទៅដែលកំពុងប្រឈមនឹងបញ្ហាគ្មានការបង្កបង្កើតជំនាន់ថ្មី។
សាសនានៅជប៉ុន
រដ្ឋធម្មនុញ្ញជប៉ុនក្រោយសង្គ្រាមលោកលើកទីពីរ បានចែងបែងចែកដាច់ស្រលះរវាងរដ្ឋនិងសាសនា។ ប៉ុន្តែដូចជាបណ្តាប្រទេសនៅអាស៊ីដទៃទៀតដែរ សាសនាដែលសំខាន់ជាងគេក្នុងប្រទេស គឺសាសនាស៊្ហីនតៅ និងព្រះពុទ្ធសាសនា។ ប្រពៃទំនៀមទម្លាប់ស្នងរាជបន្តបដិបត្តិតាមបែបស្ហ៊ីនតៅ រហូតមកទល់សព្វថ្ងៃ។ សាសនាព្រះពុទ្ធបានរីកសុសសាយខ្លាំងនិងបានមកដល់ជប៉ុននៅសតវត្សរ៍ទី៦ និងរួមរស់ស៊ីចង្វាក់ជាមួយបន្ថែមពីទំនៀមទម្លាប់សាសនាស្ហ៊ីនតៅ។ ជាសរុបមានប្រជាជនជប៉ុន៨៦លាន ប្រកាសខ្លួនជាអ្នកកាន់សាសនាស្ហ៊ីនតៅ ៨៥លានជាពុទ្ធសាសនិកជន។ អ៊ីស្លាម ជីហ្វ ហិណ្ឌូ មានវត្តមានក្នុងប្រទេសជប៉ុនដែរប៉ុន្តែក្នុងបរិមាណទាំងតិចតួចបំផុត និងគ្មានស្ថិតិផ្លូវការទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ