ចិនទម្លាក់ទំនួលខុសត្រូវនៃការឡើងកម្តៅអាកាសធាតុ លើក្រុមប្រទេសអ្នកមាន
សន្និសីទអន្តរជាតិស្តីអំពីអាកាសធាតុ COP២៥ នៅក្រុងម៉ាឌ្រីត កាន់តែខិតមកដល់ សំឡេងរិះគន់ប្រឆាំងគ្នាបានលាន់ឮកាន់តែខ្លាំង។ នៅថ្ងៃពុធនេះ ចិនដែលបញ្ចេញឧស្ម័នពុលខ្លាំងជាងបំផុតមួយ បានចោទប្រកាន់ក្រុមប្រទេសលោកខាងលិច ជាពិសេសសហរដ្ឋអាមេរិកតែម្តង ថាមិនបានបញ្ចេញសកម្មភាពគ្រប់គ្រាន់ក្នុងការប្រយុទ្ធប្រឆាំងនឹងការប្រែប្រួលអាកាសធាតុទេ។ មិនតែប៉ុណ្ណោះចិនបានរិះគន់យ៉ាងខ្លាំង ដោយមិនផ្ទាល់ គម្រោងយកពន្ធលើការបញ្ចេញឧស្ម័នពុល ថាជាប៉ុនប៉ងបំផ្លាញកិច្ចខំប្រឹងប្រែងរួមរបស់ពិភពលោក ដើម្បីអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
គណៈកម្មការអឺរ៉ុបផ្នែកអាកាសធាតុ បានបង្ហាញផែនការ Green Deal ដែលអឺរ៉ុបនឹងចាប់សិក្សាចាប់ពីថ្ងៃទី ១ធ្នូ២០១៩ទៅ។ តាមរយៈផែនការនេះ អឺរ៉ុបចង់ដាក់ឱ្យដំណើរការយកពន្ធលើកាបូន ឆ្លងព្រំដែន ដើម្បីការពារក្រុមហ៊ុនអឺរ៉ុបឱ្យបានរកស៊ីស្មើភាពជាមួយនឹងក្រុមហ៊ុនមកពីបរទេសដែលមិនគោរពបទដ្ឋានបរិស្ថានដ៏តឹងរឹងក្នុងការប្រយុទ្ធប្រឆាំងការប្រែប្រួលអាកាសធាតុដូចអឺរ៉ុប។
ប៉ុន្តែសម្រាប់ប៉េកាំង គម្រោងការពារអាកាសធាតុនេះ នឹងទៅបង្អាក់កម្មវត្ថុរួមនៃការប្រយុទ្ធប្រឆាំងនឹងការឡើងកម្តៅនៃភពផែនដី។ គម្រោងបែបឯកតោភាគីនិយម និងការពារផលប្រយោជន៍តែឯង បំផ្លាញខ្លាំងណាស់ លទ្ធផលនៃកិច្ចខំប្រឹងប្រែងទូទៅ និងឆន្ទៈរបស់បណ្តាប្រទេសដែលចង់បញ្ចេញសកម្មភាពប្រយុទ្ធប្រឆាំងនឹងការប្រែប្រួលអាកាសធាតុរួមគ្នា។ នេះបើតាមសេចក្តីប្រកាសរបស់អនុរដ្ឋមន្ត្រីក្រសួងបរិស្ថានចិន លោក Zhao Yingmin ដោយបានអះអាងថា ការយកពន្ធកាបូន គឺជាចំណុចប្រឆាំងដ៏សំខាន់មួយនឹងកិច្ចព្រមព្រៀងអាកាសធាតុ ដែលអង្គការសហប្រជាជាតិសម្រេចបាននៅទីក្រុងប៉ារីស កាលពីឆ្នាំ២០១៥។
មិនតែប៉ុណ្ណោះ ក្រុមប្រទេសអ្នកមានមិនបានចូលរួមចំណែកគ្រប់គ្រាន់ ក្នុងបុព្វហេតុអាកាសធាតុទេ។ កង្វះឆន្ទៈនយោបាយ គឺជាបញ្ហាដ៏ធំ នៃកិច្ចខិតខំប្រឹងប្រែងកាត់បន្ថយការបញ្ចេញឧស្ម័នពុល ! នេះជាប្រសាសន៍របស់អនុរដ្ឋមន្ត្រីក្រសួងបរិស្ថានចិនទៅកាន់អ្នកសារព័ត៌មាន ដោយបានបន្ថែមការរិះគន់និងចោទប្រកាន់ ក្រុមប្រទេសលោកខាងលិច ជាពិសេសសហរដ្ឋអាមេរិកថា ក្រុមប្រទេសអ្នកមាន ដែលមានប្រវត្តិឧស្សាហកម្មលូតលាស់តាំងពីយូរមកហើយ ត្រូវមានទំនួលខុសត្រូវជាងក្រុមប្រទេសក្រីក្រ ក្នុងការកាត់បន្ថយឧស្ម័នផ្ទះកញ្ចក់។ កិច្ចព្រមព្រៀងអាកាសធាតុក្រុងប៉ារីស បានចែងអំពីគោលការណ៍នៃ ការទទួលខុសត្រូវរួម តែខុសគ្នាៗ។ ថ្វីបើជាមហាអំណាចសេដ្ឋកិច្ចទីពីរពិភពលោកមែន តែចិនមិនជាប់ចំណាត់ថ្នាក់លេខមួយខាងបញ្ចេញឧស្ម័នកាបូនិកទេ។ ហើយក្នុងនាមជាប្រទេសកំពុងលូតលាស់ ចិនគួរតែមានសិទ្ធិទទួលចំណែកជាជំនួយថវិកា១០០ពាន់លានដុល្លារ ដែលក្រុមប្រទេសអ្នកមានសន្យាជួយប្រទេសក្រីក្រដើម្បីប្រឈមនឹងភាពបន្ទាន់អាកាសធាតុផង និងដើម្បីផ្តល់មធ្យោបាយកាត់បន្ថយឧស្ម័នផ្ទះកញ្ចក់ផង។
សូមបញ្ជាក់ថា កាលពីម្សិលមិញ អង្គការសហប្រជាជាតិបានអំពាវនាវឱ្យប្រទេសហត្ថលេខី កាត់បន្ថយឧស្ម័នCO2 ៧,៦%ក្នុងមួយឆ្នាំៗបើចង់កំរិតអាកាសធាតុឱ្យឡើងត្រឹម១,៥អង្សា ដូចមានចែងក្នុងកិច្ចព្រមព្រៀងអាកាសធាតុក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ