នៅចំពោះមុខតុលាការយុត្តិធម៌អន្តរជាតិ ប្រទេសហ្កំប៊ីបានទាមទារឲ្យប្រទេសភូមាបញ្ឈប់អំពើប្រល័យពូជសាសន៍រ៉ូហ៊ីងយ៉ា
នៅថ្ងៃអង្គារ ទី១០ ធ្នូ តុលាការយុត្តិធម៌អន្តរជាតិបានផ្តើមសវនាការលើបណ្តឹងរបស់ប្រទេសហ្កំប៊ីដែលចោទប្រទេសភូមាក្នុងអំពើប្រល័យពូជសាសន៍លើជនជាតិរ៉ូហ៊ីងយ៉ា។ សវនាការនេះមានរយៈពេល ៣ថ្ងៃដោយបន្តរហូតដល់ថ្ងៃព្រហស្បតិ៍ ទី១២ ធ្នូ។ ភាគីហ្កំប៊ីតំណាងដោយរដ្ឋមន្រ្តីក្រសួងយុត្តិធម៌លោកអាប៊ូបាការ តំបាឌូ ហើយភាគីភូមាតំណាងដោយលោកស្រីអ៊ុងសាន ស៊ូជី ជ័យលាភីរង្វាន់ណូបែលសន្តិភាព ទីប្រឹក្សារដ្ឋ និងជារដ្ឋមន្រ្តីក្រសួងការបរទេស។ លោកស្រីអ៊ុងសាន ស៊ូជីត្រូវឡើងថ្លែងការពារភូមាក្នុងថ្ងៃពុធ ទី១១ ធ្នូ។ តែនៅថ្ងៃអង្គារ ទី១០ ធ្នូ ជាការថ្លែងរបស់រដ្ឋមន្រ្តីក្រសួងយុត្តិធម៌ហ្កំប៊ីលោកអាប៊ូបាការ តំបាឌូ។ នៅចំពោះមុខចៅក្រមនៃតុលាការយុត្តិធម៌អន្តរជាតិ លោកតំបាឌូបានវាយប្រហារចាស់ដៃលើទង្វើកងទ័ព និងថ្នាក់ដឹកនាំភូមាលើពួករ៉ូហ៊ីងយ៉ា។ នៅក្នុងន័យនេះ លោកតំបាឌូបានទាមទារឲ្យភូមាបញ្ឈប់អំពើប្រល័យពូជសាសន៍រ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
« ក្នុងមួយថ្ងៃៗដែលគ្មានសកម្មភាព គឺមានមនុស្សស្លាប់ថែមទៀត មានការបំពារបំពានលើស្រ្តីថែមទៀត និងមានការដុតកូនក្មេងទាំងរស់ថែមទៀត។ តើពួកគេមានកំហុសអីទៅបានជាត្រូវគេធ្វើបាបអ៊ីចឹង?។ ពួកគេបានចាប់កំណើតមកយ៉ាងដូចនេះ ហើយពួកគេបានចាប់កំណើតមកមានជាតិសាសន៍ និងសាសនាខុសពីក្រុមដែលបានរំលោភ និងសម្លាប់ពួកគេ។ តើដោយសារតែភាពខុសគ្នានេះឬ បានជាពួកគេត្រូវទទួលទោសប្រល័យពូជសាសន៍។
អ្វីដែលប្រទេសហ្កំប៊ីស្នើសុំយ៉ាងទទូចនោះគឺថា អស់លោកត្រូវតែនិយាយប្រាប់ភូមាឲ្យបញ្ឈប់ការកាប់សម្លាប់មិនសមហេតុសមផល។ បិទបញ្ចប់នូវទង្វើឃោរឃៅ និងតិរច្ឆានដែលបានតក់ស្លុត និងបន្តតក់ស្លុតសតិសម្បជញ្ញៈរបស់យើង។ បញ្ឈប់អំពើប្រល័យពូជសាសន៍លើប្រជាជនខ្លួនឯង។ អ្វីដែលយើងកំពុងរង់ចាំពីអស់ លោកនោះគឺថា អស់លោកបង្គាប់ភូមាឲ្យផ្តល់សំណាងមួយដល់ពលរដ្ឋរ៉ូហ៊ីងយ៉ា។ សំណាងដើម្បីរស់នៅក្នុងជីវិតមួយថ្លៃថ្នូរ និងសមរម្យ មានសេរីភាពនិងសន្តិភាព »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ