លោកស្រីអ៊ុងសាន ស៊ូជីការពារភូមាក្នុងសំណុំរឿងរ៉ូហ៊ីងយ៉ានៅតុលាការយុត្តិធម៌អន្តរជាតិក្រុងឡាអេ
ចុះផ្សាយនៅថ្ងៃ៖
ស្តាប់ - ០៦:៤២
ចាប់ពីថ្ងៃអង្គារ ទី១០ ដល់ថ្ងៃព្រហស្បតិ៍ ទី១២ ធ្នូ តុលាការយុត្តិធម៌អន្តរជាតិក្រុងឡាអេក្នុងប្រទេសហូឡង់ផ្តើមសវនាការលើបណ្តឹងរបស់ប្រទេសហ្កំប៊ីដែលចោទប្រទេសភូមាក្នុងបទប្រល័យពូជសាសន៍លើជនជាតិភាគតិចរ៉ូហ៊ីងយ៉ា។ លោកស្រីអ៊ុងសាន ស៊ូជីដែលជាជ័យលាភីរង្វាន់ណូបែលសន្តិភាពក្នុងឆ្នាំ ១៩៩១ និងជារដ្ឋមន្រ្តីក្រសួងការបរទេសភូមាបានចេញមុខផ្ទាល់ដើម្បីឆ្លើយការពារភូមានៅចំពោះមុខតុលាការយុត្តិធម៌អន្តរជាតិក្រុងឡាអេ។ នៅភូមា មានប្រជាជនជាង ៩០% ជាអ្នកកាន់ព្រះពុទ្ធសាសនា តែពួករ៉ូហ៊ីងយ៉ាដែលជាអ្នកកាន់សាសនាអ៊ីស្លាមមិនត្រូវបានគេទទួលស្គាល់ដូចជាជនជាតិភាគតិចដទៃទេ និងថែមទាំងទទួលការស្អប់យ៉ាងខ្លាំងទៀតផង។
នៅថ្ងៃទី១១ វិច្ឆិកា ប្រទេសហ្កំប៊ីបានដាក់ពាក្យបណ្តឹងទៅកាន់តុលាការយុត្តិធម៌អន្តរជាតិក្រុងឡាអេដោយចោទប្រទេសភូមាពីបទប្រល័យពូជសាសន៍លើជនជាតិភាគតិចរ៉ូហ៊ីងយ៉ា។ ហេតុអ្វីបានជាប្រទេសហ្កំប៊ីជាអ្នកចេញមុខ?។ តាមពិត ហ្កំប៊ីដែលជាប្រទេសតូចមួយនៅអាហ្រិ្វកខាងកើត និងដែលមានប្រជាជនភាគច្រើនជាអ្នកកាន់សាសនាអ៊ីស្លាមមិនមែនជាអ្នកដើមបណ្តឹងផ្ទាល់ខ្លួនឯងទេ តែបានធ្វើឡើងក្នុងនាម ៥៧ប្រទេសដែលជាសមាជិកអង្គការនៃកិច្ចសហប្រតិបត្តិការអ៊ីស្លាម នេះជាហេតុផលទី១។
ចំណែកហេតុផលទី២ ដែលបញ្ជាក់ពីការចេញមុខរបស់ប្រទេសហ្កំប៊ី ក៏មកពីរដ្ឋមន្រ្តីក្រសួងយុត្តិធម៌ហ្កំប៊ីលោកអាប៊ូបាការ តំបាឌូជាអតីតរដ្ឋអាជ្ញានៃតុលាការព្រហ្មទណ្ឌអន្តរជាតិទទួលបន្ទុកកាត់ទោសលើអ្នកទទួលខុសត្រូវក្នុងអំពើប្រល័យពូជសាសន៍លើជនជាតិទូតស៊ីកាលពីឆ្នាំ ១៩៩៤ ក្នុងប្រទេសរវ៉ាន់ដា។ ដូច្នេះ លោកអាប៊ូបាការ តំបាឌូបានស្គាល់ច្បាប់អន្តរជាតិច្បាស់ណាស់ទាក់ទងនឹងអំពើប្រល័យពូជសាសន៍។
ភូមាបានរំលោភលើអនុសញ្ញាស្តីពីការការពារ និងការបង្រ្កាបលើឧក្រិដ្ឋកម្មប្រល័យពូជសាសន៍
តាមពិត ការលើកឡើងពីអំពើប្រល័យពូជសាសន៍លើជនជាតិរ៉ូហ៊ីងយ៉ាអ្នកកាន់សាសន៍អ៊ីស្លាមនៅភូមាមិនមែនទើបតែឮនៅពេលនេះទេ។ របាយការណ៍របស់អង្គការសហប្រជាជាតិ និងអង្គការសិទ្ធិមនុស្សមួយចំនួនក៏បាននិយាយច្រើនពីយុទ្ធនាការបោសសំអាតពួករ៉ូហ៊ីងយ៉ាងពីសំណាក់ទាហានភូមានៅក្នុងរដ្ឋរ៉ាក់ឃីនចន្លោះឆ្នាំ ២០១៦ និងឆ្នាំ ២០១៧។ តែអ្វីដែលហ្កំប៊ីចង់សង្កត់ធ្ងន់នៅក្នុងបទចោទប្រកាន់របស់ខ្លួនចំពោះភូមាពេលនេះ គឺផ្អែកលើអនុសញ្ញាអន្តរជាតិមួយជាក់លាក់ដែលបានអនុម័តក្នុងឆ្នាំ ១៩៤៨ គឺអនុសញ្ញាស្តីពីការការពារ និងការបង្រ្កាបលើឧក្រិដ្ឋកម្មប្រល័យពូជសាសន៍។ ប្រទេសហ្កំប៊ីបានចោទភូមាពីបទបានរំលោភបំពានលើអនុសញ្ញាមួយនេះ និងបានព្យាយាមលុបបំបាត់ពួករ៉ូហ៊ីងយ៉ាដែលជាក្រុមជនជាតិភាគតិចដោយឈរលើមូលដ្ឋាននយោបាយ និងសាសនា។
តាមហ្កំប៊ី ពួករ៉ូហ៊ីងយ៉ាជាផ្ទាំងស៊ីបនៃប្រតិបត្តិការបោសសំអាតទូទៅ និងជាលក្ខណៈប្រព័ន្ធរបស់កងទ័ពភូមាដែលធ្វើឡើងក្រោមរូបភាពជាឃាតកម្មទ្រង់ទ្រាយធំ ការចាប់រំលោភ ការបង្ខំឲ្យចាកចេញពីផ្ទះសម្បែង និងការដុតកម្ទេចភូមិ ស្រុករបស់ពួកគេ។ ការលើកឡើងរបស់ហ្គំប៊ី គឺដោយផ្អែកលើលទ្ធផលនៃការស៊ើបអង្កេតរបស់អង្គការសហប្រជាជាតិ និងផ្អែកលើរបាយការណ៍របស់ក្រុមមេធាវីហ្កំប៊ីដែលបានចុះទៅសួរពួករ៉ូហ៊ីងយ៉ាជាង ៦០០នាក់នៅក្នុងជំរំជនភៀសខ្លួនក្នុងប្រទេសបង់ក្លាដែស។ គួររម្លឹកថានៅចន្លោះឆ្នាំ ២០១៦ និង ២០១៧ កងទ័ពភូមាបានចាត់វិធានការចាស់ដៃលើពួករ៉ូហ៊ីងយ៉ាក្នុងរដ្ឋរ៉ាក់ឃីនដើម្បីសងសឹកនឹងការវាយប្រហារលើប៉ុស្តិ៍ប៉ូលិសពីពួកជ្រុលនិយមរ៉ូហ៊ីងយ៉ា។ វិធានការចាស់ដៃកាលណោះបានបង្ខំឲ្យពួករ៉ូហ៊ីងយ៉ាជាង ៧០០ ០០០នាក់ភៀសខ្លួនទៅជ្រកកោនក្នុងប្រទេសបង់ក្លាដែស។
លោកស្រីអ៊ុងសាន ស៊ូជីការពារភាពស្អាតស្អំរបស់ភូមា?
តុលាការយុត្តិធម៌អន្តរជាតិក្រុងឡាអេដែលបានបង្កើតឡើងក្នុងឆ្នាំ ១៩៤៦ ជាស្ថាប័នតុលាការអន្តរជាតិមួយដែលមានតួនាទីជាអ្នកដោះស្រាយបណ្តឹងប្តឹងដោយរដ្ឋសមាជិកមួយប្រឆាំងនឹងរដ្ឋសមាជិកមួយទៀត ឬជម្លោះរវាងរដ្ឋសមាជិក។ បន្ទាប់មក តុលាការអន្តរជាតិមួយនេះបានត្រឹមផ្តល់យោបល់ និងការយល់ឃើញរបស់ខ្លួនដោយផ្អែកលើមូលដ្ឋានច្បាប់។ អ្វីដែលប្រទេសហ្កំប៊ីចង់បាន គឺចង់ឲ្យតុលាការយុត្តិធម៌អន្តរជាតិទទួលស្គាល់ពីការខកខានរបស់ភូមាក្នុងការបំពេញកាតព្វកិច្ចច្បាប់របស់ខ្លួន។ បន្ទាប់មក ហ្កំប៊ីក៏ទាមទារឲ្យមានការសងជំងឺចិត្តដល់ពួករ៉ូហ៊ីងយ៉ាតាមរយៈការទទួលស្គាល់ពួករ៉ូហ៊ីងយ៉ាជាពលរដ្ឋភូមាពេញសិទ្ធិ និងពេញលក្ខណៈ រួមទាំងយល់ព្រមឲ្យពួកគេវិលត្រឡប់ចូលស្រុកកំណើតវិញដោយគ្មានក្តីបារម្ភអ្វីទាំងអស់។
ពីខាងភាគីភូមាដែលមានលោកស្រីអ៊ុងសាន ស៊ូជីចេញមុខការពារផ្ទាល់វិញ ប្រហែលជាគ្មានចម្លយអ្វីថ្មីដូចដែលភូមាធ្លាប់បានអះអាងច្រើនដងកន្លងមកទេ។ ចម្លើយនោះគឺថា គ្មានទេការបោសសំអាត ការលប់បំបាត់ និងការប្រល័យពូជសាសន៍លើជនជាតិរ៉ូហ៊ីងយ៉ា។ ប្រាកដណាស់ លោកស្រីអ៊ុងសាន ស៊ូជីនឹងត្រូវផ្តល់ចម្លើយនេះនៅមុខតុលាការយុត្តិធម៌អន្តរជាតិនាថ្ងៃពុធ ទី១១ ធ្នូ។ បន្ទាប់មក លោកស្រីស៊ូជីអាចបញ្ជាក់ថា ភូមាក៏មានគណៈកម្មការស៊ើបអង្កេតរបស់ខ្លួនដើម្បីស៊ើបអង្កេតរឿងនេះដែរ។ គួរបញ្ជាក់ថា ក្រៅពីបណ្តឹងទៅតុលាការយុត្តិធម៌អន្តរជាតិ ក៏នៅមានបណ្តឹងមួយទៀតទៅកាន់តុលាការព្រហ្មទណ្ឌអន្តរជាតិ។ ខុសពីតុលាការយុត្តិធម៌អន្តរជាតិ តុលាការព្រហ្មទណ្ឌអន្តរជាតិមានតួនាទីកាត់ទោសបុគ្គលអ្នកទទួលខុសត្រូវលើការធ្វើទុក្ខបុកម្នេញលើពួករ៉ូហ៊ីងយ៉ា។ បុគ្គលដែលស្ថិតក្នុងផ្ទាំងស៊ីបនេះ គឺមានឧត្តមសនីយភូមាជាច្រើននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ