បាតុករតួកគីវាយប្រហារស្ថានកុងស៊ុលថៃ ដើម្បីបង្ហាញសាមគ្គីភាពជាមួយជនជាតិអ៊ុយហ្គួរ
បាតុកម្មប្រឆាំងចិន កាន់តែរីករាលដាលធំ ឡើង នៅប្រទេសតួកគី ដោយបាតុករ កាលពីយប់ថ្ងៃពុធ ឈានចូលដល់ថ្ងៃព្រហស្បតិ៍ ទី ៩កក្កដា បានលើកគ្នាទៅដុត វាយបំផ្លាញ ស្ថានកុងស៊ុលថៃ ដើម្បីបង្ហាញសាមគ្គីភាពជាមួយប្រជាជនអ៊ុយហ្គួរ ដែលពួកគេជឿថា កំពុងរងការគាបសង្កត់ បាត់សិទ្ធិសេរីភាព គោរពសាសនាអ៊ីស្លាម នៅខេត្តស៊ីនជាំង ក្នុងប្រទេសចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០២
នៅថ្ងៃព្រហស្បតិ៍នេះ ប៉ូលិសតួកគីបាននិយាយថា គេបានចាប់ខ្លួន មនុស្ស៩នាក់ ដែលបានប្រព្រឹត្តបទល្មើស វាយបំផ្លាញស្ថានកុងស៊ុលថៃ។ នៅតួកគី បាតុកម្មប្រឆាំងចិន កើតមានតាំងពីជាងមួយសប្តាហ៍មកហើយ។ ទើបតែនៅយប់ថ្ងៃពុធ ដែល ក្រុមបាតុករតួកគី បានឈានទៅដល់ដុត វាយបំផ្លាញ ស្ថានកុងស៊ុលថៃ ក្នុងទីក្រុងអ៊ីស្តង់ប៊ូល ដើម្បីបង្ហាញសាមគ្គីភាពជាមួយប្រជាជនអ៊ុយហ្គួរ។
ក្រុមបាតុករតួកគី វាយប្រហារទៅលើស្ថានកុងស៊ុលថៃ បន្ទាប់ពីអាជ្ញាធរថៃ កាលពីថ្ងៃពុធ បានចាប់បញ្ជូនប្រជាជនអ៊ុយហ្គួរ ប្រមាណ១០០នាក់ ទៅឲ្យប្រទេសចិនវិញ។
កាលពីឆ្នាំ ២០១៤ អាជ្ញាធរថៃ បានចាប់ឃាត់ខ្លួនមនុស្សប្រមាណ ៣០០នាក់ ក្នុងបទសង្ស័យ បន្លំក្លែងឯកសារដើម្បីចូលក្នុងទឹកដីថៃ។ ពួកគេទាំងនោះ និយាយភាសាតួកគី ប៉ុន្តែ អាជ្ញាធរថៃសង្ស័យថា ពួកគេជាជនជាតិអ៊ុយហ្គួរ។ តាមអ្នកនាំពាក្យរដ្ឋាភិបាលថៃ ដែលបាននិយាយប្រាប់ទីភ្នាក់ងារព័ត៌មានបារាំង AFP នៅថ្ងៃព្រហស្បតិ៍ ជនជាតិអ៊ុយហ្គួរ ១០០នាក់ ត្រូវបានអាជ្ញាធរបញ្ជូនចេញទៅប្រទេសចិនវិញ។ នេះជាលើកទីមួយ ដែលរដ្ឋាភិបាលថៃ បាននិយាយជាផ្លូវការពីការចាប់បញ្ជូនជនជាតិអ៊ុយហ្គួរ ទៅឲ្យប្រទេសចិន។ តាមអ្នកនាំពាក្យដដែល មនុស្ស ជាង ១៧០នាក់ ក្នុងចំណោម ៣០០នាក់ ដែលគេចាប់ឃាត់ខ្លួន កាលពីឆ្នាំ ២០១៤ ត្រូវបានថៃ ចាប់បញ្ជូនរួចហើយដែរ ទៅប្រទេសតួកគី។ អាជ្ញាធរអន្តោប្រវេសន៍ថៃ កំពុងសិក្សា ស្រាវជ្រាវឯកសាររបស់មនុស្សដែលនៅសល់ មុននឹងសម្រេចថា តើនឹងត្រូវចាប់បញ្ជូនត្រលប់ទៅប្រទេសណា? ទៅតួកគី ឬទៅចិន?
ក្រុមអង្គការសិទ្ធិមនុស្សអន្តរជាតិ Human rights watchបានថ្កោលទោសចំណាត់ការរបស់អាជ្ញាធរថៃ ព្រោះថា ប្រជាជនអ៊ុយហ្គួរដែលត្រូវបញ្ជូនត្រលប់ទៅប្រទេសចិនវិញ នឹងរងការធ្វើបាប ជាប់ពន្ធនាគារ ព្រោះថា ការបន្លំលិខិតស្នាម លួចរត់ចេញពីប្រទេស ត្រូវអាជ្ញាធរចិន ចាត់ទុក ជាឧក្រិដ្ឋកម្ម ល្មើសនឹងច្បាប់ក្នុងប្រទេសចិន។
អ្នកនាំពាក្យរបស់រដ្ឋាភិបាលថៃ អះអាងថា រដ្ឋាភិបាលថៃ បានទទួលការធានាពីទីក្រុងប៉េកាំងថា នឹងធ្វើអ្វីប៉ះពាល់ដល់ប្រជាជនអ៊ុយហ្គួរ ដែលថៃបញ្ជូនទៅចិនកាលពីថ្ងៃម្សិលមិញទេ។ ដោយមកពីមានការធានារបស់ចិន ទើប ថៃយល់ព្រម បញ្ជូនជនជាតិអ៊ុយហ្គួរឲ្យត្រលប់ទៅចិនវិញ។ តាមមន្រ្តីការពារសិទ្ធិមនុស្ស តាមពិត នេះគ្រាន់តែពាក្យផ្អែម ដែលរបបសឹកប្រើ ដើម្បីបិទបាំង ចរិតពុតត្បុតរបស់ខ្លួនតែប៉ុណ្ណោះ។
ថៃ មិនចង់ប្រឈមមុខ មានបញ្ហាជាមួយចិនទេ ដោយសាររឿងជនជាតិអ៊ុយហ្គួរ
ថៃកំពុងឯកោរ បាត់បង់ការគាំទ្រពីប្រទេសលោកខាងលិច ដោយសារតែការចូលកាន់អំណាចរបស់កុ្រមយោធា។ កាលពីប៉ុន្មានខែមុននេះ លោកប្រាយុទ្ធ ចាន់អូចា មេដឹកនាំរបបសឹកថៃ ត្រូវបានលោកប្រធានាធិបតីចិន ស៊ី ជីនពីងក្រាលកម្រាលព្រំក្រហមទទួលយ៉ាងអធឹកអធម នៅទីក្រុងប៉េកាំង។ តាមអ្នកវិភាគ នៅក្នុងជំនួបជាមួយលោកប្រាយុទ្ធចាន់អូចា ប្រធានាធិបតីចិន អាចលើកនិយាយពីករណីជនជាតិអ៊ុយហ្គួរ ដែលកំពុងរត់ទៅសុំសិទ្ធិជ្រកកោន នៅប្រទេសថៃ។
ម្យ៉ាងទៀត ថៃ បដិសេធ មិនចង់ផ្តល់សិទ្ធិសុំជ្រកកោនដល់ប្រជាជនភៀសខ្លួន អ៊ុយហ្គួរ ក៏ដើម្បីប្រយោជន៍សន្តិសុខក្នុងស្រុកថៃដែរ។ ថៃ នៅតែកំពុងឈឺក្បាល ប្រឈមនឹងចលនាបះបោរហិង្សា បង្កឡើង ដោយក្រុមអ៊ីស្លាមជ្រុលនិយម នៅភាគខាងត្បូង។ ដូច្នេះ វាគ្មានហេតុផលអ្វី ដែលរបបសឹកថៃ គិតចង់ផ្តល់សិទ្ធិជ្រកកោនដល់ជនជាតិអ៊ុយហ្គួរ ដែលកាន់សាសនាអ៊ីស្លាម ហើយដែលមានជាប់ជានិច្ច ឈាមជាអ្នកធ្វើសង្រ្គាមប្រឆាំងនឹងអំណាចផ្តាច់ការនោះទេ
បាតុកម្មប្រឆាំងចិន ដើម្បីបរិហារការបង្រ្កាប របស់ចិន ទៅលើជនជាតិអ៊ុយហ្គួរ
ប៉ុន្មានសប្តាហ៍មកហើយ ប្រជាជនតួកគី ដែលមកពី ក្រុមជាតិនិយម និងកាន់សាសនាអ៊ីស្លាមផ្ទុះកំហឹង លើកគ្នាធ្វើបាតុកម្មប្រឆាំងនឹងចិន នៅទីក្រុងអ៊ីស្តង់ប៊ូល បន្ទាប់ពីមានដំណឹងចុះផ្សាយថា ប្រជាជនអ៊ុយហ្គួរ ដែលកាន់សាសនាអ៊ីស្លាម នៅខេត្តស៊ីនជាំង ត្រូវបានអាជ្ញាធរចិនហាមមិនឲ្យ តមអាហារ នៅរដូវបួស Ramadam ដែលអ្នកកាន់សាសនាអ៊ីស្លាមក្នុងពិភពលោកចាប់អនុវត្តន៍តាំងពីពាក់កណ្តាលខែមុន។ ប្រទេសចិន មានអ្នកកាន់សាសនាអ៊ីស្លាម ២០លាននាក់ ក្នុងពេលដែលប្រជាជនអ៊ុយហ្គួរ ៨លាននាក់ រស់នៅខេត្តស៊ីនជាំង កាន់សាសនាអ៊ីស្លាម។
ប្រធានាធិបតីតួកគី លោករេស៊្ហីប អ៊ែរដូហ្កាន មកពីគណបក្សអភិរក្សអ៊ីស្លាមនិយម បានជូនដំណឹងទៅទីក្រុងប៉េកាំងពីការមិនពេញចិត្ត របស់អង់ការ៉ា ទៅនឹងការដែលអាជ្ញាធរចិន បានហាមប្រជាជនអ៊ីស្លាមអ៊ុយហ្គួរ មិនឲ្យអនុវត្តន៍ ទម្លាប់ តមអាហារ នៅរដូវបួស សាសនាអ៊ីស្លាម ក្នុងខេត្តស៊ីនជាំង។ ទីក្រុងប៉េកាំងបានបដិសេធ ដំណឹងនេះ និងថា គឺកាសែតលោកខាងលិច ដែលចុះផ្សាយ បំប៉ោងព័ត៌មាន នាំឲ្យគេស្អប់ចិន។
រដ្ឋាភិបាលចិន បានសេចក្តីប្រកាស ផ្តល់ដំបូន្មានដល់ប្រជាជនរបស់ខ្លួន ដែលចេញទៅដើរកំសាន្ត នៅប្រទេសតួកគី ឲ្យប្រយ័ត្នប្រយែងចំពោះ សុវត្ថិភាព និងមិនត្រូវចូលទៅ ក្បែរក្បួនបាតុកម្ម នៅ តួកគី។
តាមទីភ្នាក់ងារព័ត៌មានបារាំងAFPដែលបានស្រង់សេចក្តីប្រកាសរបស់អាជ្ញាធរចិន នៅស៊ីនជាំង បក្សកុម្មុយនិស្តចិន ហាមមិនឲ្យមន្រ្តី រដ្ឋការ គ្រូបង្រៀន និងសិស្សសាលា អនុវត្ត ការតមអាហារ នៅក្នុងរដូវបួសសាសនាអ៊ីស្លាមនេះទេ។ ភោជនីយដ្ឋានរបស់ប្រជាជនកាន់សាសនាអ៊ីស្លាមត្រូវអាជ្ញាធរចិន បង្ខំឲ្យបើកធម្មតា ទោះប្រជាជនអ៊ីស្លាមត្រូវតម អាហារ នៅរដូវបួសក៏ដោយ។ យុវជនអ៊ុយហ្គួរ ខ្លះនិយាយថា សិស្សសាលា និងគ្រូបង្រៀនត្រូវបានអាជ្ញាធរចិន ចាប់បង្ខំឲ្យបរិភោគអាហារថ្ងៃត្រង់ ដែលតាមពិតត្រូវតមដោយក្រុមអ្នកកាន់សាសនាអ៊ុយហ្គួរ។
ដោយសារតែឃើញថា ប្រជាជនអ៊ុយហ្គួរ ដែលមានដើមកំណើតចេញពីតួកគី និងកាន់សាសនាអ៊ីស្លាមដូចប្រជាជនតួកគី ទើបក្រុមប្រជាជនជាតិនិយមតួកគី ជាច្រើនរយនាក់ ចាប់នាំគ្នាធ្វើបាតុកម្មប្រឆាំង ជាច្រើនលើក នៅមុខស្ថានទូតចិន។ អ្នកទេសចរ ចិន និងទីតាំងប្រយោជន៍របស់ចិន ក្នុងទីក្រុងអ៊ីស្តង់ប៊ូលបានរងការវាយប្រហារពីក្រុមជាតិនិយមតួកគី ដែលអះអាងថា ជាក្រុមអ្នកការពារសិទ្ធិរបស់ប្រជាជនអ៊ុយហ្គួរ នៅស៊ីនជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ