អាកាសធាតុមិនល្អអាចជាមូលហេតុដែលធ្វើឲ្យយន្តហោះAirAsiaធ្លាក់
យន្តហោះ មួយគ្រឿង របស់ក្រុមហ៊ុនអាកាសចរណ៍ AirAsia បានបាត់ពីប្រព័ន្ធរ៉ាដា ប្រមាណជាមួយម៉ោង ក្រោយបានចេញដំណើរ ពីព្រលានយន្តហោះ ស៊ូរ៉ាបាយ៉ា លើកោះហ្សាវ៉ា ប្រទេសឥណ្ឌូនេស៊ី។ គេកំពុងដាក់ការសន្និដ្ឋាន ទៅលើមូលហេតុអាកាសធាតុមិនល្អ ដែលមានព្យុះ រន្ទះកំពុងបោកបក់ក្នុងតំបន់នោះ ដែលធ្វើឲ្យយន្តហោះនេះ ជួបគ្រោះថ្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុមហ៊ុអាកាសចរណ៍ AirAsia ដែលជាក្រុមហ៊ុន លក់សំបុត្រយន្តហោះ ក្នុងតម្លៃថោកជាងគេនៅអាស៊ី បានបាត់យន្តហោះមួយគ្រឿងរបស់ខ្លួន ខណៈពេលដែលយន្តហោះនេះ កំពុងហោះហើរពីក្រុងស៊ូរ៉ាបាយ៉ា លើកោះហ្សាវ៉ា ឆ្ពោះទៅប្រទេសសឹង្ហបុរី។ ក្នុងយន្តហោះនេះ មានដឹកអ្នកដំណើរទាំងអស់ ១៥៥នាក់ និង បុគ្គលិកធ្វើការលើយន្តហោះ ៧នាក់ រួមទាំងអាកាសយានិក ២នាក់ផងដែរ។ ក្នុងចំណោម អ្នកដំណើរទាំងអស់ មានក្មេង១៦នាក់ និងទារកម្នាក់។
តាមការរាយការណ៍របស់ អ្នកនាំពាក្យក្រុមហ៊ុន AirAsia បានឲ្យដឹងថា យន្តហោះនេះបានចេញដំណើរពីព្រលានយន្តហោះ ក្រុងស៊ូរ៉ាបាយ៉ា នៅម៉ោង ៥-២០នាទីព្រឹក ហើយត្រូវទៅដល់ព្រលានយន្តហោះក្រុងសឹង្ហបុរី នៅម៉ោង ៨-៣០នាទី។ ក្រោយចេញដំណើរបាន៤២នាទី ក្នុងខណៈពេលដែលយន្តហោះ កំពុងស្ថិតនៅលើសមុទ្រហ្សាវ៉ា រវាងកោះប័រណេអូ និងកោះហ្សាវ៉ា ស្រាប់តែយន្តហោះ បានបាត់រលកសញ្ញាពីប្រព័ន្ធរ៉ាដា។
អ្នកនាំពាក្យដដែលបានបញ្ជាក់ថា មុនពេលចេញដំណើរបន្តិច អាកាសយានិក បានធ្វើការសុំប្តូរផ្លូវហោះហើរ ដែលបានគ្រោងទុក។ ដើម្បីបញ្ចៀសយន្តហោះ ពីផ្លូវដែលមានខ្យល់បក់ខ្លាំង អាកាសយានិក បានសុំធ្វើការហោះហើរ ខ្ពស់ជាងធម្មតា។
យន្តហោះនេះ ជាប្រភេទយន្តហោះ Airbus A320។ តាមការរាយការណ៍ យន្តហោះ នេះទើបតែ បានទទួលការត្រួតពិនិត្យបច្ចេកទេស និងគ្រឿងម៉ាស៊ីន ដោយភ្នាក់ងាររបស់ក្រុមហ៊ុន Airbusផ្ទាល់តែម្តង កាលពីថ្ងៃទី ១៦ វិច្ឆិកា ថ្មីៗនេះ។ ដូច្នេះ ហេតុផលដែលអាចថា យន្តហោះនេះ មានបញ្ហាបច្ចេកទេស ត្រូវបានគេទាត់ចោល។
សូមបញ្ជាក់ថា ក្នុងចំណោម អាកាសយានិកទាំងពីរនាក់ ម្នាក់ជាអ្នកបើកបរជើងចាស់ ដែលមានបទពិសោធន៍ ច្រើនឆ្នាំមកហើយ ហើយម្នាក់ទៀត ជាអ្នកបើកបរវ័យក្មេង ជនជាតិបារាំង ដែលក្រុមហ៊ុននេះ ទើបតែរើសចូលឲ្យធ្វើការ។
ទោះបីជាយ៉ាងណា ក្នុងពេលនេះ មានតែហេតុផលមួយគត់ ដែលគេគិតថា ជាមូលហេតុ នៃការធ្លាក់ គឺដោយសារតែបញ្ហាអាកាសធាតុមិនអំណោយផល ព្រោះតែមានភ្លៀង ភ្ជុះខ្លាំង ក្នុងតំបន់នេះ។ ទាហានឥណ្ឌូនេស៊ី និងក្រុមសង្គ្រោះ កំពុងតែធ្វើការយ៉ាងញាប់ដៃ ដើម្បីស្វែងរកបំណែកយន្តហោះ នៅក្នុងសមុទ្រ និងជនរងគ្រោះ ដែលអាចនៅរស់រានមានជីវិត ថ្វីត្បិតតែមានពពកខ្មៅអួរអាប់ និងខ្យល់យ៉ាងណាក៏ដោយ។ ចំណែកនៅម៉ាឡេស៊ី៝ឯណោះវិញ ខ្យល់និងភ្លៀងខ្លាំង បានបង្កជាទឹកជំនន់ យ៉ាងធ្ងន់ធ្ងរមិនធ្លាប់មាន ដែលបានសម្លាប់ជីវិតមនុស្សអស់៨នាក់ និងមនុស្សជាង១៤ម៉ឺននាក់ ត្រួវជម្លៀសចេញ ពីផ្ទះសម្បែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ