អ្នកជំនាញហូឡង់៖ យន្តហោះម៉ាឡេស៊ីMH ១៧ផ្ទុះឆេះដោយសារត្រូវវត្ថុបុកមកពីខាងក្រៅ
អ្នកជំនាញហូឡង់បានបង្ហាញរបាយការណ៍មួយរបស់ខ្លួន នៅថ្ងៃអង្គារទី ៩កញ្ញា ដែលបង្ហាញថា យន្តហោះម៉ាឡេស៊ី MH ១៧ ដែលធ្លាក់ នៅភាគខាងកើតអ៊ុយក្រែន កាលពីថ្ងៃទី ១៧ ខែកក្កដាកន្លងទៅ ត្រូវបានបុកទម្លាយដោយវត្ថុ ដែលមានល្បឿនលឿន និងបានផ្ទុះនៅលើអាកាស មុននឹងធ្លាក់មកលើដី។ យន្តហោះម៉ាឡេស៊ីដែលធ្វើដំណើរពីប្រទេសហូឡង់សំដៅប្រទេសម៉ាឡេស៊ីបានផ្ទុះធ្លាក់ និងសម្លាប់អ្នកដំណើរទាំងអស់ ២៩៨នាក់ ដែលក្នុងនោះភាគច្រើនជាប្រជាជនហូឡង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
អាជ្ញាធរហូឡង់ ទទួលបន្ទុកការស៊ើបអង្កេតលើគ្រោះថ្នាក់ធ្លាក់យន្តហោះម៉ាឡេស៊ីបានបង្ហាញរបាយការណ៍ស្តីពីមូលហេតុដែលធ្វើឲ្យយន្តហោះដឹកអ្នកដំណើរ២៩៨នាក់ ផ្ទុះធ្លាក់នៅភាគខាងកើតអ៊ុយក្រែន។ តាមការិយាល័យស៊ើបអង្កេតហូឡង់ ដែលបានសិក្សាទៅលើរូបភាពផ្កាយរណប រូបថតបំណែកយន្តហោះ និងស្តាប់សំឡេងនៅក្នុងប្រអប់ខ្មៅ គឺវត្ថុមកពីខាងក្រៅ ដែលហោះក្នុងល្បឿនលឿនបានបុកទម្លាយតួខ្លួនយន្តហោះ ដែលធ្វើឲ្យយន្តហោះផ្ទុះ បែកជាបំណែក នៅលើអាកាស មុននឹងធ្លាក់មកលើដី។ ការសន្និដ្ឋានបែបនេះបានធ្វើឲ្យអ្នកជំនាញរបស់ការិយាល័យស៊ើបអង្កេតហូឡង់សម្រេចសេចក្តីថា យន្តហោះម៉ាឡេស៊ីដែលផ្ទុះធ្លាក់នៅលើទឹកដីអ៊ុយក្រែន គឺមិនមែនបណ្តាលមកពីបញ្ហាបច្ចេកទេស ឬកំហុសរបស់អ្នកបើកយន្តហោះនោះទេ។
តាមអ្នកជំនាញហូឡង់ដដែល ការផ្ទុះនៅលើអាកាសបានធ្វើឲ្យយន្តហោះបាត់ពីក្នុងរ៉ាដា បាត់ទំនាក់ទំនងជាមួយអ្នកត្រួតពិនិត្យអាកាសចរណ៍ និងធ្វើឲ្យការថតទុកទិន្នន័យរបស់ប្រអប់ខ្មៅត្រូវឈប់ភ្លាមៗ។ អ្នកជំនាញហូឡង់បានប្រើពាក្យថា យន្តហោះត្រូវវត្ថុដែលហោះក្នុងល្បឿនលឿនបុកទម្លុះ ប៉ុន្តែ មិនបញ្ជាក់ច្បាស់ថា វាជាមីស៊ីល និងមិនបានទម្លាក់កំហុសទៅលើភាគីណាថា ជាអ្នកប្រព្រឹត្តទេ។ រដ្ឋអាជ្ញាហូឡង់វិញបានអះអាងថា ខ្លួននឹងបើកការស៊ើបអង្កេតដាច់ដោយឡែកមួយទៅលើករណីឧក្រិដ្ឋកម្ម នៅក្នុងសំណុំរឿងធ្លាក់យន្តហោះម៉ាឡេស៊ី។
រហូតមក អាជ្ញាធរអ៊ុយក្រែន និងអាមេរិក ដែលបានប្រើរូបភាពផ្កាយរណប បានចោទក្រុមបំបែកខ្លួនអ៊ុយក្រែន និយមរុស្ស៊ី ថា ជាអ្នកបាញ់មីស៊ីលប្រភេទប៊ូកទៅលើយន្តហោះម៉ាឡេស៊ី MH ១៧ ប៉ុន្តែ ពួកឧទ្ទាម និងទីក្រុងម៉ូស្គូដែលត្រូវអាមេរិកចោទថា ជាអ្នកផ្តល់មីស៊ីលប៊ូកទៅឲ្យពួកឧទ្ទាមនោះបានបដិសេធរុញច្រានចោលការចោទប្រកាន់ និងទម្លាក់កំហុសទៅលើទាហានអ៊ុយក្រែនទៅវិញ។
បើទោះបីជារបាយការណ៍របស់អាជ្ញាធរហូឡង់មិនបានបញ្ជាក់ច្បាស់ពីប្រភេទវត្ថុដែលធ្វើឲ្យយន្តហោះម៉ាឡេស៊ីផ្ទុះធ្លាក់ ប៉ុន្តែ យ៉ាងហោច វាបានបញ្ជាក់ជាផ្លូវការ និងជាលើកទីមួយ ពីមូលហេតុដែលធ្វើយន្តហោះម៉ាឡេស៊ីផ្ទុះធ្លាក់។ ម្យ៉ាងទៀត របាយការណ៍ចេញផ្សាយ នៅថ្ងៃនេះគ្រាន់តែជារបាយការណ៍បឋមប៉ុណ្ណោះ ចំណែករបាយការណ៍ពិស្តារ និងចុងក្រោយ នឹងត្រូវចេញផ្សាយនៅពាក់កណ្តាលឆ្នាំ២០១៥ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ