ចិនក្លាយជាប្រទេសនាំចេញគ្រឿងសព្វាវុធលំដាប់ទី៣លើពិភពលោក
ចុះផ្សាយនៅថ្ងៃ៖
ស្តាប់ - ០៤:០៤
ចិនបានយកឈ្នះបារាំង និងអាល្លឺម៉ង់ ដោយក្លាយជាប្រទេសនាំចេញគ្រឿងសព្វាវុធលំដាប់ទី៣ នៅលើពិភពលោក។ នេះបើយោងតាមរបាយការណ៍របស់វិទ្យាស្ថានក្រុងស្តុកខុម (ហៅកាត់ថា SIPRI) ដែលចេញផ្សាយ កាលពីថ្ងៃចន្ទ។ យោងតាមតួលេខនៅក្នុងរបាយការណ៍នេះ គេសង្កេតឃើញថា សហរដ្ឋអាមេរិក និងរុស្ស៊ី នៅតែជាតួអង្គដ៏សំខាន់ពីរ ដែលគ្រប់គ្រងទីផ្សារសព្វាវុធពិភពលោក ក៏ប៉ុន្តែ ចិនក៏កំពុងតែបោះជំហានចូលយ៉ាងជ្រៅផងដែរ ទៅក្នុងទីផ្សារសព្វាវុធ ដែលអាចនឹងក្លាយទៅជាគូប្រជែងដ៏ធំមួយទៅថ្ងៃអនាគត។
របាយការណ៍របស់វិទ្យាស្ថានក្រុងស្តុកខុម (Stockholm International Peace Research Institute) ដែលត្រូវបានចុះផ្សាយ កាលពីថ្ងៃចន្ទ គឺផ្តោតទៅលើទិន្នន័យរយៈពេល ៥ឆ្នាំ ពីឆ្នាំ២០១០ ដល់ឆ្នាំ២០១៤។ តាមរយៈទិន្នន័យនេះ គេឃើញថា នៅក្នុងរយៈពេល ៥ឆ្នាំចុងក្រោយនេះ សហរដ្ឋអាមេរិកនៅតែជាប្រទេសដែលជាប់ចំណាត់ថ្នាក់លេខ១ខាងការនាំចេញគ្រឿងសព្វាវុធ ដោយគ្រប់គ្រងចំណែកទីផ្សារ ៣១% ហើយរុស្ស៊ីគ្រប់គ្រងចំណែកទីផ្សារ ២៧% ស្ថិតនៅលំដាប់ទី២។ ប្រទេស ៣ផ្សេងទៀត គឺចិន បារាំង និងអាល្លឺម៉ង់ ដែលនៅចំណាត់ថ្នាក់បន្ទាប់ៗ គឺស្ថិតនៅពីក្រោយយ៉ាងដាច់ឆ្ងាយ ដោយប្រទេសនីមួយៗ គ្រប់គ្រងចំណែកទីផ្សារតែប្រមាណជា ៥%ប៉ុណ្ណោះ។
តាមការពិត បារាំងត្រូវស្ថិតនៅលំដាប់ទី៣ ក៏ប៉ុន្តែ ដោយសារតែរដ្ឋាភិបាលបារាំងសម្រេចផ្អាកការលក់នាវាចម្បាំង Mistral ទៅឲ្យរុស្ស៊ី ដោយមកពីវិបត្តិអ៊ុយក្រែន ទើបបារាំងត្រូវចិនប្រជែងយកចំណាត់ថ្នាក់លេខ៣នេះបាន។
បើគេពិនិត្យមើលជារួម នៅក្នុងរយៈពេល ៥ឆ្នាំកន្លងទៅនេះ ការនាំចេញគ្រឿងសព្វាវុធរបស់បារាំង និងអាល្លឺម៉ង់ សុទ្ធតែត្រូវធ្លាក់ចុះ ក្នុងពេលដែលការនាំចេញគ្រឿងសព្វាវុធចិនមានការកើនឡើងរហូតដល់ទៅ ១៤៣%។ អតិថិជនសំខាន់ៗរបស់ចិន គឺស្ថិតនៅអាស៊ី ជាពិសេស ប៉ាគីស្ថាន បង់ក្លាដែស និងភូមា ដែលតំណាងឲ្យជិត ៧០% នៃការនាំចេញសរុបនៃគ្រឿងសព្វាវុធចិន។
ក៏ប៉ុន្តែ បន្តិចម្តងៗ ចិនបានពង្រីករង្វង់អតិថិជនរបស់ខ្លួនកាន់តែធំឡើងៗ ដោយបាននាំចេញអាវុធទៅកាន់ប្រទេសចំនួន ១៨ នៅអាហ្វ្រិក និងប្រទេសមួយចំនួនទៀត នៅអាមេរិកឡាទីន ហើយជាពិសេស អ្វីដែលបានធ្វើឲ្យគេភ្ញាក់ផ្អើលខ្លាំង គឺការចុះកិច្ចសន្យាកាលពីខែកញ្ញាឆ្នាំ២០១៣ លើគម្រោងលក់ប្រព័ន្ធមីស៊ីលការពារដែនអាកាសចិន ក្នុងតម្លៃជាង ៣ពាន់លានដុល្លារអាមេរិក ទៅឲ្យប្រទេសតួកគី ដែលជាសម្ព័ន្ធមិត្តអាមេរិកក្នុងអង្គការអូតង់។ ថ្វីដ្បិតតែមកទល់នឹងពេលបច្ចុប្បន្ននេះ ការអនុវត្តកិច្ចសន្យានេះត្រូវជាប់គាំង ដោយសារតែមានការជំទាស់ពីសំណាក់សហរដ្ឋអាមេរិក និងប្រទេសក្នុងអង្គការអូតង់ ក៏ប៉ុន្តែ បណ្តាក្រុមហ៊ុនផលិតអាវុធធំៗ ទាំងនៅអឺរ៉ុប និងនៅអាមេរិក សុទ្ធតែនាំគ្នាទទួលស្គាល់ថា ទៅថ្ងៃអនាគត ចិនគឺជាគូប្រជែងដ៏ធំមួយ នៅក្នុងទីផ្សារសព្វាវុធអន្តរជាតិ ហើយកម្លាំងប្រកួតប្រជែងរបស់ចិនបានចាប់ផ្តើមឈានចូលទៅក្នុងប្រភេទសព្វាវុធ ដែលប្រើបច្ចេកវិទ្យាកាន់តែទំនើបឡើងៗ ពីមួយថ្ងៃទៅមួយថ្ងៃ។
អ្នកជំនាញខាងទីផ្សារសព្វាវុធយល់ថា គ្រឿងសព្វាវុធចិនមានលក្ខណៈពិសេស ២ ដែលជាលក្ខខណ្ឌអំណោយផលក្នុងការប្រកួតប្រជែងលើទីផ្សារអន្តរជាតិ។
ទីមួយ គឺតម្លៃ។ គ្រប់គ្នាទទួលស្គាល់ថា បច្ចេកវិទ្យាសព្វាវុធចិននៅអន់ជាងប្រទេសលោកខាងលិច ក៏ប៉ុន្តែ វាមានតម្លៃថោកជាងច្រើន។ និយាយជារួម គ្រឿងសព្វាវុធចិន ស្ថិតក្នុងចំណោមប្រភេទផលិតផល ដែលមានគុណភាពមិនសូវល្អ តែក៏មិនអន់ពេក ពោលគឺ គុណភាពល្អល្មមអាចប្រើការបាន ក៏ប៉ុន្តែ មានតម្លៃថោក។ ផលិតផលប្រភេទនេះអាចមានប្រជាប្រិយភាពក្នុងចំណោមអតិថិជន ដែលជាប្រទេសកំពុងអភិវឌ្ឍ ជាពិសេស ប្រទេសនៅអាហ្វ្រិក និងអាមេរិកឡាទីន ដែលមិនសូវមានលុយ ក៏ប៉ុន្តែ ត្រូវការ គ្រឿងសព្វាវុធ។
ក្រៅពីតម្លៃ ក្រុមហ៊ុនផលិតគ្រឿងសព្វាវុធចិន នៅមានលក្ខខណ្ឌអំណោយផលសំខាន់មួយទៀត គឺនយោបាយមិនជ្រៀតជ្រែកកិច្ចការផ្ទៃក្នុងប្រទេសដទៃរបស់រដ្ឋាភិបាលចិន។
កាលពីថ្ងៃចន្ទ នៅក្រោយពេលការចេញផ្សាយរបាយការណ៍របស់វិទ្យាស្ថានក្រុងស្តុកខុម ដែលបង្ហាញពីការកើនឡើងខ្លាំងនៃការនាំចេញគ្រឿងសព្វាវុធចិន អ្នកនាំពាក្យក្រសួងការបរទេសចិនបានថ្លែងប្រាប់អ្នកសារព័ត៌មានថា “ចិនតែងតែមានការប្រយ័ត្នប្រយែងក្នុងការនាំចេញគ្រឿងសព្វាវុធទៅក្រៅប្រទេស” ដោយចិនតែងតែប្រកាន់ខ្ជាប់នូវគោលការណ៍មួយចំនួន គឺគ្រឿងសព្វាវុធដែលគេទិញពីចិនត្រូវតែយកទៅប្រើប្រាស់ដើម្បី “ការពារខ្លួន ដោយមិនបង្កឲ្យប៉ះពាល់ដល់សន្តិភាព និងស្ថិរភាពអន្តរជាតិ ឬក្នុងតំបន់ៗ"។
ក៏ប៉ុន្តែ នៅក្នុងការអនុវត្តជាទូទៅវិញ គេសង្កេតឃើញថា ចិនមិនសូវជាធ្វើការទាមទារ ឬដាក់លក្ខខណ្ឌអ្វីច្រើន មុននឹងលក់គ្រឿងសព្វាវុធទៅឲ្យប្រទេសណាមួយនោះទេ។ សម្រាប់ចិន បញ្ហានយោបាយ សិទ្ធិមនុស្ស ឬប្រជាធិបតេយ្យ គឺជាកិច្ចការផ្ទៃក្នុងរបស់ប្រទេសគេ។ អ្វីដែលសំខាន់សម្រាប់ចិន គឺការធ្វើជំនួញ។ ចំណុចនេះហើយដែលធ្វើឲ្យការចរចាលក់គ្រឿងសព្វាវុធចិនកាន់តែមានភាពងាយស្រួលមួយកម្រិតទៀត បើធៀបនឹងក្រុមហ៊ុនមកពីប្រទេសលោកខាងលិច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ