ចិនបង្ហាញជាលើកទីមួយ យន្តហោះចម្បាំងដោយគ្មានមនុស្សបើក
ប្រទេសចិនបានសម្រេចជោគជ័យក្នុងការបង្ហោះសាកល្បងជាលើកទីមួយ យន្តហោះ ដែលគ្មានមនុស្សបើក Drone កាលពីថ្ងៃព្រហស្បតិ៍ម្សិលមិញ។ យោងតាមការចុះផ្សាយរបស់សារព័ត៌មានចិន នៅថ្ងៃសុក្រនេះ យន្តហោះគ្មានមនុស្សបើក ដែលគេដាក់ឈ្មោះថា "លី ជា" "ដាវដ៏មុតស្រួច" នឹងធ្វើឲ្យគម្លាតបច្ចេកវិទ្យារវាងចិន និងប្រទេសលោកខាងលិចកាន់តែរួមតូច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
កងទ័ពចិនមិនបង្អន់មហិច្ឆតាក្នុងការអភិវឌ្ឍន៍បច្ចេកវិទ្យាចុងក្រោយរបស់ខ្លួន ក្នុងវិស័យយោធា។ បន្ទាប់ពីបង្ហាញនាវាផ្ទុកយន្តហោះ និងយន្តហោះចម្បាំងដែលប្រព័ន្ធរ៉ាដាមិនអាចចាប់សញ្ញាកាលពីឆ្នាំ ២០១១ ប្រទេសចិនទើបបង្ហាញយន្តហោះចម្បាំងមួយទៀត ប៉ុន្តែ លើកនេះ ជាយន្តហោះដែលគ្មានមនុស្សបើក Drone។ នេះជាលើកទីមួយ ដែលប្រទេសចិនមានយន្តហោះចម្បាំង ប្រភេទDrone គ្មានមនុស្សបើក។
នៅថ្ងៃនេះ កាសែតក្នុងស្រុកចិនជាច្រើនបានសរសេរ កោតសរសើរស្នាដៃ និងសមត្ថភាពរបស់កងទ័ពចិន ដែលបានធ្វើឲ្យប្រទេសចិន ក្លាយជាប្រទេសទីបួន បន្ទាប់ពីអាមេរិក បារំាង និងអង់គ្លេស ដែលមានយន្តហោះចម្បាំង គ្មានមនុស្សបើក។
តាមវីដេអូដែលគេបង្ហោះនៅលើអ៊ីនធ័រនែត លី ជា ឬ ដាវដ៏មុតស្រួច ជាយន្តហោះគ្មានមនុស្សបើករបស់ចិន ដែលមានរូបរាងស្រដៀងទៅនឹងយន្តហោះចម្បាំងរបស់អាមេរិក US B2 ដែលល្បីឈ្មោះជាអាកាសយានទម្លាក់គ្រាប់បែកនៅសម័យសង្រ្គាមត្រជាក់។ យោងតាមអតីតមេបញ្ជាការកងទ័ពប្រជាជនចិន ដែលដកស្រង់សំដីដោយកាសែតចិន South China Post យន្តហោះចម្បាំងគ្មានមនុស្សបើក លី ជា ត្រូវបានកសាងឡើងសម្រាប់កងទ័ពអាកាស និងជើងទឹករបស់ចិន។ វាមានមុខងារប្រយុទ្ធ ចាប់ព័ត៌មាន និងកំណត់ទិសដៅ។ យន្តហោះគ្មានមនុស្សបើក លី ជា ជាប្រភេទយន្តហោះទំនើបដែល ប្រព័ន្ធរ៉ាដាមិនអាចចាប់សញ្ញាបាន ហើយអាចហោះក្នុងកំពស់ខ្ពស់ ប៉ុន្តែ អាចថតរូប និងផ្តល់ទិន្នន័យជាក់លាក់ស្តីពីស្ថានភាព នៅសមុទ្រចិនភាគខាងត្បូង និងខាងកើត។ ពោលគឺយន្តហោះគ្មានមនុស្សបើក នឹងជួយឲ្យទីក្រុងប៉េកាំង ធ្វើនយោបាយ និងសម្រេចចិត្ត ក្នុងពេលមានដោះស្រាយជម្លោះជាមួយប្រទេស សមាជិករបស់អាស៊ាន និងជាមួយជប៉ុន ដែលកំពុងទាមទារដីកោះជាមួយចិន។
ការបង្ហាញឲ្យឃើញយន្តហោះគ្មានមនុស្សបើករបស់ចិន កើតមាននៅតែប៉ុន្មានសប្តាហ៍ក្រោយដែល ជប៉ុនបានបរិហារពីវត្តមានរបស់យន្តហោះយកការណ៍ដែលបានជប៉ុនចោទថា បានហោះឆ្វែលពីលើកោះសេនកាគូ ដែលជប៉ុនកំពុងមានជម្លោះ ទាមទារជាមួយចិន។ កងទ័ពជប៉ុនធ្លាប់បានព្រមានបាញ់ទម្លាក់រាល់យន្តហោះដែលហោះលើទឹកដីរបស់ខ្លួន ប៉ុន្តែ ចិនវិញបានព្រមានបកទៅវិញថា ជាសកម្មភាពបង្កសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ