ជនជាតិអ៊ុយហ្គួរត្រូវបាញ់សម្លាប់ និងចាប់ខ្លួន នៅតាមព្រំដែនចិនខាងត្បូង
អាជ្ញាធរចិនបានចាត់វិធានការក្តៅ ដើម្បីទប់ស្កាត់កុំឲ្យជនជាតិអ៊ុយហ្គួររត់ចេញទៅក្រៅប្រទេស។ យោងតាមកាសែតក្នុងស្រុកចិន ចុះផ្សាយនៅថ្ងៃសុក្រទី ១៧កក្កដា ក្នុងរយៈពេល មួយឆ្នាំ ២០១៤ ប៉ូលិសចិន នៅខេត្តយូណាន ដែលមានព្រំដែនជាប់ជាមួយ ភូមា វៀតណាម និងឡាវ បានបាញ់សម្លាប់ជនជាតិអ៊ុយហ្គួរ ៤នាក់ និងចាប់ខ្លួន ៥០០នាក់ ដែលប៉ុនប៉ងចង់រត់ចោលស្រុក។
ចុះផ្សាយនៅថ្ងៃ៖
ស្តាប់ - ០២:២២
ដោយដកស្រង់របាយការណ៍របស់ប៉ូលិសខេត្តយូណាន កាសែតផ្លូវរដ្ឋចិន បានសរសេរលម្អិតពីវិធានការតឹងរ៉ឹងរបស់អាជ្ញាធរចិន ដើម្បីទប់ស្កាត់កុំឲ្យជនជាតិអ៊ុយហ្គួររត់ចេញទៅក្រៅប្រទេស។
ការចុះផ្សាយដោយកម្ររបស់កាសែតចិន ដែលនិយាយពីវិធានការរបស់ប៉ូលិសចិន ទៅលើជនជាតិភាគតិចអ៊ុយហ្គួរ ធ្វើឡើងបន្ទាប់ពីទីក្រុងបាងកកបានបញ្ជូនជនជាតិអ៊ុយហ្គួរ ប្រមាណ ១០៩នាក់ ត្រលប់ទៅប្រទេសចិនវិញ កាលពីសប្តាហ៍មុន។ ចំណាត់ការរបស់រដ្ឋាភិបាលថៃ បានទទួលការរិះគន់ និងការថ្កោលទោស ពីអង្គការការពារសិទ្ធិមនុស្ស និងសហគមន៍អន្តរជាតិ។ ដោយសាររឿងនេះ ស្ថានកុងស៊ុនថៃ នៅប្រទេសតួកគី ត្រូវដុត វាយបំផ្លាញដោយក្រុមបាតុករតួកគី ដែលគាំទ្រប្រជាជនអ៊ុយហ្គួរ។
ទីក្រុងប៉េកាំងវិញ បានថ្លែងអំណរគុណរដ្ឋាភិបាលថៃ ដែលចាប់បញ្ជូនជនជាតិអ៊ុយហ្គួរមកឲ្យចិនវិញ។ តាមទីក្រុងប៉េកាំង ជនជាតិអ៊ុយហ្គួរដែលបានលួចរត់គេចចេញពីប្រទេស ទាំងអស់ គឺជាក្រុមជ្រុលនិយម ដែលចង់ប្រើប្រាស់ទឹកដីតួកគី ដើម្បី ឆ្លងចូលទៅចូលរួមជាមួយក្រុមជីហាតអង្គការរដ្ឋអ៊ីស្លាម នៅ ស៊ីរី និងអ៊ីរ៉ាក់។
នៅក្នុងរបាយការណ៍ដែលនិយាយពីវិធានការទប់ស្កាត់ កុំឲ្យប្រជាជនអ៊ុយហ្គួរចាកចេញទៅក្រៅស្រុក ប៉ូលិសចិនបានអះអាងថា ជនសង្ស័យដែលត្រូវប៉ូលិសបាញ់សម្លាប់ ភាគច្រើន ជាក្រុមជ្រុលនិយមដែលបានវាយប្រហារមុនទៅលើប៉ូលិស។ មានព្រំដែនជាប់ជាមួយ ភូមា វៀតណាម និងឡាវ អាជ្ញាធរខេត្តយូណានទទួលស្គាល់ថា បានបង្កើនកម្លាំង នៅតាមព្រំដែន ដើម្បីទប់ស្កាត់ប្រជាជនកុំឲ្យចេញទៅក្រៅប្រទេស។ ទីក្រុងគួនមិញ របស់ខេត្តយូណាន កាលពីឆ្នាំមុន ក៏ធ្លាប់ជាកន្លែងដែលមានការវាយប្រហារសម្លាប់មនុស្សប្រមាន ៣១នាក់ និងរបួស ១៤១ ដែលបង្កឡើងដោយក្រុមសកម្មជន ដែលប៉ូលិសចិន អះអាងថា មានកំណើតជាជនជាតិអ៊ុយហ្គួរ។
តាមអង្គការការពារសិទ្ធិមនុស្ស ជនជាតិអ៊ុយហ្គួរជាច្រើនរយនាក់បានចាកចោលភូមិកំណើត នៅខេត្តស៊ីនជាំង ក្នុងប្រទេសចិន ដោយសារតែពួកគេមិនអាចទ្រាំទ្រ នឹងអំពើហិង្សា នយោបាយរើសអើង និងការគាបសង្កត់ ទាំងផ្នែកសាសនា និងវប្បធម៌ ពីសំណាក់អាជ្ញាធរចិន។ ពួកគេភាគច្រើនលួចឆ្លងដែនដោយខុសច្បាប់ ចូលទៅប្រទេសបណ្តាប្រទេសអាស៊ីអាគ្នេយ៍ ដើម្បីឆ្លងបន្ត ទៅរស់នៅប្រទេសតួកគី។
តាមរបាយការណ៍របស់អង្គការសិទ្ធិមនុស្សhuman rights watch ចេញផ្សាយនៅសប្តាហ៍មុន ជនជាតិអ៊ុយហ្គួរ និងប្រជាជនទីបេរងការរើសអើង និងគ្មានសិទ្ធិសេរីភាពក្នុងការធ្វើដំណើរទៅក្រៅប្រទេស។ ប្រៀបធៀបនឹងជនជាតិហាន ដែលអាចទទួលបានលិខិតឆ្លងដែនក្នុងរយៈពេល តែ ១៥ថ្ងៃ ប្រជាជនទីបេ និងអ៊ុយហ្គួរ ត្រូវរង់ចាំដល់ទៅ ៥ ឆ្នាំ ហើយជាញឹកញយ ពួកគេបានត្រឹមលឺពាក្យបដិសេធ គ្មានបានលិខិតឆ្លងដែន ធ្វើដំណើរទៅបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ