ចិន៖មានភ្លើងឆាបឆេះជាថ្មីនៅកន្លែងផ្ទុះក្នុងទីក្រុងកំពង់ផែធានជីន
នៅក្នុងប្រទេសចិន ជាងមួយសប្តាហ៍ក្រោយព្រឹត្តិការណ៍ផ្ទុះឆេះនៅឃ្លាំងស្តុកសារធាតុគីមី និងជាតិផ្ទុះនៅទីក្រុងកំពង់ផែធានជីនមក មានភ្លើងឆាបឆេះជាថ្មីចំនួន ៤ដងបានកើតមាននៅទីកន្លែងផ្ទុះនាថ្ងៃសុក្រ ទី២១ សីហា។ តែគេមិនដឹងថា តើប្រភពភ្លើងឆេះបានកើតចេញពីអ្វីទេ។ យ៉ាងណាក៏ដោយ ប្រតិបត្តិការប្រមូល និងសំអាតសារធាតុគីមីនៅកន្លែងផ្ទុះបាននិងកំពុងបន្តធ្វើយ៉ាងសកម្ម។ ដោយឡែកតំាងពីយប់ថ្ងៃព្រហស្បតិ៍ ទី២០ សីហាមក គេសង្កេតឃើញរូបភាពផ្សព្វផ្សាយលើអ៊ីនធឺណែតដែលបង្ហាញពីខ្មោចត្រីជាច្រើនពាន់ក្បាលក្នុងទីក្រុងធានជីន។ តែរដ្ឋអំណាចបានបញ្ជាក់ថា ត្រីងាប់ទំាងនោះមិនមែនដោយសារពុលសារធាតុគីមីធ្លាយចេញពីការគ្រោះមហន្តរាយផ្ទុះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ការឆាបឆេះជាច្រើនកន្លែងបន្តបន្ទាប់គ្នាជាថ្មីបានកើតមានឡើងនៅថ្ងៃសុក្រ ទី២១ សីហាត្រង់ទីតំាងផ្ទុះកាលពីជិតមួយសប្តាហ៍កន្លងទៅ នេះជាព័ត៌មានផ្សព្វផ្សាយដោយកាសែតចិនស៊ីនហួរ។ យោងតាមកាសែត ការឆាបឆេះបានកើតមានឡើងនៅកន្លែងស្តុករថយន្តមួយដែលទើបមានរថយន្តមកដល់ថ្មីៗយ៉ាងតិច ៣ ០០០គ្រឿង ហើយគឺប្រេងសំាងក្នុងធុងដែលបានបង្កឲ្យមានអណ្តាតភ្លើងឆាបឆេះឡើង។ គួរជម្រាបជូនថា ជិតមួយសប្តាហ៍ ក្រោយគ្រោះ មហន្តរាយផ្ទុះឆេះនៅឃ្លាំងស្តុកសារធាតុគីមី និងជាតិផ្ទុះនៅទីក្រុងកំពង់ផែធានជីនមក ពំនូកភ្លើងនៅកន្លែងផ្ទុះហាក់ដូចជាមិនទាន់រលត់ឈឹងនៅឡើយទេ ហើយវត្តមានផ្សែងភ្លើងតិច ឬច្រើនចេញពីកន្លែងផ្ទុះនៅតែបន្តមានជាប់ជាប្រចំា។
ទន្ទឹមគ្នានេះ ពលរដ្ឋរស់ក្បែរទីកន្លែងកើតហេតុនៅតែបារម្ភខ្លំាងចំពោះការសាយភាយ រីករាលដាលនូវសារធាតុគីមីពុល cyanure សូដ្យូម ពិសេសបន្ទាប់ពីរដ្ឋអំណាចបានប្រកាសឲ្យដឹងពីកម្រិត cyanure សូដ្យូមក្នុងទឹកក្បែរតំបន់គ្រោះថ្នាក់ដែលលើសពីកម្រិតអនុញ្ញាតដល់ទៅ ៣៥៦ដង។ នៅថ្ងៃសុក្រ ទី២១ សីហា រដ្ឋអំណាចក្រុងធានជីនក៏បានបញ្ជាក់ថា កម្រិត cyanure សូដ្យូមនៅក្នុងបរិយាកាសក៏មានកម្រិតលើសពីកម្រិតអនុញ្ញាតដែរ។ ក្នុងថ្ងៃសុក្រដដែល អង្គការក្រៅរដ្ឋាភិបាល Greenpeace ក៏បានប្រាប់ឲ្យដឹងពីវត្តមានសារធាតុគីមីពុល cyanure សូដ្យូមនៅលើផ្ទៃទឹកទន្លេជិតកន្លែងផ្ទុះ និងនៅក្នុងទឹកទន្លេ Haihe ដែលស្ថិតចម្ងាយ ៦គីឡូម៉ែត្រពីកន្លែងផ្ទុះ។
គឺនៅតាមមាត់ទន្លេ Haihe នោះឯងដែលក្រុមអ្នកនេសាទបានប្រទះឃើញខ្មោចត្រីជាច្រើនពាន់ក្បាល។ រូបភាពខ្មោចត្រីជាច្រើនពាន់ក្បាលនេះត្រូវបានផ្សព្វផ្សាយតាមអ៊ីនធឺណែតតំាងពីយប់ថ្ងៃព្រហស្បតិ៍ ទី២០ សីហាមកម្ល៉េះ។ តើត្រីទំាងនោះបានងាប់ដោយពុលសារធាតុគីមី cyanure សូដ្យូម ឬយ៉ាងណា?។ រដ្ឋអំណាចបានផ្តល់ចម្លើយច្បាស់ៗថា មិនភ្ញាក់ផ្អើលចំពោះត្រីងាប់គរគ្នាយ៉ាងច្រើនសម្បើមក្នុងរដូវក្តៅទេ ព្រោះទឹកនៅទីនោះបានបំពុលដោយរោងចក្រជាច្រើនដែលស្ថិតក្បែរនោះ។ និយាយឲ្យខ្លី ត្រីទំាងអស់នោះមិនមែនងាប់ដោយពុលសារធាតុគីមី cyanure សូដ្យូមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ