លោកទីន ចវ មនុស្សជំនិតរបស់លោកស្រីអ៊ុង សានស៊ូជីបានក្លាយជាប្រធានាធិបតីថ្មីភូមា
នៅថ្ងៃអង្គារ ទី១៥ មីនានេះ ប្រទេសភូមាមានប្រធានាធិបតីថ្មីដែលមានឈ្មោះថា ទីន ចវ។ លោកទីន ចវបានទទួលសម្លេងគាំទ្រពីក្រុមអ្នកតំណាងរាស្រ្តចំនួន ៣៦០សម្លេងលើសម្លេងសរុប ៦៥២សម្លេងដែលមាននៅក្នុងរដ្ឋសភា។ នេះជាលើកទី១ ក្នុងរយៈពេលជិត ៥០ឆ្នាំកន្លងទៅដែលកៅអីប្រធានាធិបតីភូមាបានធ្លាក់ក្នុងកណ្តាប់ដៃឥស្សរជនស៊ីវិលម្នាក់។ តើលោកទីន ចវជានរណា និងមានប្រវត្តិរូបសង្ខេបអ្វីខ្លះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
មានអាយុ ៦៩ឆ្នាំ លោកទីន ចវជាសមាជិករបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ និងជាមនុស្សជំនិតខ្លាំងម្នាក់របស់លោកស្រីអ៊ុង សានស៊ូជី។ រហូតមកដល់ពេលនេះមជ្ឈដ្ឋានទូទៅតែងតែស្គាល់លោកទីន ចវជាអ្នកបើកឡានឲ្យលោកស្រីអ៊ុងសានស៊ូជី ហើយគ្រប់សារព័ត៌មានក្នុងស្រុកក៏ធ្លាប់បានសរសេរច្រើនពីព័ត៌មាននេះ។ តែតាមពិតទៅ លោកទីន ចវគឺជាអ្នកចេះដឹងម្នាក់ដែលមានសញ្ញាប័ត្រខ្ពស់ និងមានក្រុមគ្រួសារធ្លាប់ចូលប្រឡូកយ៉ាងជ្រៅនៅក្នុងឆាកនយោបាយភូមា។
រហូតមកដល់ថ្ងៃនេះ គេមិនសូវមានព័ត៌មានលំអិតច្រើនទាក់ទងនឹងប្រវត្តិរូបរបស់លោកទីន ចវទេ។ អ្វីដែលគេបានដឹង លោកទីន ចវទទួលបានសញ្ញាប័ត្រសេដ្ឋកិច្ចពីសកលវិទ្យាល័យសេដ្ឋកិច្ចក្រុងរ៉ង់ហ្គូនក្នុងឆ្នាំ ១៩៦៨ និងដែលរូបលោកធ្លាប់បានធ្វើជាគ្រូបង្រៀននៅក្នុងសកលវិទ្យាល័យនោះ។ នៅដំណាច់ឆ្នាំ ១៩៧០ លោកទីន ចវបានចូលបម្រើការងារនៅក្នុងក្រសួងការបរទេស មុននឹងបន្តការសិក្សានៅក្នុងប្រទេសអង់គ្លេសដែលលោកទទួលបានសញ្ញាប័ត្រសេដ្ឋកិច្ចពីសកលវិទ្យាល័យ Oxford។ក្នុងឆ្នាំ ១៩៨៧ លោកទីន ចវក៏បានទៅសិក្សាផ្នែកសេដ្ឋកិច្ចនៅសហរដ្ឋអាមេរិកដែរ។
ជាមិត្តភ័ក្តពីកុមារភាពរបស់លោកស្រីអ៊ុង សានស៊ូជី លោកទីន ចវមានឪពុកជាអ្នកកវីនិពន្ធភូមាដ៏ល្បីល្បាញ ហើយរូបឪពុករបស់គាត់ក៏ធ្លាប់បានឈរឈ្មោះជាបេក្ខជនរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យនាការបោះឆ្នោតជាតិឆ្នាំ ១៩៨៨ ដែលរបបសឹកមិនបានទទួលស្គាល់លទ្ធផលបោះឆ្នោតដែលគណបក្សលោកស្រីអ៊ុង សានស៊ូជីឈ្នះឆ្នោតទេ។ ចំណែកប្អូនថ្លៃប្រុសរបស់លោកទីន ចវក៏ជាអ្នកដែលបានចូលរួមបង្កើតគណបក្សសម្ព័ន្ធជាតិដើម្បីលទ្ធិប្រជាធិបតេយ្យដែរ។ រីឯលោកស្រីស៊ូ ស៊ូវីនដែលជាភរិយារបស់លោកទីន ចវ គឺជាតំណាងរាស្រ្តដែលលោកស្រីបានជាប់ឆ្នោតក្នុងឆ្នាំ ២០១២។
នៅក្នុងស្រុក ឈ្មោះលោកទីន ចវត្រូវបានគេស្គាល់តិច ឬច្រើន តែបើនៅលើឆាកអន្តរជាតិវិញ គឺពិតជាគ្មាននរណាស្គាល់ឡើយ បើប្រៀបធៀបនឹងឈ្មោះលោកស្រីអ៊ុង សានស៊ូជី។ យ៉ាងណាក៏ដោយ អ្វីដែលសំខាន់មិនមែនឈ្មោះលោកទីន ចវទេ តែគឺការឡើងកាន់តំណែងប្រធានាធិបតីរបស់ឥស្សរជនស៊ីវិលម្នាក់នៅភូមា បើគិតជិត ៥០ឆ្នាំកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ